ۇلتتىق قۇرىلتايدا مەملەكەت باسشىسى: ء«بىزدىڭ الەمدەگى ورنىمىز, ەڭ الدىمەن, ۇلتىمىزدىڭ ساپاسىنا بايلانىستى بولماق. قۋاتتى ەل بولامىز دەسەك, بىرلەسە وتىرىپ بىرقاتار ماڭىزدى ساۋالعا جاۋاپ بەرۋگە ءتيىسپىز» دەدى. پرەزيدەنت باستى نازاردا ۇستاپ وتىرعان «ۇلت ساپاسى» ۇعىمى قازاقى تانىم-تۇسىنىكتەن, ۇلتتىق يدەولوگيادان, حالىقتىق داستۇردەن باستاۋ الارى انىق. ۇلت ساپاسىنىڭ تولىققاندى بولۋى ءۇشىن پرەزيدەنت بىرنەشە ناقتى ماسەلەنى اتاپ, ولاردىڭ شەشۋ جولدارىن ۇتىمدى ۇسىندى. ۇلت ساپاسى قاسىم-جومارت توقاەۆتىڭ سوزىنشە, ء«داستۇرلى قۇندىلىقتارىمىزدى قازىرگى مادەني ۇردىستەرمەن ۇيلەستىرگەن جاعدايدا» ارتا تۇسپەك.
مەملەكەت باسشىسى بىلىمگە, عىلىمعا, ونەرگە قۇشتار جاستاردى كورگەندە, جارقىن بولاشاققا سەنىممەن قارايتىنىن جاريا ەتتى. پرەزيدەنت جاستاردىڭ بولمىسىن دا بىرتەكتەس سيپاتتا ايقىنداپ بەردى. ادىلەتتى قازاقستاننىڭ ادال ازاماتى بولاتىن جاستار «كوپ سوزگە قۇمار, جالقاۋ, ەنجار, ماسىل بولماۋعا ءتيىس». جاستاردىڭ بويىنان تەك ىزگى قاسيەتتەردى كورۋ ءۇشىن اعا بۋىننىڭ موينىندا تاربيە پارىزى تۇرعانى دا اتالىپ ءوتتى.مەملەكەت باسشىسى ءوز سوزىندە «ادال ازامات» ۇعىمىنا جالپىعا تۇسىنىكتى سيپاتتاما بەردى. ءادىل قوعام قۇرۋعا ءتيىس ادال ازامات ء–وز سالاسىندا ناعىز مامان بولۋ, ۇنەمشىلدىك, ەڭبەكقورلىق, ەل مەن جەرگە جاناشىرلىق سياقتى اسىل قاسيەتتەر بارىنەن دە بيىك قوياتىن جان. ۇنەمشىلدىك, قاناعاتشىلدىق – ادالدىققا باستايتىن جاعىمدى قاسيەت. بارعا قاناعات تۇتا بىلگەن ادام ارام جولعا تۇسپەسى حاق. اباي اتاعان ناعىز ادامنىڭ بويىنان تابىلۋعا ءتيىس «بەس اسىل ءىستىڭ» ءبىرى – قاناعات.
پرەزيدەنت تالداپ كورسەتكەن التى ماسەلەنىڭ ىشىنەن بىرنەشەۋىن ايتار بولساق, ەكىنشى ماسەلەدە ۇلتىمىزدىڭ تاريحي سانا-سەزىمىن جاڭعىرتۋ جايى كوتەرىلدى. مەنىڭشە, بۇل ماسەلەدە ءبىلىم سالاسىنان باستاپ جاڭعىرتۋ قاجەت. قازاقستان تاريحى ءپانىن وقىتۋدىڭ جاڭاشىل, وزىق باعدارلاماسى قۇرىلۋى كەرەك. سوندا ۇلتتىق تاريحي سانا جاس بۋىن ساناسىنان باستاپ جاڭارىپ, تۇلەۋ ۇردىسىنە كوشەدى. ايتپەسە, قوعامنىڭ بەلگىلى ءبىر دەڭگەيىن عانا ارنالعان ءىرى جوبالار كوپشىلىكتى جاپپاي قامتي المايدى.
