قالا اكىمدىگى الەۋمەتتىك جوبا اياسىندا استاناعا 1000 وقۋشى كەلەتىنىن حابارلادى. بۇل تىزىمگە از قامتىلعان, كوپبالالى وتباسىندا تاربيە كورگەن جاسوسپىرىمدەر, جەتىم, اتا-اناسىنىڭ قامقورلىعىنسىز قالعان جانە ەرەكشە قابىلەتتى ءارى ۇلگەرىمى دە جاقسى بالالار ەنگەن. قوناقتاردى قالا اكىمدىگىنىڭ ماماندارى كۇتىپ الىپ, ساپاردىڭ ءساتتى ءوتۋىن قاداعالايدى. جوبانىڭ باعدارلاماسىنا ساي ءار ءۇش كۇن سايىن وڭىرلەردەن جوسپارلى تۇردە 10-14 جاستاعى 50 بالا كەلەدى.
الەۋمەتتىك تۋردىڭ العاشقى كۇنىندە قالا اكىمدىگىنىڭ ماماندارى اباي وبلىسىنان كەلگەن قوناقتاردى «بايتەرەك» مونۋمەنتىنىڭ ماڭىندا قارسى الىپ, ءسات-ساپار تىلەدى. كوپشىلىكتىڭ ورتاسىندا استانا قالاسى ينۆەستيتسيا جانە كاسىپكەرلىكتى دامىتۋ باسقارماسى ءتۋريزمدى دامىتۋ ءبولىمىنىڭ باسشىسى ومىرزاق تىلەۋجان كەلەشەكتە الەۋمەتتىك تۋردى ءداستۇرلى تۇردە ۇيىمداستىرۋعا بولاتىنىن ايتتى.
– الەۋمەتتىك تۋردا ەلىمىزدىڭ بارلىق وبلىسىنان, رەسپۋبليكالىق ماڭىزى بار قالالاردان 1000 وقۋشىنى قامتۋدى جوسپارلاپ وتىرمىز. ولار ءۇش كۇندە الدىن الا ازىرلەگەن ەكسكۋرسيالىق باعدارلاما بويىنشا استانانىڭ تۋريستىك, الەۋمەتتىك-مادەني نىساندارىن ارالايدى. الەۋمەتتىك جوبانىڭ نەگىزگى ماقساتى – جاسوسپىرىمدەرگە ەلوردانى كورسەتىپ, تاريحىن تانىتۋ. ءبىز كەلەشەكتە وسى الەۋمەتتىك تۋردى ءداستۇرلى تۇردە ۇيىمداستىرۋدى جوسپارلاپ وتىرمىز. سول ءۇشىن دە كەيىن قانداي دا ءبىر ەسكەرتۋ, ۇسىنىستار بولسا, رەتتەۋگە نيەتتەمىز.
اباي وبلىسى, اياگوز اۋدانى, قوساعاش اۋىلى, ش.ءۋاليحانوۆ اتىنداعى مەكتەپتىڭ وقۋشىسى قۋانىش سەمبەكوۆ الەۋمەتتىك تۋردا استانانى ارالاۋمەن شەكتەلمەي, جاڭا دوستار تاپقانىنا قۋانعانىن جاسىرمادى.
– استاناعا بۇعان دەيىن دە كەلگەنمىن. بىراق مەن بارماعان, كورمەگەن نىساندار بار ەكەن. بايقاعانىم, ەلوردادا جاڭا عيماراتتار سالىنىپ, جىلدان-جىلعا كوركەيىپ جاتىر. مەنىمەن بىرگە اباي وبلىسىنان كەلگەن قاتارلاستارىمنىڭ اراسىندا بۇرىن-سوڭدى ەلورداعا ساپارلاماعاندار بارىن ءبىلدىم. ولارعا ەلوردا تۋرالى كورگەن-بىلگەنىمدى ايتتىم. بۇگىن تاڭەرتەڭ پويىزدان تۇسكەن بويدا اۋەلى قوناقۇيگە ورنالاسىپ العان سوڭ, قالانى ارالاۋعا شىقتىق. اقوردانى, جاڭادان سالىنعان مەشىتتى كورىپ, «بايتەرەككە» كەلىپ وتىرمىز. استاناداعى ءۇش كۇن مەنىڭ جانە دوستارىمنىڭ جادىندا قالاتىن تاريحي ءسات دەپ ويلايمىن. سەبەبى بيىل ەلدىگىمىزدىڭ سيمۆولى – ەلوردامىزعا 25 جىل. ءوزىم شاحمات, دومبىرا ۇيىرمەلەرىنە قاتىسىپ ءجۇرمىن. رەسپۋبليكالىق ونەر بايقاۋلارىندا توپ جاردىم. مەنىمەن قەلگەن دوستارىم دا ونەرلى ءارى ءبىلىمدى ەكەن. ولاردىڭ ىشىندە قازىردەن استانادا ءبىلىم الۋدى ارمانداپ جۇرگەن دوستارىم بار, – دەيدى قۋانىش.
وسىلايشا, الەۋمەتتىك تۋرمەن استاناعا ساپارلاعان بالالار كەستە بويىنشا «استانا-بايتەرەك» مونۋمەنتىنەن باستاپ, «نۇر الەم», قازاقستان رەسپۋبليكاسىنىڭ ۇلتتىق مۋزەيى سىندى وزگە دە نىساندارعا بارادى. سونىمەن قاتار, بالالارعا ارنالعان ساۋىقتىرۋ ورىندارىن ارالايدى.
