وبلىستىق پروكۋراتۋرانىڭ ۇيلەستىرۋىمەن تالدىقورعان قالاسىندا ەسىرتكى ساتۋ نۇكتەسىن انىقتاۋ بويىنشا ارنايى وپەراتسيانى پوليتسەيلەر ۇقكد قىزمەتكەرلەرىمەن بىرلەسىپ جۇرگىزدى. قۇقىق قورعاۋ ورگاندارى 40 گرامنان استام ماريحۋانا ساتۋعا ارەكەت ەتكەن 39 جاستاعى ەر ادامدى ۇستادى.
كۇدىكتىنىڭ تۇرعىلىقتى جەرىن ءتىنتۋ كەزىندە شامامەن 27,5 كەلى كاننابيس تەكتەس ەسىرتكى تابىلدى.
«اتالعان دەرەك بويىنشا تەرگەۋ امالدارى قر قك-ءنىڭ 297-بابىنا سايكەس (ەسىرتكى, پسيحوتروپتىق زاتتاردى, سول تەكتەستەردى وتكىزۋ ماقساتىندا زاڭسىز دايىنداۋ, قايتا وڭدەۋ, يەمدەنۋ, ساقتاۋ, تاسىمالداۋ, جونەلتۋ نە وتكىزۋ) جۇرگىزىلىپ جاتىر. كۇدىكتى قاماۋعا الىندى», دەدى جەتىسۋ وبلىسى پد ەسىرتكى قىلمىسىنا قارسى ءىس-قيمىل باسقارماسىنىڭ باستىعى مۇرات جۇماباەۆ.
