بىلتىر مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا فۋتبول كلۋبتارىن جەكەشەلەندىرۋ ماسەلەسىن كوتەرگەن ەدى. وسى تاپسىرمادان كەيىن ەلدەگى بىرقاتار كلۋب جەكە ينۆەستورلاردىڭ باسقارۋىنا كوشتى. سولاردىڭ ءبىرى – «Integra Construction KZ» كومپانياسىنىڭ قاراماعىنا وتكەن شىمكەنتتىڭ «ورداباسى» فۋتبول كلۋبى.
بۇگىندە كلۋبتا جۇيەلى وزگەرىستەر قولعا الىنعان. تولىققاندى رەبرەندينگ جۇرگىزىلىپ, كوماندانىڭ ماركەتينگتىك, مەديا ساياساتى جاڭارتىلىپ جاتىر. كلۋب ءيميدجىن ارتتىرۋ ماقساتىندا دەمەۋشىلەر تارتىلىپ, تانىمال ونەر, سپورت شەبەرلەرى امباسسادور رەتىندە جۇمىلدىرىلعان. بۇل وتاندىق فۋتبولداعى جاڭا باسقارۋ مادەنيەتىنىڭ قالىپتاسىپ كەلە جاتقانىن اڭعارتادى.
8-تۋر اياسىنداعى ورتالىق كەزدەسۋلەردىڭ ءبىرى شىمكەنتتە ءوتتى. «ورداباسى» ءوز الاڭىندا ەل چەمپيوناتىنىڭ بىرنەشە دۇركىن جەڭىمپازى «اقتوبە» كلۋبىن قابىلدادى. 20 مىڭعا جۋىق جانكۇيەر جينالعان تارتىستى ويىندا الاڭ يەلەرى العاشقى مينۋتتاردان بەلسەندىلىك تانىتتى.
كەزدەسۋدىڭ ەكىنشى مينۋتىندا ەلحان استانوۆ ەسەپ اشىپ, شىمكەنتتىكتەردى العا شىعاردى. مولدوۆالىق مامان اندرەي مارتەن شاكىرتتەرى ءبىرىنشى تايمدا شابۋىلدى ۇدەتىپ, قارسىلاس قاقپاسىنا بىرنەشە قاۋىپتى سوققى باعىتتادى.
ءوز كەزەگىندە, قۇرامىندا لۋيش ناني سىندى تاجىريبەلى فۋتبولشى ونەر كورسەتەتىن «اقتوبە» دە قاراپ قالمادى. الايدا العاشقى تايمدا جاسالعان التى سوققىنىڭ ەشقايسىسى نىساناعا ءدال تيمەدى.
ەكىنشى تايمدا قوناقتار ويىندى ءوز باقىلاۋىنا الۋعا تىرىستى. دوپتى يەلەنۋ كورسەتكىشى 62%-عا جەتكەنىمەن, ستەفان تاركوۆيچ جاتتىقتىراتىن ۇجىم شابۋىلدا وتكىرلىك تانىتا المادى. اقتوبەلىكتەر نەبارى ءبىر عانا ءدال سوققى جاساي الدى.
كەرىسىنشە, دوپتى از يەلەنگەن «ورداباسى» شابۋىلدا اناعۇرلىم ناتيجەلى بولدى. الەكساندر زارۋتسكي قورعاعان قاقپاعا 11 سوققى جاساپ, سونىڭ ءبىرىن گولعا اينالدىردى. ويىننىڭ 90-مينۋتىندا الاڭعا قوسالقى قۇرامنان شىققان ءامىر جاسۇلان ۆلاديسلاۆ ناۋمەتستىڭ ءدال پاسىن باسپەن قاقپا تورىنا توعىتىپ, ماتچ تاعدىرىن تۇبەگەيلى شەشتى.
وسىلايشا, 2:0 ەسەبىمەن جەڭىسكە جەتكەن شىمكەنتتىك كوماندا 18 ۇپاي جيناپ, «قايراتپەن» بىرگە تۋرنير كەستەسىنىڭ كوش باسىنا شىقتى. بۇل جەڭىس «ورداباسىنىڭ» بيىلعى ماۋسىمدا چەمپيوندىققا شىن مانىندە ۇمىتكەر ەكەنىن كورسەتتى.
تۋردىڭ وزگە كەزدەسۋلەرىندە مىناداي ناتيجەلەر تىركەلدى: «كاسپي» – «استانا» – 1:0, «جەڭىس» – «توبىل» – 1:0, «اتىراۋ» – «التاي» – 1:0, « ۇلىتاۋ» – «ەلىماي» – 1:0, «قايسار» – «جەتىسۋ» – 1:1, «ەرتىس» – «قايرات» – 0:1, «قىزىلجار» – «وقجەتپەس» – 0:1.
8-تۋر قورىتىندىسى كورسەتكەندەي, بيىلعى چەمپيوناتتا باسەكە كۇشەيىپ, ءار ۇپاي ءۇشىن تارتىس قىزا تۇسكەن. ال «ورداباسىنىڭ» سەنىمدى ويىنى مەن جاڭا باسقارۋ جۇيەسى كوماندانىڭ ۇزاقمەرزىمدى تابىسقا باعىت العانىن اڭعارتادى.
استانا – شىمكەنت – استانا
