وبلىس اكىمدىگى اۋىل شارۋاشىلىعى باسقارماسىنىڭ باسشىسى نۇربي جىگىتەكوۆتىڭ ايتۋىنشا, وڭىردە بۇگىنگى كۇنگە دەيىن 352,6 مىڭ گەكتار القاپتان ءشوپ ورىلىپتى. بۇل وتكەن جىلمەن سالىستىرعاندا 10 مىڭ گەكتارعا ارتىق.
«جالپى العاندا, وڭىردەگى شارۋا قوجالىق باسشىلارى ءتورت ت ۇلىككە قاجەتتى جەمشوپ قورىن جيناۋ جولىندا ەشقاشان ايانىپ قالعان ەمەس. بۇل جۇمىستار بيىل دا ساتىمەن جالعاسىپ جاتىر.
بيىل وبلىستا 2,6 ميلليون توننادان استام مال ازىعىن دايىنداۋ كوزدەلسە, ونىڭ ىشىندە 2,2 ميلليون توننا پىشەن, 105 مىڭ توننا پىشەندەمە, 438 مىڭ توننا سابان, 102 مىڭ توننا سۇرلەم بار.
قازىرگى ۋاقىتتا بارلىق اۋداندا ءشوپ ورۋ ناۋقانى باستالىپ, قىزۋ ءجۇرىپ جاتىر. جالپى العاندا, ءوڭىر بويىنشا 184,7 مىڭ گەكتار كوپجىلدىق جانە 27,9 مىڭ گەكتار بىرجىلدىق ءشوپ, 135,4 مىڭ گەكتار تابيعي شابىندىق, 4 مىڭ گەكتار سۇرلەمدىك جۇگەرى ورۋ جوسپارلانعان.
بۇگىنگى كۇنى 181,9 مىڭ گەكتار كوپجىلدىق ءشوپ, 21,5 مىڭ گەكتار بىرجىلدىق ءشوپ جانە 61,7 مىڭ گەكتار تابيعي شابىندىق ورىلسا, 1 ميلليون توننا پىشەن, 14,6 مىڭ توننا پىشەندەمە, 5,0 مىڭ توننا سابان دايىندالىپ, بۇل باعىتتاعى جۇمىستار جوسپارعا سايكەس جالعاسىپ جاتىر.
2022 جىلى ءوڭىر شارۋالارى جەمشوپ قورىن مولىنان جيناپ العان بولاتىن. ناتيجەسىندە, وتكەن جىلدان قالعان, قولدا بار مال ازىعى 218,7 مىڭ توننانى قۇراپ وتىر. قىسقاسى, شارۋالار بيىل دا جەمشوپتەن تارىقپايدى دەپ ايتۋعا تولىق نەگىز بار», دەيدى ن.جىگىتەكوۆ.
راسىندا دا, شارۋا قوجالىق جەتەكشىلەرى وتكەن جىلى رەكوردتىق كورسەتكىشتە جەمشوپ جيناعان بولاتىن. ءتىپتى ولاردىڭ اراسىندا: «بيىل ورىپ العان مال ازىعى ءبىر جارىم, ەكى جىلعا جايىنان جەتەدى», دەپ ماقتانعاندار دا بولعان. شىنىندا دا, سولاي سەكىلدى. ويتكەنى جوڭىشقاسىنىڭ العاشقى ورىمىن جيناعان شارۋالار كورسەتكىش وتكەن جىلعىدان تومەن بولعانىنا قاراماستان, جەمشوپ قورى جەتكىلىكتى ەكەنىن العا تارتىپ وتىر.
«93 گەكتار جەردەن بىلتىر 15 مىڭ تۇك جەمشوپ جيناپ العان بولاتىنمىن. جالپى العاندا, وتكەن جىلى تابيعات-انا شارۋالارعا قاتتى قارايلاستى عوي. قىس مەزگىلى دە جايلى بولدى. جەرگىلىكتى اتقارۋشى بيلىك تە شارۋالارعا قولدان كەلگەن جاعدايدى جاساپ ءجۇر.
ايتكەنمەن بيىل العاشقى ورىمدا جيناعان جوڭىشقامىز بىلتىرعىعا قاراعاندا ءسال ازداۋ بولدى. ارينە, وتكەن جىلعى كورسەتكىشپەن سالىستىرساق تومەندەۋ ەكەنى راس. الايدا بىلتىرعى جىلدان ارتىلىپ قالعان مال ازىعى بار ەكەنىن ەسكەرسەك, شارۋالاردىڭ بيىل اسا قاتتى قينالا قويمايتىنى ءمالىم. سابان بار, باسقا بار, وتكەن جىلدان 50 توننادان استام مال ازىعى ارتىلعان بولاتىن. الدا جوڭىشقانىڭ كەزەكتى ورىمى كۇتىپ تۇر. قىسقاسى, مال ازىعىن مولىنان جيناپ الاتىن مۇمكىندىك جەتكىلىكتى», دەيدى «جامبىل بتت» شارۋا قوجالىعىنىڭ باسشىسى تەمىربەك بايقۇليەۆ جاعدايدى ءتۇسىندىرىپ.
