قازاقستاننىڭ ۇلتتىق وليمپيادا كوميتەتى ەلوردا تۇرعىندارى مەن قوناقتارىنا ارناپ سپورتتىق ءىس-شارالار ۇيىمداستىردى. اكتسيا اياسىندا ءتۇرلى ويىندار مەن ەستافەتالىق جارىستار, برەيك-دانسەرلەردىڭ قويىلىمدارى جانە ءارتۇرلى جاستاعى بالالار اراسىندا تاەكۆوندو مەن كاراتەدەن سايىستار ۇيىمداستىرىلدى.
قازاقستاننىڭ اتاقتى سپورتشىلارى - 2012 جىلى لوندونداعى ويىنداردىڭ وليمپيادا چەمپيونى – بوكسشى سەرىك ساپيەۆ, بوكستان 2016 جىلعى وليمپيادانىڭ كۇمىس جۇلدەگەرى ۆاسيلي لەۆيت, بوكستان الەم جانە ازيا چەمپيونى مەرەي اقشالوۆ جاس سپورتشىلارعا شەبەرلىك ساباقتارىن وتكىزدى.
«بارشا قازاقستاندىقتاردى حالىقارالىق وليمپيادا كۇنىمەن قۇتتىقتايمىن! مەن وسىنداي ءىس-شاراعا قاتىسىپ وتىرعانىما قۋانىشتىمىن, جاس سپورتشىلاردىڭ وليمپيادالىق سپورتقا قىزىعۋشىلىق تانىتىپ, چەمپيون بولۋعا ۇمتىلعانىن, ەلىمىزدىڭ چەمپيوندارىمەن كەزدەسكىسى كەلەتىنىن كورۋ ءبىز ءۇشىن ۇلكەن قۋانىش. مەنىڭ ويىمشا, وسكەلەڭ ۇرپاق جىل وتكەن سايىن سپورتقا بەت بۇرىپ كەلەدى, «ۇستازدان شاكىرت وزار» دەيدى ەمەس پە؟! جاس سپورتشىلاردىڭ بىزدەن وزىپ, جۇزدەن جۇيرىك اتانۋى ءۇشىن بارىمىزدى سالامىز. سپورت فەستيۆالى وتە جاقسى ءوتتى, ءوز باسىم جاعىمدى اسەر الدىم. وسى قۋانىشتى بىزبەن بولىسۋگە كەلگەندەرىڭىز ءۇشىن راحمەت. مەرەكە قۇتتى بولسىن», دەدى سەرىك ساپيەۆ.
جاس سپورتشىلار وليمپيادالىق سپورت تۇرلەرىنە ارنالعان ۆيكتوريناعا, سونداي-اق «كوڭىلدى ستارتتار» ەستافەتاسىنا قاتىستى. سونداي-اق ارقايسىسى ءوز ءبىلىمى مەن داعدىلارىن كورسەتىپ, قازاقستاننىڭ ۇلتتىق وليمپيادا كوميتەتىنىڭ باعالى سىيلىقتارىن ۇتىپ الدى.
«ەلىمىزدىڭ بارلىق تۇرعىندارىن حالىقارالىق وليمپيادا كۇنىمەن قۇتتىقتاعىم كەلەدى. وليمپيادا كۇنى جىل سايىن تويلانادى. وسىنداي شارالارعا قاتىسقان ۇلدار مەن قىزدار چەمپيون بولۋدى جانە جەڭىس تۇعىرىنان قازاقستان تۋىن جەلبىرەتۋدى ارماندايدى. وسكەلەڭ ۇرپاققا دەگەن سەنىمىم مول جانە ولاردىڭ اتا-انالارىنا بالاسىنىڭ تاڭداۋىنا قۇرمەتپەن قاراعانى ءۇشىن ريزاشىلىعىمدى ايتقىم كەلەدى. ۆيكتورينالارعا بەلسەندى قاتىسقان بالالاردىڭ بىلىمگە دەگەن قۇشتارلىعىنا ءتانتىمىن. قازاقستاندا سپورت قارقىندى دامىپ كەلەدى, بۇل قۋانارلىق جاعداي», دەدى ۆاسيلي لەۆيت.
ۇلتتىق وليمپيادا كوميتەتى حالىقارالىق وليمپيادا كۇنىن 30 جىل قاتارىنان وتكىزىپ كەلەدى.
