دەپۋتاتتىڭ ايتۋىنشا, قازاقستان سوڭعى بىرنەشە جىلدا ەلدىڭ قورعانىس قابىلەتى مەن ۇلتتىق قاۋىپسىزدىگىن كۇشەيتۋ ماقساتىندا ايتارلىقتاي جۇمىس جۇرگىزدى. سونىمەن قاتار پىسىقتاۋدى جانە شەشۋدى تالاپ ەتەتىن ماسەلەلەر دە بار. كوپتەگەن مەملەكەتتىك ورگانداردا جۇمىلدىرۋ قۇرىلىمىن ءمينيستردىڭ ورىنباسارلارى, ورىنباسارلار, اپپارات باسشىلارى قاداعالايدى. الايدا, جۇمىلدىرۋ دايىندىعى تۋرالى زاڭعا سايكەس مۇنداي بولىمشەلەر مەملەكەتتىك ورگاننىڭ ءبىرىنشى باسشىسىنا تىكەلەي باعىنۋعا ءتيىس. سونىمەن قاتار بۇل سالادا بىلىكتى مامانداردىڭ مۇلدەم جەتىسپەيتىنى انىقتالدى.
«جۇمىلدىرۋ جوسپارىندا مەملەكەتتىك ورگاندارعا بەرىلەتىن جۇمىلدىرۋ مىندەتى مەن جۇمىلدىرۋ تاپسىرىسى بەلگىلەنگەن. الايدا, ولاردا وندىرىستىك, قارجىلاي, قويما مۇمكىندىكتەرى ءاردايىم بولا بەرمەيدى. سوندىقتان جوسپار جاساۋدان بۇرىن ۇيىمنىڭ ماتەريالدىق-تەحنيكالىق جانە قارجىلاي مۇمكىندىكتەرىنە تالداۋ جاساۋ قاجەت. مەملەكەتتىك ورگاندار مەمماترەزەرۆتىڭ ماتەريالدىق قۇندىلىقتارىن ساقتاۋ نومەنكلاتۋراسى مەن كولەمىن قالىپتاستىرۋعا مۇددەلى ەمەس. سوندىقتان ولار قاجەتتىلىكتەردىڭ اۋقىمدى ءتىزىمىن بەرەدى. ونى جۇمىلدىرۋ رەزەرۆىنە تولىق ەنگىزۋ مۇمكىن ەمەس. توتەنشە جاعدايلار مينيسترلىگى ءۇشىن بولىنەتىن ليميتتەر مەن بيۋدجەت قارجىسى جۇمىلدىرۋ رەزەرۆىن قامتاماسىز ەتۋدىڭ قاجەتتى دەڭگەيىنە جەتپەيدى. سوندىقتان جۇمىلدىرۋ رەزەرۆىنە ماتەريالدىق قۇندىلىقتاردى ساتىپ الۋدىڭ باسىمدىعى كۇشىن جويادى جانە رەزەرۆتى جيناقتاۋدىڭ جالپى پايىزى بەلگىلەنگەن كولەمگە جەتپەيدى», دەدى جاننا اسانوۆا.
سەناتور وسىعان بايلانىستى جۇمىلدىرۋ رەزەرۆىنىڭ ماتەريالدىق قۇندىلىقتارىن قالىپتاستىرۋ, ساقتاۋ جونىندەگى فۋنكتسيالاردى مەملەكەتتىك ورگاندارعا بەرۋدى ۇسىندى. سونداي-اق ءاربىر مەملەكەتتىك ورگانعا جۇمىلدىرۋ تاپسىرىسىن ورىنداۋ ءۇشىن قاجەتتى تاۋارلاردىڭ اتاۋى مەن كولەمىن ايقىنداۋ جونىندەگى ەسەپتەۋ نورماتيۆتەرىن ازىرلەۋ جانە بەكىتۋ قۇزىرەتتەرى بەكىتىلۋى ءتيىس ەكەنىن جەتكىزدى.
