ءىس-شارانىڭ اشىلۋ سالتاناتىنا استانا قالاسى اكىمىنىڭ ورىنباسارى ەسەت بايكەن, قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارى داۋلەت تۇرلىحانوۆ, يسا قازىبەك جانە «تولاعاي» الىپتار سايىسىنىڭ اۆتورى تەمىر سپاتاەۆ قاتىستى.
«تولاعاي» الىپتار سايىسى – بۇل سالاۋاتتى ءومىر سالتىن ناسيحاتتايتىن كوپسايىستى تۋرنير. ەرەكشە جوبا العاش رەت 2022 جىلى جەر ءجانناتى جەتىسۋ وبلىسىنىڭ جاركەنت تورىندە جۇزەگە اسقان ەدى. ەندى مىنە قازاقستاننىڭ ەلورداسى استانا قالاسىندا وتكىزىلىپ وتىر. وسىنداي الىپتار سايىسىنان اتى اڭىزعا اينالاتىن سپورتشىلار شىعىپ, كەشەگى ەل تاريحىنداعى تولاعايلاردىڭ ءىزىن باساتىن, تۇلپارىنىڭ ءدۇبىرى دالانى شايقاعان باتىر بابالاردىڭ ۇرپاعى دەگەن اتقا لايىق بولاتىن الىپتاردىڭ قاتارى كوبەيە بەرسىن!», دەدى قالا اكىمىنىڭ ورىنباسارى ەسەت بايكەن.
بىلەكتى باتىرلار سايىستىڭ 5 ءتۇرى بويىنشا ياعني, 1,5 م ۇزىندىقتاعى تەمىردى مويىنعا سالىپ مايىستىرۋ, سالماعى 140 كەلىلىك تاستى مەجەلى قاشىقتىققا دەيىن اپارۋ, 100 كەلىدەن اساتىن اۋىر بورەنەنى جەلكەگە سالىپ وتىرىپ-تۇرۋ, جارتى توننالىق اربانى سۇيرەۋ, ون كەلىلىك نايزانى قاشىقتىققا لاقتىرۋ سەكىلدى ەرەكشە سايىس تۇرلەرى بويىنشا سىنعا ءتۇستى.
بەس سايىستىڭ قورىتىندىسى بويىنشا 120 ۇپايپەن شىمكەنت قالاسىنىڭ تۋماسى ادىلەت نۇرعيسا III ورىنعا يە بولىپ, 400 000 تەڭگە قارجىلاي سىيلىقتى قانجىعالادى. 122 ۇپاي سانمەن قوناەۆ قالاسىنىڭ سپورتشىسى فايد تەڭىزباەۆ جۇلدەلى ەكىنشى ورىنعا يە بولىپ, 600 000 تەڭگە قارجىلاي سىيلىق ۇتىپ الدى. ال وزا شاپقان بىلەكتى باتىر تۇركىستاندىق ازامات ماقۇلبەكوۆكە بۇيىردى. ول «تولاعاي» الىپتار سايىسىنىڭ جەڭىمپازى اتانىپ 1 ملن تەڭگەگە يە بولدى.
ۇيىمداستىرۋشىلاردىڭ ايتۋىنشا بىلتىر جەتىسۋ جەرىندە وتكەن دودانى ەندى جىل سايىن وتكىزۋ جوسپارلانىپ وتىر.
ايتا كەتەيىك, جالپى جۇلدە قورى ەكى ميلليون تەڭگەنى قۇراعان تۋرنير استانا قالاسى اكىمشىلىگىنىڭ ورتالىق الاڭىندا ءوتتى.
