«تۋعان ەلگە ساياحات» جوباسىنا 200 بالا قاتىستى. ءبىرىنشى كەزەڭ قاتىسۋشىلارى ساياحاتتان ەرەكشە اسەر العان.
«بالالاردىڭ ساپاردان كوزدەرى جانىپ, زور شابىتپەن, ىنتا-جىگەرمەن كەلگەنى بايقالىپ تۇر جانە بۇل جوباعا بەرىلگەن ەڭ جاقسى باعا دەسەك, ارتىق ايتقاندىق بولماس. ەڭ قىزىقتى جەرلەردى تاڭداپ, وسكەلەڭ ۇرپاققا ۇلان-بايتاق ەلىمىزدىڭ كورىكتى جەرلەرىن كورسەتۋگە تىرىستىق. جوباعا قىزىعۋشىلىق جىل سايىن ارتىپ, بالالار ونى تىپىرشي, اسىعا كۇتەتىنى سەزىلەدى», دەپ اتاپ ءوتتى «Samruk-Kazyna Trust» الەۋمەتتىك جوبالاردى دامىتۋ قورىنىڭ باس ديرەكتورى الفيا اديەۆا.
ساياحات كەرۋەنىندە ەلورداعا ءبىرىنشى رەت كەلگەندەر دە بار. ماسەلەن, «قازپوشتا» كومپانياسىنىڭ شورتاندى قالاسىنداعى بولىمشەسىندە بەس جىل جۇمىس ىستەپ كەلە جاتقان گۇلنار قۇرمەتتىڭ 11 جاسار قىزى العاش رەت تۋعان اۋىلىنان تىسقارى شىققان.
«مەنىڭ قىزىم كوڭىلدى ساپارعا اتتاناتىنا قاتتى قۋانىپ, كۇن سايىن قوڭىراۋ شالىپ وتىردىق. ءسويتىپ كۇندە كورگەندەرىنىڭ ءبارىن سيپاتتاپ, ساياحاتتىڭ, جاڭا قالالار مەن دوستاردىڭ, جالپى بارلىعىنىڭ ۇنايتىنىن اڭگىمەلەدى. ومىرىندەگى ەڭ كۇشتى كانيكۋل ەكەنىن جەتكىزدى. «سامۇرىق قازىنا» قورى بالالار ءۇشىن وسىنداي كەرەمەت مۇمكىندىك سىيلاپ, ارماندارىن ورىنداعانىنا وتە ريزامىن», دەيدى گۇلنار قۇرمەت.
اسلانبەك جاناحمەتوۆ تە جوباعا قاتىسۋشىلاردىڭ قاتارىنا كىرگەنىنە باقىتتى, ونىڭ اتا-اناسى «قازاقتەلەكوم» اق-دا جۇمىس ىستەيدى.
«ماعان تۇركىستان قاتتى ۇنادى. مەن مۇندا ءبىرىنشى رەت بولدىم جانە راسىن مويىنداۋ كەرەك, سونشالىقتى كەرەمەت بولادى دەپ كۇتكەن جوقپىن. بارلىعى وتە تاماشا سالىنعان, سامساعان ساۋلەت ونەرى! ساياحات بارىسىندا جاڭا دوستار تاپتىم جانە گەوگرافيا مەن تاريح تۋرالى مولىراق بىلە ءتۇستىم. ءبىز ۇلتتىق ويىنداردى كوپ ويناپ, اعىلشىن ءتىلىن ۇيرەندىك, كۆەست ويناپ, ۋاقىتتى قىزىقتى وتكىزدىك», دەپ ءوز اسەرىن ءبولىستى ول.
جوبا اياسىنداعى كەلەسى ەكى ساپار تاعى 400 وقۋشىنى قامتيدى. يگى باستاما «سامۇرىق-قازىنا» اق كومپانيالار توبىنىڭ اتىنان «Samruk-Kazyna Trust» الەۋمەتتىك جوبالاردى دامىتۋ قورىنىڭ قارجىلىق قولداۋىمەن جانە قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ قاتىسۋىمەن, «الەۋمەتتىك جوبالار قورىمەن» ىنتىماقتاستىقتا جۇزەگە اسىرىلىپ جاتىر.
