27 ماۋسىمدا قر پرەزيدەنتىنىڭ جانىنداعى مەملەكەتتىك باسقارۋ اكادەمياسىندا جتن BR18574203 «مەملەكەتتىك قىزمەتتى دامىتۋ پروتسەستەرىن عىلىمي-ادىسنامالىق نەگىزدەۋ جانە جاڭا قازاقستاندى قۇرۋ اياسىندا مەملەكەتتىك ورگانداردىڭ قىزمەتىن ترانسفورماتسيالاۋ» باعدارلاماسىن ىسكە اسىرۋ اياسىندا دوڭگەلەك ۇستەل ءوتتى. شاراعا ورتالىق مەملەكەتتىك ورگاندار مەن جەرگىلىكتى اتقارۋشى ورگانداردىڭ, ۇەۇ-ءنىڭ وكىلدەرى, مەملەكەتتىك باسقارۋ سالاسىنداعى ساراپشىلار قاتىستى.
اكادەميا رەكتورى ەرلان ءابىلدىڭ ايتۋىنشا, دوڭگەلەك ۇستەل قازاقستان رەسپۋبليكاسىنىڭ مەملەكەتتىك قىزمەتىن دامىتۋ تاسىلدەرىن تالقىلاۋ جانە مەملەكەتتىك ورگاندارعا اناليتيكالىق جازبالار دايىنداۋ ماقساتىندا ۇيىمداستىرىلعان.
ءىس-شارادا زەرتتەۋ توبىنىڭ مۇشەسى, مەملەكەتتىك جانە جەرگىلىكتى باسقارۋ سالاسىنداعى PhD, SPHRi ايگەرىم اميروۆا مەملەكەتتىك قىزمەت جۇيەسىن جەتىلدىرۋ جانە مەملەكەتتىك ورگاندار جۇمىسىن ترانسفورماتسيالاۋ ۇزدىكسىز پروتسەسس ەكەنىن ەسكەردى. ونىڭ ايتۋىنشا, بەس جىل بۇرىن حالىقارالىق ۇيىمدار قازاقستاننىڭ مەملەكەتتىك قىزمەتىن كەشەندى باعالاۋدى جۇرگىزگەن. قازىر مەملەكەتتىك قىزمەت جۇيەسىن ودان ءارى دامىتۋ باعدارلارىن ايقىنداۋ ءۇشىن جۇرگىزىلگەن رەفورمالاردى ساپالى, جان-جاقتى باعالاۋ قاجەتتىلىگى تۋىنداپ وتىر.
«الەمدىك تاجىريبە بويىنشا بۇگىنگى تاڭدا مەملەكەتتىك سەكتوردى دامىتۋدىڭ ءۇش نەگىزگى باعىتى بار. مەملەكەتتىك قىزمەت حالىق اراسىندا تارتىمدى بولۋى ءۇشىن تالانتتاردى باسقارۋ, ىرىكتەۋ راسىمدەرىنىڭ اشىقتىعىن قامتاماسىز ەتۋ, ىشكى كورپوراتيۆتىك مادەنيەت بويىنشا جۇمىستار جۇيەلى تۇردە جۇرگىزىلىپ جاتىر. ەكىنشى باعىت – مەملەكەتتىك اپپاراتتىڭ ماتريتسالىق (يكەمدى) قۇرىلىمدارى. وعان جوبالىق باسقارۋ, ستراتەگيالىق HR مەنەدجمەنت, مەملەكەتتىك قىزمەت سالاسىنداعى ۋاكىلەتتى ورگاننىڭ مەملەكەتتىك ورگانداردىڭ قىزمەتىن ترانسفورماتسيالاۋ جانە يننوۆاتسيالىق شەشىمدەردى ەنگىزۋ ماسەلەلەرىندەگى پرواكتيۆتى ءرولىن جاتقىزۋعا بولادى. ءۇشىنشى باعىت – تسيفرلاندىرۋعا, ونىڭ ىشىندە جاساندى ينتەللەكت مۇمكىندىكتەرىن پايدالانۋعا نەگىزدەلگەن «كورىنبەيتىن بەلسەندى مەملەكەتتىك باسقارۋ», دەدى ول.
