پالاتا توراعاسى مەملەكەت باسشىسى قاسىم-جومارت توقاەۆتىڭ تاپسىرماسى بويىنشا قۇرىلعان كوميسسيانىڭ جۇمىسى قازاقستاننىڭ ورنىقتى دامۋ ماقساتتارىنا قول جەتكىزۋىنە جانە ولاردى ىسكە اسىرۋداعى تيىمدىلىك پەن اشىقتىقتى قامتاماسىز ەتۋگە باعىتتالعانىن اتاپ ءوتتى.
«پرەزيدەنتىمىز قاسىم-جومارت كەمەل ۇلى توقاەۆ 2019 جىلى بىرىككەن ۇلتتار ۇيىمىنىڭ ورنىقتى دامۋ ماسەلەلەرى جونىندەگى فورۋمىندا سويلەگەن سوزىندە ورنىقتى دامۋ ماقساتتارى بويىنشا كوزدەگەن ناتيجەلەرگە قول جەتكىزۋ ءۇشىن شەشۋشى شارالار قابىلداۋ قاجەتتىگىن ايتتى. سوڭعى جىلدارى ەلىمىزدە بۇل باعىتتا كەيبىر وڭ وزگەرىستەر بايقالادى. دەگەنمەن, ورنىقتى دامۋ ماقساتتارىنىڭ الەمدىك پروگرەسس رەيتينگىندە قازاقستاننىڭ پوزيتسياسى تومەندەپ وتىر. جاقىندا بىرىككەن ۇلتتار ۇيىمى جاڭا بايانداما جاريالادى. سوعان سايكەس ءبىز شامامەن 2020 جىلعى دەڭگەيگە دەيىن تومەندەدىك. بۇل ەلىمىزدە ورنىقتى دامۋ سالاسى بويىنشا ەرەكشە نازار اۋدارۋدى قاجەت ەتەتىن سالالار بار ەكەنىن كورسەتەدى», دەدى ماۋلەن اشىمباەۆ.
وتىرىس بارىسىندا سەنات توراعاسى كوميسسيانىڭ مىندەتتەرىنە بيۋدجەتتىك پارامەترلەردى قاراۋ جانە باقىلاۋ دا جاتاتىنىنا نازار اۋداردى. ول الداعى كۇزدە پارلامەنتتە جاڭا بيۋدجەت كودەكسى قارالاتىنىن, سول كەزدە اتالعان ماقساتتاردى ىسكە اسىرۋ جونىندەگى نەگىزگى قاعيداتتار بەلگىلەنۋى كەرەك ەكەنىن تىلگە تيەك ەتتى.
«ورنىقتى دامۋدىڭ ۇلتتىق ماقساتتارىنا ناتيجەلى قول جەتكىزۋ ءۇشىن پارلامەنت پەن ۇكىمەتتىڭ بىرلەسىپ, ءتيىمدى جۇمىس جۇرگىزۋى ماڭىزدى. ەڭ الدىمەن, ورنىقتى دامۋ ماقساتتارىنىڭ 2030 جىلعا دەيىنگى ۇلتتىق ينديكاتورلارىن ناقتىلاۋ قاجەت. قازىر ولاردىڭ كەيبىرى ءالى ايقىندالماي وتىر. بۇل نەگىزگى ماقساتقا قول جەتكىزۋگە جانە ءتيىمدى مونيتورينگ جۇرگىزۋگە كەرى اسەرىن تيگىزەدى. سونىمەن قاتار پارلامەنتتىك كوميسسيا مۇشەلەرى الداعى جىلدارى ورنىقتى دامۋ ساياساتىن ءتيىمدى ىسكە اسىرۋ ءۇشىن قاجەتتى زاڭنامالىق باستامالاردى دا كوتەرىپ, ازىرلەۋگە مۇمكىندىك بار», دەدى ماۋلەن اشىمباەۆ.
العاشقى وتىرىس كەزىندە پارلامەنتتىك كوميسسيا تۋرالى ەرەجە جانە الداعى كەزەڭگە ارنالعان جۇمىس جوسپارى بەكىتىلدى. ودان بولەك, ۇلتتىق ەكونوميكا ءمينيسترى الىبەك قۋانتىروۆ قازاقستاننىڭ ورنىقتى دامۋ سالاسىنداعى ماقساتتارى مەن مىندەتتەرىنىڭ ورىندالۋى تۋرالى بايانداما جاسادى. كۇن تارتىبىندە قارالعان ورنىقتى دامۋ ماقساتتارىن ىسكە اسىرۋ شەڭبەرىندە قورشاعان ورتانى قورعاۋ جانە ەكولوگيالىق مادەنيەت قالىپتاستىرۋ جونىندەگى كەشەندى شارالار تۋرالى ماسەلە بويىنشا ەكولوگيا جانە تابيعي رەسۋرستار ءمينيسترى ءزۇلفيا سۇلەيمەنوۆا ايتىپ بەردى.
ايتا كەتەيىك, پارلامەنتتىك كوميسسيانىڭ قۇرامى 20 ماۋسىمدا وتكەن پارلامەنت پالاتالارىنىڭ بىرلەسكەن وتىرىسىندا بەكىتىلىپ, وعان سەنات سپيكەرى ماۋلەن اشىمباەۆ توراعا بولىپ سايلاندى. كوميسسيانىڭ قۇرامىنا سەنات پەن ماجىلىستەن 9 دەپۋتات ەندى. كوميسسيا توراعاسىنىڭ ورىنباسارلارى رەتىندە سەنات ۆيتسە-سپيكەرى ولگا پەرەپەچينا مەن ءماجىلىس ۆيتسە-سپيكەرى البەرت راۋ سايلاندى. ال, سەناتور اقمارال ءالنازاروۆا كوميسسيانىڭ حاتشىسى بولىپ سايلاندى. سونداي-اق اتالعان قۇرىلىمنىڭ جۇمىسىنا مەملەكەتتىك ورگانداردىڭ, ازاماتتىق سەكتوردىڭ, عىلىمي قوعامداستىقتىڭ جانە حالىقارالىق دامۋ ينستيتۋتتارىنىڭ وكىلدەرى دە قاتىسادى.
