اريزونا ۋنيۆەرسيتەتىنىڭ ستۋدەنتتەرىنە ارنالعان وقۋ باعدارلاماسىن ەۋرازيا ۋنيۆەرسيتەتىنىڭ وقىتۋشىلارى ازىرلەگەن. مازمۇندى وقىتۋ ادىستەمەسى تەك اكادەميالىق جۇكتەمەنى عانا ەمەس, سونداي-اق ۇلتتىق مادەنيەتتى زەردەلەۋگە ارنالعان اۋديتوريادان تىس ساباقتاردى دا قامتيدى. سونىمەن قاتار اتالعان جوعارى وقۋ ورنىنىڭ وقىتۋشىلارى مەن ەرىكتىلەرى شەتەلدىك مەيماندارعا استانا مەن اقمولا وبلىسىنىڭ تابيعاتىمەن, كوركەم جەرلەرىمەن تانىستىرىپ, ەكسكۋرسيا ۇيىمداستىرادى.
شەتەلدىكتەرگە ارنالعان كۋرستىڭ وقىتۋشىسى ايجان مايبالاەۆا اقش-تان كەلگەن ستۋدەنتتەر ۇلتتىق مادەنيەتىمىز بەن سالت-داستۇرىمىزگە ەرەكشە قىزىعۋشىلىق تانىتىپ وتىرعانىن اتاپ ءوتتى. شەتەلدىك مەيمانداردىڭ سۇرانىسىنا سايكەس وقۋ مازمۇنى ەلتانۋعا باعىتتالعان.
– سونداي-اق ستۋدەنتتەر قازاق ءتىلىن ۇيرەنۋگە ىنتا ءبىلدىرىپ, قوسىمشا ساباق وتكىزۋدى سۇرادى. ءبىز قوناقتارىمىزعا كۇندەلىكتى قارىم-قاتىناسقا قاجەتتى قازاق تىلىندەگى سوزدەر مەن ءسوز تىركەستەرىن ۇيرەتەمىز. سونىمەن بىرگە شەتەلدىك ستۋدەنتتەردى قازاق ءتىلىنىڭ ەرەكشە دىبىستارىمەن تانىستىرۋدى باستاپ, ەڭ قاجەتتى مينيمالدى لەكسيكانى مەڭگەرۋگە كومەكتەسەمىز. وقۋ ماتەريالدارىندا حالقىمىزدىڭ تىنىس-تىرشىلىگى مەن ەلىمىزدىڭ الەۋمەتتىك جانە مادەني دامۋى تۋرالى مالىمەت مولىراق, – دەدى عالىم.
اريزونا ۋنيۆەرسيتەتىنىڭ ستۋدەنتى مەيسون مولتبي ءبىزدىڭ ەلگە بۇعان دەيىن دە ات ءىزىن سالىپ, اباي اتامىزدىڭ شىعارماسىمەن تانىسىپ ۇلگەرگەن ەكەن.
– قازاقستانعا كەلۋگە كوپتەن بەرى قىزىعىپ ءجۇردىم. پروفەسسورىم ماعان وسىندا بارۋدى ۇسىندى. ءبىر جاعىنان, قازاق مادەنيەتىمەن, داستۇرىمەن جاقىن تانىسسام دەپ ويلادىم. اقش-تا ورىس ءتىلى مەن شىعارماشىلىق جازۋ جانە ءدىنتانۋ ءپانىن وقيمىن. بولاشاقتا اۋدارماشى بولعىم كەلەدى. اسىرەسە ورتا ازيا مەن قازاقستان قالامگەرلەرىنىڭ ادەبي شىعارمالارىن اۋدارسام دەيمىن. ابايدى ءبىراز وقىپ, ەرەكشە اسەر الدىم. ەندى قازاق اقىندارىنىڭ جىر جيناقتارىن كوبىرەك وقۋدى جوسپارلاپ وتىرمىن. ەۋرازيا ۋنيۆەرسيتەتىنىڭ كامپۋستارى ەرەكشە ۇنادى. ءبىزدىڭ ۋنيۆەرسيتەتتە سىزدەردەگى سەكىلدى يوگا, گيمناستيكا جانە ۇستەل تەننيسىنە ارنالعان زالدار جوق, – دەدى امەريكالىق ستۋدەنت.
جازعى مەكتەپ جۇمىسىنىڭ قورىتىندىسىندا شەتەلدىك ستۋدەنتتەرگە تىلدىك كۋرستى اياقتاۋ تۋرالى سەرتيفيكات تابىس ەتىلەدى.
