«قانشاما جىل وسى مەكەمەدە قىزمەت اتقارىپ جۇرەمىز. بىزدەگى بىردەن ءبىر ماسەلە - ءورت سوندىرۋگە ارنالعان تەحنيكالاردىڭ توزىعى جەتكەندىگى. قازىر تەحنيكانىڭ وزعان, دامىعان ۋاقىتى عوي. بىراق ءبىز ءالى كۇنگە دەيىن سول ەسكى قۇرال-جابدىقتارمەن جۇمىس جاسايمىز. سىزدەردەن وسى ماسەلەنىڭ شەشىلۋىنە ىقپال جاساۋلارىڭىزدى سۇرايمىز», دەدى ورمان ءورت ءسوندىرۋ ستانتسياسىنىڭ باسشىسى امانبەك جاساروۆ.
مامانداردىڭ ايتۋىنشا, ورمان شارۋاشىلىعىنداعى تەحنيكالاردىڭ ابدەن توزىعى جەتكەن. سونداي- اق ونداعى قىزمەتكەرلەردىڭ جالاقىسى دا ماردىمسىز.
«مۇنداعى جۇمىس ۋاقىتىنا قاراماستان قىزمەتكەرلەردىڭ جالاقىسى وتە از. ولار كۇندىز ءتۇنى قولايلى, قولايسىز اۋا رايىندا دا جۇمىس ىستەيدى. سوندىقتاندا جالاقى ماسەلەسى رەتتەلسە جاقسى بولار ەدى», دەدى زايسان ورمانشىلىعى باسشىسىنىڭ مىندەتىن اتقارۋشى ايدىن ەسكەندىروۆ.
«بارىڭىزگە بەلگىلى جاقىندا اباي وبلىسىندا بولعان ورمان ءورتى وسى سالادا تۇيتكىلدى ماسەلەلەردىڭ بار ەكەندىگىن كورسەتتى. ءوز كەزەگىندە مەملەكەت باسشىسى دا سالاداعى كەمشىلىكتەردى انىقتاپ جويۋ قاجەتتىگىن اتاپ ءوتتى. سونىمەن قاتار وسى جىلدىڭ 1 شىلدەسىنەن باستاپ ورمانشىلاردىڭ ايلىعى كوتەرىلدى. ال ماتەريالدىق-تەحنيكالىق بازانى جاقسارتۋ جۇمىستارى كەزەڭ-كەزەڭىمەن جۇزەگە اسىرىلادى دەپ مالىمدەگەن بولاتىن مينيسترلىك. بۇل ماسەلە بويىنشا ءماجىلىس دەپۋتاتتارى ءتيىستى مينيسترلىكتىڭ جۇمىسىن نازاردا ۇستايتىن بولادى», دەدى ەرلان سايروۆ.
ساپار بارىسىندا ءماجىلىس دەپۋتاتتارى شىعىس قازاقستان وبلىسىنىڭ گلۋبوكوە, التاي, كاتون-قاراعاي, كۇرشىم, تارباعاتاي اۋداندارىنا بارىپ, تۇرعىندارمەن كەزدەسەدى.
