سۋرەتتەردى تۇسىرگەن ەرلان ومار
ساياباقتىڭ اشىلۋ سالتاناتىنا اقپارات جانە قوعامدىق دامۋ ءمينيسترى دارحان قىدىرالى, استانا قالاسىنىڭ اكىمى جەڭىس قاسىمبەك جانە اقپارات سالاسىنىڭ ارداگەرلەرى, رەسپۋبليكالىق ارنالار مەن گازەتتەردىڭ باسشىلارى مەن قالالىق ءماسليحات دەپۋتاتتارى قاتىستى.
«بۇل جۋرناليستەرگە كورسەتىلگەن ۇلكەن قۇرمەتتىڭ ءبىر كورىنىسى. جۋرناليستەر ساياباعىنىڭ ەلوردا كۇنى قارساڭىندا «ەگەمەن قازاقستان» مەن «كازاحستانسكايا پراۆدا» ورنالاسقان عيماراتتىڭ الدىندا اشىلۋىنىڭ دا سيمۆوليكالىق ءمانى بار. سەبەبى بيىل استاناعا 25 جىل تولىپ وتىر. ال ەندى سول ەلوردامىزدىڭ ەڭسەلى بولۋىنا ارداگەر جۋرناليستەر ەسەلى ەڭبەك ەتتى. سوندىقتان بۇل اللەيانى ارداگەرلەرگە تارتۋ رەتىندە قابىلداپ وتىرمىز», دەدى اقپارات جانە قوعامدىق دامۋ ءمينيسترى دارحان قىدىرالى.
سونداي-اق استانا قالاسىنىڭ اكىمى جەڭىس قاسىمبەك جۋرناليستەر ساياباعىنىڭ اشىلۋىمەن قۇتتىقتاپ, ونىڭ قالا جۇرتشىلىعى ءۇشىن ماڭىزدىلىعىن اتاپ ءوتتى.
«25 جىلدىڭ ىشىندە ەلوردامىز تەك اكىمشىلىك ورتالىق ەمەس, شىعارماشىلىق مادەني جانە رۋحاني ورتالىققا اينالدى. بۇگىندە ەلىمىزدىڭ ەڭ ءىرى اقپارات قۇرالدارى وكىلدەرىنىڭ ورتالىق كەڭسەسى استانا قالاسىندا ورنالاسقانى زاڭدى قۇبىلىس دەپ سانايمىز. سونداي-اق بۇل ساياباق قالامگەرلەر اللەياسىمەن ۇشتاسىپ جاتىر. ول جەردە قازاقتىڭ العاشقى گازەتتەرىنىڭ نەگىزىن سالعان الاش ارىستارىنىڭ ەسكەرتكىشى تۇر», دەدى ەلوردا اكىمى.
«قازاق گازەتتەرى» جشس باس ديرەكتورى ديحان قامزابەك ۇلىنىڭ ايتۋىنشا, جۋرناليستەر ساياباعىنىڭ كەنەسارى مەن اباي داڭعىلدارىنىڭ اراسىندا ورنالاسۋىنىڭ وزىندىك ءمانى بار, ءبىرى باتىرلىقتىڭ, ءبىرى دانالىقتىڭ سيمۆولى.
«بۇگىنگى جۋرناليستەرگە دانالىق تا, باتىرلىق تا اۋاداي قاجەت. اعا بۋىن مەن بۇگىنگى جۋرناليستەردىڭ اراسىنداعى التىن كوپىر جالعاسىن تابا بەرەدى دەپ سەنەمىز. اشىلعان ساياباعىمىزدىڭ ابىرويى مەن بەدەلى ارتا بەرسىن. وسىندا كەلگەن جۋرناليستەر ساباق الاتىنداي, ۇلكەن شەبەرلىك مەكتەبى بولاتىنداي جاقسى جەتىستىكتەرگە جەتە بەرۋىنە تىلەكتەستىك بىلدىرەمىز», دەدى ديحان قامزابەك ۇلى.
ايتا كەتەيىك, جۋرناليستەر ساياباعى قۇرامىنا «ەگەمەن قازاقستان», «كازاحستانسكايا پراۆدا» سىندى ەلىمىزدەگى ىرگەلى باسىلىمدار كىرەتىن ءىرى مەديا قۇرىلىم «قازاق گازەتتەرى» جشس عيماراتىنىڭ الدىندا, ەگەمەن قازاقستان كوشەسىنىڭ بويىندا ورنالاسقان. ساياباقتا بوي كوتەرگەن ستەللادا احمەت بايتۇرسىنوۆ پەن شەرحان مۇرتازانىڭ بەينەسى بەينەلەنىپ, ەلىمىزدەگى نەگىزگى اقپارات قۇرالدارىنىڭ اتاۋى جازىلعان.
