اسىلى, استانانىڭ بەدەلى ەلدىڭ باس اكىمشىلىك ورتالىعىمەن, كوكپەن تالاسقان بيىك ۇيلەرىمەن, كوزدىڭ جاۋىن الار عيماراتتارىمەن, ايناداي جارقىراعان ءتۇزۋ جولدارىمەن, جاسىل جەلەك كومكەرگەن ساياباقتارىمەن, نەشە ءتۇرلى گۇلدىڭ حوش ءيىسى اڭقىعان گۇلزارىمەن عانا ولشەنبەيدى, ونداعى زيالى قاۋىمنىڭ سالماعىمەن دە ولشەنەدى. وسى جاعىنان كەلگەندە, كىندىك قالانىڭ بەتى جارىق. ويتكەنى ەلوردادا حالقىمىزدىڭ ءسۇت بەتىنە شىعار زيالىلارىنىڭ ءبىر شوعىرى جينالعان. ولار باس شاھاردىڭ العاشقى كىرپىشى قالانعان كۇننەن رۋحاني-مادەني ورتالىققا اينالۋىنا زور ۇلەس قوستى.
حالقىمىز «اكىمى اقىنىن ىزدەگەن ەل باقىتتى» دەگەن ءسوزدى قالاي تاۋىپ ايتقان. بۇگىندە ەلوردادا قازاقستان جازۋشىلار وداعىنىڭ 160-تان استام مۇشەسى تۇرادى. ولاردىڭ اراسىندا قازاق ادەبيەتىنىڭ قازىناسىن سۇبەلى تۋىندىلارىمەن بايىتقان قابىرعالى قالامگەرلەردەن باستاپ, كوركەم ءسوز ونەرىنە ەندى كەلگەن تالانتتى جاستار دا بار.
ءىس-شارادا العاشقى بولىپ ءسوز العان استانا قالاسى اكىمىنىڭ ورىنباسارى ەسەت بايكەن ەلوردانىڭ رۋحاني ءومىرى تۋرالى ايتا كەلىپ, ونىڭ قالىپتاسۋىنا ايرىقشا ەڭبەك سىڭىرگەن اقىن-جازۋشىلار تۋرالى وي تولعادى.
«قازىر ەلوردادا ۇلت رۋحانياتىنىڭ ءبىر-ءبىر ۋىعىنا اينالعان قالامگەرلەر تۇرادى. ولار باس قالانىڭ عانا ەمەس, ەلىمىزدىڭ رۋحاني-مادەني ءومىرىنىڭ دامۋىنا ايانباي قىزمەت ەتتى. استانا اكىمدىگى زيالى قاۋىمدى ەشقاشان نازاردان تىس قالدىرعان ەمەس. جاستاردى دا ۇنەمى قولداپ وتىرادى. وسىدان ەكى جىل بۇرىن ەلوردالىق 30 جاس اقىن-جازۋشىنىڭ جيناعى جارىق كوردى. جاقىندا رەسپۋبليكالىق جىر ءمۇشايراسىن ۇيىمداستىردىق. وسىنداي يگى ءىس-شارا جالعاسىن تابا بەرەدى. بۇگىن ءبىز استانانىڭ 25 جىلدىعىنا وراي ءبىر توپ اعا اقىن-جازۋشىعا سىي-قۇرمەتىمىزدى كورسەتىپ وتىرمىز», دەدى قالا اكىمىنىڭ ورىنباسارى.
ءسويتىپ, «استانا – شابىت ارقاۋى» اتتى مادەني ءىس-شارا اياسىندا تولەن ابدىك, قويشىعارا سالعارا ۇلى, عاريفوللا ەسىم, سەرىك تۇرعىنبەك ۇلى, الدان سمايىل, ءمادي ايىمبەت, الىبەك اسقار, قايسار ءالىم, قۋانىش جيەنباي, تۇرسىن جۇرتباي, التىنشاش جاعانوۆا, ءشاربانۋ بەيسەنوۆا باستاعان 80-گە جۋىق تانىمال قالامگەرگە استانا اكىمىنىڭ قارجىلاي گرانتى تابىس ەتىلدى. بۇعان اعا بۋىن قالامگەرلەر ءبىر سەرپىلىپ قالدى. بەلگىلى جازۋشى, قوعام قايراتكەرى التىنشاش جاعانوۆا ەلوردانىڭ رۋحاني كەلبەتى مەن الەم الدىنداعى ابىروي-بەدەلىن قالىپتاستىرۋعا تالماي ەڭبەك ەتىپ كەلە جاتقان كوركەم ءسوز زەرگەرلەرىنە قۇرمەت كورسەتكەن قالا اكىمدىگىنە ريزاشىلىعىن جەتكىزدى.
وسى يگى ءىستىڭ باسى-قاسىندا جۇرگەن ايتۋلى اقىن, قازاقستان جازۋشىلار وداعىنىڭ استانا قالالىق فيليالىنىڭ ديرەكتورى داۋلەتكەرەي كاپ ۇلىنىڭ ايتۋىنشا, الداعى ەلوردا مەرەكەسىندە وسىنداي سىي-قۇرمەت 25 جاس اقىن-جازۋشىعا كورسەتىلسە, 25 قازان – رەسپۋبليكا كۇنىندە قالعان الپىسقا جۋىق قالامگەر اكىم گرانتىن الادى.
«بۇدان 3-4 جىل بۇرىن الماتىدا تۇراتىن بارلىق قالامگەرگە الماتى اكىمىنىڭ ستيپەندياسى تابىس ەتىلدى. بىزگە دە بۇل وي سالدى. سودان بەرى وسى ماسەلەنى كوتەرىپ كەلەمىز. جاقىندا استانا اكىمى جەڭىس قاسىمبەكتىڭ قابىلداۋىندا بولعاندا, وسىنى تاعى كوتەردىم. مىنە, ناتيجەسىن كورىپ وتىرمىز. بيىل ەلورداعا 25 جىل تولىپ وتىر. باس قالانىڭ رۋحاني تۇرعىدان قالىپتاسۋىنا قالامگەرلەر كوپ ەڭبەك ءسىڭىردى. مۇنى سوعان كورسەتىلگەن قۇرمەت دەپ بىلەمىن. ءبىر جاعىنان, ەلورداداعى بارلىق اقىن-جازۋشىنىڭ جاعدايى كەرەمەت دەي المايمىن. كەيبىر قالامگەردىڭ جۇمىسى, كەيبىرەۋىنىڭ ءۇيى جوق. بۇل سوعان ءسال دە بولسا دەمەۋ. قانداي قوعام بولسا دا, رۋحانيات وكىلدەرىنە قولداۋ قاجەت. ەندى وسى ءىس-شارا داستۇرگە اينالسا دەپ تىلەيمىن!», دەدى داۋلەتكەرەي كاپ ۇلى.
سونداي-اق مادەني ءىس-شارا اياسىندا قالا اكىمدىگىنىڭ ورتالىقتاندىرىلعان كىتاپحانالار جۇيەسى «استانا – بەيبىتشىلىك پەن جاسامپازدىق مەكەنى» اتتى كىتاپ كورمەسىن ۇيىمداستىردى.