زەرتتەۋ توبىنىڭ جەتەكشىسى, PhD دوكتورى, اكادەميا پروفەسسورى باۋىرجان بوقاەۆ دوڭگەلەك ۇستەل اياسىندا بىرقاتار الەۋمەتتىك, ستاتيستيكالىق جانە ەكونوميكالىق تالداۋ قۇرالدارىن قولدانا وتىرىپ, قر مەملەكەتتىك قىزمەتىنىڭ جاي-كۇيىنە كەشەندى زەرتتەۋ جۇرگىزىلگەنىن اتاپ ءوتتى. ونىڭ ايتۋىنشا, مەملەكەتتىك قىزمەتتى رەفورمالاۋدى جانە ولاردىڭ قازاقستاندىق قوعامداعى الەۋمەتتىك مارتەبەسىن قابىلداۋ بويىنشا 11 مىڭنان استام مەملەكەتتىك قىزمەتشىنىڭ اراسىندا جۇرگىزىلگەن ساۋالناما ناتيجەسى مەملەكەتتىك قىزمەتتەگى جۇمىستىڭ نەگىزگى سەبەبى «ەلىنە پايداسىن تيگىزۋ» ەكەنىن كورسەتكەن. الەۋمەتتىك ساۋالناماعا سايكەس, مەملەكەتتىك قىزمەتشىلەردىڭ 42%-ى مەملەكەتتىك قىزمەتتە جۇمىس ىستەۋدىڭ نەگىزگى فاكتورىن اتاپ ءوتتى, 26%-ى «قارجىلىق تۇراقتىلىقتى» جانە 14%-ى «كاسىبي تاجىريبە جيناۋدى» مەملەكەتتىك قىزمەتتە جۇمىس ىستەۋدىڭ ماڭىزدى سەبەپتەرى رەتىندە اتاپ وتكەن.
سونىمەن قاتار مەملەكەتتىك باسقارۋ اكادەمياسى قولدانبالى زەرتتەۋلەر ينستيتۋتىنىڭ باس عىلىمي قىزمەتكەرى داستان كوشەرباەۆ دوڭگەلەك ۇستەل بارىسىندا «مەملەكەتتىك ورگانداردىڭ قىزمەتىنە الەۋمەتتىك (قوعامدىق) باقىلاۋدىڭ تيىمدىلىگى: باعالاۋ كريتەريلەرىن تاڭداۋ تۋرالى ماسەلەلەر» تاقىرىبىندا بايانداما جاسادى. ساياساتتانۋ عىلىمدارىنىڭ كانديداتى قوعامدىق كەڭەس قىزمەتى قوعامدا جانە شەشىم قابىلداۋ پروتسەسىندە حالىق اراسىندا مەملەكەتتىك ورگاندارعا دەگەن سەنىمنىڭ وسۋىنە ىقپال ەتەتىنىن ەسكەردى.
ساراپشىلاردىڭ ويىنشا, مەملەكەتتىك قىزمەتشىلەر اراسىنداعى ساۋالناما ناتيجەلەرى, سونداي-اق اكادەميالىق ورتا, ۇەۇ, كۆازيمەملەكەتتىك سەكتور ساراپشىلارىمەن سۇحبات, ەلدىك كەيستەر مەن حالىقارالىق ۇيىمداردىڭ ۇسىنىمدارىن زەردەلەي وتىرىپ, مەملەكەتتىك قىزمەتتى ودان ءارى دامىتۋدىڭ عىلىمي-دالەلدى (evidence based) باعدارلارىن ازىرلەۋگە مۇمكىندىك بەرەدى.
