تالانتتى جاس ەكى جىلعا جۋىق ۋاقىتتان بەرى مۋزىكامەن اينالىسادى. قولى بوس ۋاقىتىندا ءان ءماتىنىن جازادى. ول ءوزىنىڭ «ار-ۇجدان» اتتى العاشقى مۋزىكالىق كومپوزيتسياسىن رەپ ستيلىندە شىعارىپ, ونىڭ سنيپپەتىن ۇسىندى. ونى تۇلەكتەردىڭ ەڭ اۋقىمدى «ENU family day» كەزدەسۋىندە ورىندادى. مۋزىكالىق تۋىندىنى بۇگىندە ءارتۇرلى ستريمينگ سەرۆيستەرى ارقىلى تىڭداۋعا بولادى.
«كومپوزيتسيامنىڭ ەكىنشى بولىمىندە وزىمە كومەكتەسەتىن قاعيدالار تۋرالى ايتامىن. ولاردىڭ ىشىندەگى ەڭ ماڭىزدىسى – ار-ۇجدان. ءوز باسىم, وقۋعا نەمەسە كەز كەلگەن ىسكە ادالدىق تۇرعىسىنان قارايمىن. بۇل ماعان وزىمە عانا ەمەس, باسقالارعا دا ادال بولۋعا ۇندەيدى. ۇلكەن قۇرمەت, كىشىگە ىزەت كورسەتۋ – ادەپتىلىك. ءبىز كەيدە وسى قاراپايىم ەرەجەنى ۇمىتىپ كەتەمىز. ال انگە كەلسەك, ونىڭ ءماتىنىن ەكى ساعات ىشىندە جازىپ, وعان لايىقتى بي ويلاپ تاپتىم. شىعارمانىڭ العاشقى نۇسقاسىن تانىستارىم تىڭداپ, ولاردىڭ كوڭىلىنەن شىقتى», دەيدى ول.
دارىندى ستۋدەنت مۋزىكامەن اينالىسىپ قانا قويماي, بيزنەس يدەيالارىن جۇزەگە اسىرۋعا تىرىسادى. وسى باعىتتاعى ەڭبەگى دە ەش كەتكەن جوق. ەۋرازيا ۋنيۆەرسيتەتىنىڭ بيزنەس-ينكۋباتورى ۇيىمداستىرعان ستارتاپ-جوبالار بايقاۋىندا ەكىنشى ورىنعا يە بولعان. بۇگىندە ول شىعارماشىلىق قابىلەتىن ودان ءارى شىڭداپ, ەندى جارىققا شىعاتىن بىرنەشە ءان ءماتىنىن جازىپ ۇلگەرگەن.
