بريفينگكە باس ءمۇفتي كەڭەسشىسىنەن بولەك, ۋاعىز-ناسيحات ءبولىمىنىڭ مەڭگەرۋشىسى باتىرجان مانسۇروۆ پەن «زەكەت جانە قايىرىمدىلىق» قورىنىڭ ديرەكتورى ماقساتبەك قايىرعاليەۆ قاتىسىپ, باق وكىلدەرىنىڭ سۇراقتارىنا جاۋاپ بەردى.
كەنجەتاي دۇيسەنباي قۇربان ايتتان ءبىر كۇن بۇرىن, ياعني بۇگىن – اراپا كۇنى ەكەنىن ەسكە سالدى. «حاديستەردە كەلگەندەي, ايت كۇندەرى جاسالاتىن يگى ىستەردىڭ ەڭ ابزالى – قۇربان شالۋ. حانافي ءمازھابى بويىنشا (قۇربان ايت كۇندەرى) قۇربان شالۋعا شاماسى كەلگەن داۋلەتتى (قاجەتىنەن تىس زەكەتتىڭ نيساپ مولشەرىنە جەتكەن), ازات, باليعات جاسىنا جەتكەن, اقىل-ەسى دۇرىس, قۇربان ايت ۋاقىتىندا جولاۋشى بولماعان مۇسىلمانعا – ءۋاجىپ, ياعني مىندەت. دەمەك, كۇندەلىكتى كۇنكورىسىنەن بولەك ارتىق دۇنيەسى بار مۇسىلماننىڭ قۇربان شالۋى پارىز. ەگەر ءبىر وتباسىنىڭ اسىراۋشىسى ەر ادام عانا بولسا, ونىڭ شالعان قۇرباندىعى تۇتاس وتباسىنىڭ اتىنان ەسەپتەلەدى. ال ەرىنەن بولەك ايەلىنىڭ دە تابىسى, كۇنكورىسىنەن تىس ارتىق مولشەردە دۇنيەسى بولسا, ول دا ءوز اتىنان قۇربان شالۋعا ءتيىس», دەدى ول.
ەلىمىزدە قۇربان شالۋ ءراسىمى ونلاين جانە وففلاين فورماتتا وتەدى. قازاقستان مۇسىلماندارى ءدىني باسقارماسى ەل ازاماتتارىنا, اسىرەسە قالا تۇرعىندارىنا قۇربان شالۋ ءراسىمىن قاشىقتان وتكىزۋگە ارنالعان qurban2023.kz سايتىن ىسكە قوستى. قمدب توراعاسىنىڭ كەڭەسشىسى بارشا مۇسىلمان قاۋىمىن ءمۇفتياتتىڭ «راببىڭ ءۇشىن قۇربان شال» اكتسياسىنا ۇلەس قوسىپ, ساۋاپتى ىستەردە بەلسەندى بولۋعا شاقىردى.
ء«بىز قازىر قاسيەتتى ءزۇلحيدجا ايىندا وتىرمىز. بۇل ايدا مۇسىلماندار قۇربان شالادى ءارى بەس پارىزدىڭ ءبىرى بولعان قاجىلىعىن وتەيدى. قمدب توراعاسى, باس ءمۇفتي ناۋرىزباي قاجى تاعان ۇلى, سونىمەن قاتار 4 مىڭ وتانداسىمىز قازىر قاسيەتتى مەككەدە. قاجىلارىمىزدىڭ نيەتى مەن دۇعاسى قابىل بولىپ, ەلىمىزگە امان-ەسەن ورالۋىن تىلەيمىز. اللا تاعالا ەلىمىز بەن جەرىمىزگە بەرەكەسىن جاۋدىرىپ, شالعان قۇرباندىقتارىمىزدى, بەرگەن ساداقالارىمىزدى ايت كۇندەرى امالعا اسىرعان ءاربىر يگى ىستەرىمىزدى قابىل ەتكەي!» دەپ تۇيىندەدى ول.