مەملەكەت باسشىسى ءتورتىنشى ماسەلە رەتىندە وسكەلەڭ ۇرپاقتىڭ جاقسى تاربيە الۋىن اتادى. جاس ۇرپاقتى قازىر نەدەن قورعاۋ مەن قالاي تاربيەلەۋدىڭ تەتىكتەرى ايقىن ءسوز ەتىلدى. ال ەل رۋحانياتىنا قىزمەت ەتۋ پارىزىن موينىما العان جازۋشى رەتىندە قوسارىم, قازىرگى بالالاردى تەرىس اقپاراتتاردان ساقتاندىرۋ ماسەلەسى مۇلدە قولعا الىنباي جاتىر. الەۋمەتتىك جەلىلەردە قاپتاپ جۇرگەن تەرىس اعىم وكىلدەرى, ەل اراسىنا ىرىتكى سالۋدى ماقسات تۇتاتىن ارانداتۋشىلاردىڭ ەشبىر اۋىزدىقسىز كەتكەن ناسيحات, اقپاراتتارى ءالى وڭ-سولىن تاني قويماعان جەتكىنشەكتەرگە تەرىس ىقپال ەتىپ وتىر. سول سەبەپتى بالا تاربيەسىن اقپاراتتىق قورعاۋ تۇرعىسىنان باستاعان ءلازىم. سونىمەن قاتار ۇرپاق تاربيەسىندە ۇلت ادەبيەتىنىڭ ورنى بولەك ەكەنى داۋسىز. الايدا پرەزيدەنت كولدەنەڭ تارتقان دەرەكتەر كوڭىل قۋانتپايدى. ادەبي كىتاپتاردىڭ 90 پايىزعا جۋىعى سىرتتان كەلەتىنىن ايتقان مەملەكەت باسشىسى بۇل ءۇردىستىڭ زالالى اۋىر ەكەنىن جەتكىزدى. ءدال وسى تۇستا وتاندىق باسپا ءىسىن دامىتۋ, ونى ءبىر ورتالىققا جۇمىلدىرۋ ماسەلەسى تۇر. تاۋەلسىزدىكتەن كەيىنگى كەزەڭدە تارىداي شاشىلىپ كەتكەن باسپا سالاسى بۇگىندە ەلىمىزدىڭ رۋحاني مۇقتاجدىعىن قامتاماسىز ەتە الماي كەلەدى. ءيا, ادەبيەت – تاربيە قۇرالى. بۇگىنگى قالامگەرلەرگە وقىرمانىن بيىك مورالعا, اسقاق ادامگەرشىلىككە باستايتىن رۋحتى شىعارمالار جازۋ مىندەتى جۇكتەلىپ وتىر. پرەزيدەنت «شىن مانىندە, كىتاپ وقيتىن ەل زيالى ۇلتقا اينالا الادى» دەگەن سوزىندە قازىرگى قالامگەرلەرگە ۇلت وقيتىن كىتاپ جازۋ, كۇللى قازاقتى زيالى ۇلتقا اينالدىرۋ جولىندا ايانباي ەڭبەك ەتۋ پارىزىن استارلاپ تۇرعانى داۋسىز.
ۇلتتىق قۇرىلتايدان كەيىن قوعامدىق سانا جاڭعىرۋدى باستان كەشىرسە, سوندا اتالعان ماسەلەلەر كەزەڭ-كەزەڭىمەن شەشىمىن تاۋىپ, كىتاپ وقيتىن زيالى ۇلتتىڭ ساپاسى بارىنشا كوتەرىلەر ەدى.
ايزات راقىش,
قازاقستان جازۋشىلار وداعىنىڭ مۇشەسى