وبلىس ورتالىعىنان 100 شاقىرىم قاشىقتا جاتقان تۇرار رىسقۇلوۆ اۋدانىنىڭ شارۋا قوجالىق جەتەكشىلەرى نەگىزىنەن ەگىنگە باسا دەن قويادى. سونداي-اق سۋارمالى جەرگە دا نازار اۋدارادى.
«شابىندىق بىزدە نەگىزىنەن كۇرەڭ كۇزدە قىزا تۇسەتىنى بەلگىلى. قازىر شارۋا قوجالىق جەتەكشىلەرى سۋارمالى جەردەگى جوڭىشقانىڭ العاشقى ورىمىن الىپ جاتىر. ءبىزدىڭ اۋداننىڭ ازاماتتارى قۇم القابىنداعى جەرلەردى دە نازاردان تىس قالدىرمايدى.
جاۋاپتى باسشىلاردىڭ ىقپالىمەن مويىنقۇم القابىنان 5 مىڭ گەكتار جەر الدىق. ول جاقتان مال ازىعىن دايىنداۋعا بەس بريگادا جۇمىلىپ وتىر. جالپى, قىسقى مال ازىعىن دايىنداۋ ءتورت ت ۇلىك سانىنىڭ ارتۋىنا بايلانىستى جىلدا كوبەيىپ تۇرادى. وسى جولى 237 مىڭ توننا ءجومشوپ جينايمىز دەپ جوسپارلاپ وتىرمىز.
وتكەن جىلمەن سالىستىرعاندا بيىل مال ازىعىن 10-15 پايىزعا ارتىق جيناۋعا نيەتتىمىز. جالپى, بىلتىرعى مولشىلىق شارۋالارعا قول بولعانى ءسوزسىز. قىسقاسى, وتكەن جىلدان قالعان قوسىمشا 50 پايىز جەمشوپ دايىن تۇر. قازىر ازاماتتارىمىز سابان جيناپ جاتىر, بيدايىق تا ايتارلىقتاي جەتكىلىكتى بولادى دەگەن سەنىمدەمىز. جەرگىلىكتى اتقارۋشى بيلىك تاراپىنان جەڭىلدەتىلگەن ديزەل وتىنى ماسەلەسى شەشىمىن تاپقان», دەيدى تۇرار رىسقۇلوۆ اۋدانى اكىمدىگى اۋىل شارۋاشىلىعى ءبولىمىنىڭ باسشىسى تەمىرعالي بيعازيەۆ.
ءوڭىردىڭ بارلىق اۋدانىندا ءشوپ شابۋ ناۋقانى قىزىپ تۇر. شارۋا قوجالىق باسشىلارىنىڭ باسىم بولىگى مال ازىعىن مولىنان جيناپ الاتىندىعىنا سەنىمدى. نەگە دەسەڭىز, وتكەن جىلدان ارتىلعان جەمشوپ تە از ەمەس.
تۇرار رىسقۇلوۆ اۋداندىق اۋىل شارۋاشىلىعى ءبولىمىنىڭ باسشىسى ت.بيعازيەۆتىڭ ايتۋىنشا, اۋداننىڭ بارلىق اۋىلدىق وكرۋگىنە قوسىمشا 5 مىڭ تۇك ءشوپ جيناۋ تۋرالى تاپسىرما بەرىلەدى ەكەن. جينالعان مال ازىعى قوردا ساقتالادى. قانداي دا ءبىر ماسەلە تۋىنداسا نەمەسە بەلگىلى ءبىر شارۋا قوجالىق جيناعان جەمشوپ ورتەنىپ كەتسە, مۇقتاج ازاماتقا بىردەن قورداعى مال ازىعى بەرىلەدى.
قىستىڭ قامىن جاز ويلايتىن شارۋا قوجالىق باسشىلارى كۇرەڭ كۇز تۇسكەنشە قاجەتتى مال ازىعىن جيناپ الاتىندىعىنا بەك سەنىمدى. وعان مۇمكىندىك مول دەگەندى دە العا تارتىپ وتىر.
جامبىل وبلىسى
