باۋىرساقتى برەند ەتۋدى, ۇلتتىق قۇندىلىقتارىمىزدى دارىپتەۋدى ماقسات تۇتقان «Bauyrsaq day» مەرەكەسىنە جاڭا رەكوردتى تىركەۋگە «قازاقستان رەكوردتار كىتابىنىڭ» رەسمي وكىلى باقىتجان ءسابيت ۇلى ارنايى كەلدى.
ءبىر جاعىنان وسىناۋ ءىس-شارا – وتباسى ينستيتۋتىن دامىتۋدى, دەمالىس كۇندەرىن ءماندى ەتۋدى دە كوزدەيدى.
باۋىرساق ءپىسىرۋ ءۇشىن 1600 كيلو ۇن جۇمسالىپ, 5 قازان كوتەرىلگەن مەرەكەگە الماتىنىڭ ەڭ مىقتى دەگەن 40 اسپازى جينالدى.
«رەكورد جاڭارتقان وسىناۋ ءىس-شارا العاش رەت ۇيىمداستىرىلدى. باۋىرساق ءپىسىرۋ ءتۇس كەزىندە باستالىپ, ىستىق باۋىرساقتاردى ولشەپ, شەتىنەن ەلگە تاراتىپ جاتىرمىز», دەيدى ۇيىمداستىرۋشىلار.
باۋىرساق دايىندالىپ جاتقاندا بالالار دا زەرىكپەدى. ارنايى جوسپارلانعان كوڭىلدى باعدارلامالارعا قاتىسىپ, ءارتۇرلى كەيىپتەگى انيماتورلارمەن وينادى. بەتىنە, قولىنا ارنايى مامانداردىڭ كومەگىمەن سۋرەت سالدىرىپ, ەستەلىك سۋرەتتەرگە ءتۇسىپ جاتتى.
«قازاقستان رەكوردتار كىتابىنىڭ» رەسمي وكىلى باقىتجان تاستۇبەكوۆ الداعى ۋاقىتتا مۇنداي ءىس-شارالاردىڭ ءجيى بولىپ تۇراتىنىن ايتتى. بۇعان دەيىن 2017 جىلى تالدىقورعان قالاسىنىڭ كۇنىنە وراي وسىنداي ءىس-شارا ۇيىمداستىرىلعان. وندا رەكورد 2000 كيلو بولعان.
«نان بولسا, ءان دە بولادى» دەمەكشى, قالا تۇرعىندارى مەن قوناقتارىنا ارنالعان كونتسەرتتى ءالي وقاپوۆ باستاپ بەردى. بالاقايلار دا ونەر كورسەتتى. كونتسەرتتى «ۇركەر» توبى ۇلتتىق ناقىشتاعى اندەرىمەن مەرەكەنى كەشكى مارەگە جەتكىزدى.
كەشكى ساعات 20:30 شاماسىندا باۋىرساقتار تولىعىمەن ءپىسىرىلدى. ۇيىمداستىرۋشىلار 2023 كيلو باۋىرساق ءپىسىرۋدى جوسپارلاعان, كەيىننەن سالماعى 2047 كيلوعا جەتكەن سوڭ, رەكورد جاڭارتىلدى. 7 ساعاتتان اسا جۇمىس جاساعان اسپازداردىڭ ماقساتى ورىندالدى.
باقىتجان ءسابيت ۇلى قازاقستان رەكوردتار كىتابىنىڭ رەسمي وكىلى رەتىندە, 2047 كيلو باۋىرساق ءپىسىرىلىپ, جاڭا رەكورد تىركەلگەنىن راستاي وتىرىپ, ۇيىمداستىرۋشىلارعا كۋالىك تاپسىردى.
قالالىقتار باۋىرساقتىڭ ءدامدى بولعانىن, بالا-شاعامەن بىرگە دەمالىپ, وتباسىلىق جىلى وقيعا بولعانىن ايتىپ, ۇيىمداستىرۋشىلار مەن اسپازدارعا العىسىن ءبىلدىردى. ۇلتتىق قۇندىلىقتاردى, ۇلتتىق تاعامدارىمىزدى دارىپتەيتىن ءىس-شارالاردىڭ اراعا جىل سالىپ ەمەس, مەرەكە سايىن جالعاسىپ تۇرۋىن تىلەدى.
ءمادينا قالي,
ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتى
الماتى
