ۇتو ديرەكتورىنىڭ ايتۋىنشا, ۇبت وتكىزۋ بارىسىندا 402 تالاپكەر سمارتفون, شپارگالكا جانە باسقا دا تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلعان.
«تەستىلەۋ كەزىندە ەرەجەلەردى بۇزعانى ءۇشىن اۋديتوريادان 312 ادام شىعارىلىپ, ولاردىڭ ناتيجەلەرى جويىلدى. كەيبىر تەستىلەنۋشىلەردەن جاسىرىن كامەرالار, ميكروقۇلاققاپتار, سمارتفوندار جانە باسقا دا تىيىم سالىنعان زاتتار تابىلدى.
سونىمەن بىرگە ءبىز بارلىق بەينەجازباعا 2023 جىلعى 31 قازانعا دەيىن تالداۋ جاسايمىز. ەگەر تىيىم سالىنعان زاتتاردى پايدالانۋ فاكتىلەرى انىقتالسا, تالاپكەر ءبىلىم بەرۋ گرانتىنان ايىرىلادى», دەدى رۋسلان ەمەلباەۆ.
بۇل رەتتە ۇتو ديرەكتورى بۇل نورما 2020 جىلى العاش رەت قولدانىلا باستاعانىن تىلگە تيەك ەتتى.
«2020 جىلى بەينەجازبالاردى قايتا قاراۋ ناتيجەسىندە 152 تەستىلەنۋشىنىڭ, 2021 جىلى 52 ادامنىڭ, 2022 جىلى 217 ادامنىڭ ناتيجەسى جويىلعان بولاتىن. بيىل دا بۇل جۇمىس قولعا الىندى. ۇبت-عا دايىندىق جانە تاپسىرۋ بارىسىندا ءبىز تالاپكەرلەردى بىرنەشە رەت اكادەميالىق ادالدىققا شاقىردىق. بۇل ولارعا بولاشاقتا جاقسى مامان بولۋعا مۇمكىندىك بەرەدى. وتكىزۋ فورماتى, ۋاقىتى وزگەرىسسىز قالدى. ەلەكتروندى فورماتقا كوشكەننەن بەرى اپپەلياتسيا بەرۋ ءراسىمى جەڭىلدەدى.
وتكەن جىلدار سياقتى اپپەلياتسيانى كەلەسى كۇنى ەمەس, ۇمىتكەرلەر تەستىلەۋ اياقتالعاننان كەيىن 30 مينۋت ىشىندە بەرە الادى. نەگىزگى ۇبت-2023 بارىسىندا 50 مىڭنان استام ءوتىنىش كەلىپ ءتۇستى, ونىڭ ىشىندە 805 ءوتىنىش قاناعاتتاندىرىلدى. ايتا كەتۋ كەرەك, ۇبت شتاتتىق رەجيمدە ءوتتى», دەپ تۇيىندەدى رۋسلان ەمەلباەۆ.
