سۋرەتتى تۇسىرگەن ەرلان ومار, «EQ»
شارۋانىڭ شىعىنى شاش-ەتەكتەن. القاپتاعى ءداننىڭ ساباعىن سانسىز تۇياق ءبىر تاپتاپ وتسە, تۇمەن-تۇمەن كيىكتى قايتارماق بولىپ اۋرەگە تۇسكەن شارۋانىڭ ءوزى كولىگىمەن ەكى تاپتاپ كەتىپ جاتىر.
– تاياۋدا عانا قارامەڭدى اۋىلىنىڭ ماڭىندا بىرنەشە كۇن بويى ەكى كولىككە مىنگەسكەن التى ينسپەكتور ءجۇردى. قازىر ولار بۋرەۆەستنيك جاققا كەتتى. جانۋارلاردى قورعاۋ ينسپەكتورلارى ءبىزدىڭ القاپتارمەن شەكتەسىپ جاتقان ويدا 30 مىڭ باستان اساتىن كيىك جۇرگەنىن ايتتى. شىنىن ايتساق, كۇندىز كۇلكىدەن, تۇندە ۇيقىدان ايىرىلدىق. القاپتى كۇن سايىن ءتورت كولىكپەن كۇزەتىپ ءجۇرمىز. تاڭعى ساعات ءتورت جارىم-بەستەن باستايمىز دا كەشكى ساعات ون ءبىر-ون ەكىگە دەيىن, قاراڭعى تۇسكەنشە جۇرەمىز. تاڭەرتەڭ قايتا ورالعانشا قاپتاعان كيىك ەگىننىڭ شەتىن جەپ قويىپ جاتىر. ال القاپتى باسىپ-جانشىپ, جايپاپ كەتكەنىن ەسەپتەپ, ونىڭ شىعىنىن شىعارا المايمىز عوي. ءار القاپتا مىڭداپ ءورىپ ءجۇر, – دەيدى شارۋالاردىڭ ءبىرى.
وسىلايشا, ديقاندار بەتىمەن جايىلعان كيىكتىڭ ءۇيىرلى شەگىرتكەدەي قاپتاپ كەلىپ, ەگىنگە وراسان زيان تيگىزىپ جاتقانىن ايتادى. قازىرشە ونى باقىلاپ جاتقان ەشكىم جوق. جانۋارلاردى قورعايتىن ينسپەكتورلاردىڭ جۇمىسى كيىكتى سۇر مەرگەننىڭ سۇق مىلتىعىنان قورعاۋمەن جانە ساناق الۋمەن عانا شەكتەلەدى. ولار شارۋالاردىڭ ماسەلەسىنە باس قاتىرمايدى.
كيىك تاپتاپ كەتىپ جاتقان ەگىن القاپتارىنىڭ ءبارى ناۋىرزىم مەملەكەتتىك تابيعي قورىعىنىڭ ماڭايىندا.
– ءبىز قورىق اۋماعىندا جۇرگەن كيىكتەردى عانا باقىلايمىز. قورىقتان تىس جەردە جۇرگەن كيىكتەرگە جاۋاپ بەرمەيمىز. قازىر كيىكتىڭ ناقتى سانىن ايتا المايمىن. ويتكەنى ەرتە كوكتەمدە جۇرگىزىلگەن ساناق ناتيجەلەرى قايتا وڭدەلىپ جاتىر, – دەيدى «ناۋىرزىم» قورىعى ديرەكتورىنىڭ ورىنباسارى ەلامان كۇمىسبەكوۆ.
قوستاناي وبلىسى
