ءوزىنىڭ سوزىندە ە.كوچەتوۆ مەملەكەتتىڭ جاستار ساياساتىنا توقتالدى. بوس جۇرگەن جاستاردىڭ جۇمىسقا ورنالاسۋ, اسىرەسە NEET كاتەگورياسىنا جاتاتىن جاستاردىڭ قامقورلىقسىز قالماۋ ماسەلەسىنە نازار اۋداردى. «سولتۇستىك قازاقستان وبلىسى ماۋسىمدىق جۇمىستار كەزىندە جۇمىس قولىنا ءزارۋ بولاتىنىن بىلەمىز. اسىرەسە, وسىنداي كەزدەردە جۇمىسسىز جاستاردى ەڭبەكپەن قامتاماسىز ەتۋ كەرەك», دەدى ول.
جاستار ەلىمىزدىڭ بولاشاعى, ولاردى وتانىمىزدىڭ بارلىق سالاسىنىڭ دامۋىنا اتسالىسۋىن ۇيىمداستىرۋ جاستار ۇيىمدارىنىڭ, جەرگىلىكتى بيلىكتىڭ جاستار ءىسى جونىندەگى بولىمدەرىنىڭ كۇندەلىكتى مىندەتى بولۋى كەرەك دەگەن ول سولتۇستىك قازاقستانداعى ۆولونتەرلىك قوزعالىستىڭ دامۋىن قاناعاتپەن اتاپ ءوتتى. «بۇگىنگى تاڭدا وبلىستا 30 مىڭعا تارتا جاس ازامات وسى قوزعالىسقا بەلسەنە قاتىسادى. بۇل حالىق ساناعىنا شاققاندا رەسپۋبليكاداعى الدىڭعى قاتارلاردىڭ ءبىرى. بۇل جۇمىستى ودان ءارى جانداندىرا بەرۋ كەرەك», دەدى ۆيتسە-مينيستر.
بۇدان كەيىن ە.كوچەتوۆ جينالعانداردىڭ سۇراقتارىنا جاۋاپ بەردى. سونىڭ ىشىندە كاسىپكەرلەر پالاتاسىنىڭ جانىنداعى ىسكەر ايەلدەر كەڭەسىنىڭ مۇشەسى گۇلميرا جىلقىباەۆا وتباسىلارىن قولداۋ ورتالىقتارىنىڭ جۇمىسىن جانداندىرۋ ماسەلەسىنە نازار اۋداردى. «وسى ورتالىقتاردىڭ جۇمىسى قانشالىقتى ءتيىمدى؟ ءبىزدىڭ ەلىمىزدە وتباسىلىق زورلىقتار, جۇپتاردىڭ ايىرىلىسۋى كۇننەن-كۇنگە ارتىپ كەلە جاتقانىن كورىپ وتىرمىز. دەمەك ورتالىقتىڭ جۇمىسى كورىنبەي وتىرعان سياقتى», دەدى ول. وعان ە.كوچەتوۆ «بۇۇ-ايەلدەر» دەگەن حالىقارالىق ۇيىم بار ەكەنىن ايتىپ, وسى ۇيىمنىڭ كومەگىمەن قازىر ءتۇرلى ورتالىقتاردىڭ جۇمىسىن جەتىلدىرۋ بويىنشا جۇمىستار جۇرگىزىلەتىنىن جەتكىزدى. قازىر قازاقستاندا وتباسىن قولداۋ بويىنشا 68 ورتالىق بار ەكەن, ال 2025 جىلى ونىڭ سانىن 143 جەتكىزۋ جوسپارلانىپتى.
اقپارات جانە قوعامدىق دامۋ ۆيتسە-ءمينيسترى ە.كوچەتوۆ پەتروپاۆل قالاسىنىڭ ىرگەسىندەگى اققايىڭ اۋدانىنىڭ ورتالىعى سميرنوۆو اۋىلىندا دا بولىپ, وندا رەسپۋبليكالىق «Tulga bol» جارمەڭكەسىنىڭ جۇمىسىمەن تانىستى. سونىمەن بىرگە ول جەرگىلىكتى باسشىلار جانە ماماندارمەن سۇحبات قۇرىپ, وسى اۋداننىڭ جاس كادرلاردى, جۇمىسسىز جاستاردى جۇمىسپەن قامتۋ الەۋەتىن انىقتادى. اۋدان اكىمى رۇستەم ەلۋباەۆ: ء«بىزدىڭ اۋداندا جاڭادان 4 تاۋارلى-ءسۇت فەرماسى اشىلدى, جىلىنا 5 مىڭ توننا قۇس ەتىن دايىنداي الاتىن قۇس فابريكاسىن اشتىق, وسى كاسىپورىنداردا جاڭادان 200-دەن ارتىق جۇمىس ورىندارى اشىلدى. سوندىقتان ءبىز جاستاردىڭ, سونىڭ ىشىندە مامانداردىڭ جۇمىسقا تۇرۋىنا جاعداي جاساپ وتىرمىز. جۇمىس ىستەيمىن دەپ كەلگەن جاستارعا الەۋمەتتىك جاعدايلاردى دا قاراستىردىق», دەدى.
سولتۇستىك قازاقستان وبلىسى
