كەزدەسۋدە قازاقستان مەن جاپونيا اراسىنداعى ىنتىماقتاستىقتى ودان ءارى تەرەڭدەتۋدىڭ جانە پارلامەنتارالىق ىقپالداستىقتى نىعايتۋدىڭ وزەكتى ماسەلەلەرى قاراستىرىلدى.
قاسىم-جومارت توقاەۆ توشياكي ەندوعا ءىلتيپات بىلدىرە وتىرىپ, قازاقستان ازاماتتارىنىڭ جاپون حالقىنا قۇرمەتى ەرەكشە ەكەنىن ايتتى.
مەملەكەت باسشىسى ەكى ەل اراسىنداعى سەنىمدى قارىم-قاتىناستىڭ ايرىقشا دەڭگەيدە ەكەنىن اتاپ ءوتتى. سونداي-اق جاپونيا پارلامەنتىنىڭ قازاقستانمەن دوستىق ليگاسىنىڭ ءوزارا بايلانىستاردى نىعايتۋعا قوسقان ۇلەسىن جوعارى باعالادى.
قازاق-جاپون قاتىناستارى سالاسىندا ەكونوميكالىق باعىت ماڭىزدى ءرول اتقارادى. پرەزيدەنت ساۋدا جانە ينۆەستيتسيالىق ءىس-ارەكەتتەردىڭ مول مۇمكىندىگىنە نازار اۋدارىپ, ەلىمىزدىڭ ەكونوميكالىق ىنتىماقتاستىقتى نىعايتۋعا مۇددەلى ەكەنىن ايتتى.
قاسىم-جومارت توقاەۆ ەلىمىزگە 8 ميلليارد دوللار ينۆەستيتسيا قۇيعان جاپونيا قازاقستان ەكونوميكاسىنىڭ ەڭ ءىرى ينۆەستورلارىنىڭ وندىعىنا كىرەتىنىنە نازار اۋداردى. سونداي-اق ەكى ەل اراسىنداعى تاۋار اينالىمى 2 ميلليارد دوللارعا جەتكەنىن اتاپ ءوتىپ, بۇل كورسەتكىشتى ودان ءارى ارتتىرۋ ءۇشىن مول الەۋەت بار ەكەنىن جەتكىزدى.
توشياكي ەندو كەزدەسۋگە مۇمكىندىك بەرگەنى ءۇشىن قاسىم-جومارت توقاەۆقا العىس ايتىپ, جاپونيا پرەمەر-ءمينيسترى فۋميو كيسيدانىڭ جولداعان حاتىن تابىستادى.
پارلامەنتتىك دوستىق ليگاسىنىڭ توراعاسى جاپونيا پارلامەنتىنىڭ بارلىق سالا بويىنشا قازاقستانمەن ءوزارا ءتيىمدى سەرىكتەستىكتى كەڭەيتۋگە دايىن ەكەنىن راستادى.
