ۇلتتىق كوميسسيا مەملەكەت باسشىسىنىڭ تاپسىرمالارىن ورىنداۋدى قامتاماسىز ەتۋ ءۇشىن قوعامدىق ۇيىمداردىڭ, عىلىمي ورتالىقتاردىڭ جانە مەملەكەتتىك ورگانداردىڭ كۇش-جىگەرىن بىرىكتىرۋگە شاقىردى. وتىرىستى جۇرگىزگەن كوميسسيا توراعاسى, پرەزيدەنت اكىمشىلىگى باسشىسىنىڭ ورىنباسارى ايدا بالاەۆا ۇلتتىق كوميسسيا تۇركىستاندا وتكەن قۇرىلتايدا مەملەكەت باسشىسى ايتقان تۇيتكىلدى ماسەلەلەردى شەشۋدىڭ ناقتى ءىس-شارالارىن انىقتاۋ ءۇشىن مازمۇندى ديالوگ جۇرگىزۋگە دايىن ەكەنىن ايتتى.
– پرەزيدەنت ۇلتتىڭ جاڭا ساپاسىن قالىپتاستىرۋعا, زەردەلى, وزىق, ادال قازاقستاندىقتاردى تاربيەلەۋگە باعىتتالعان كەلەلى ويلارىن ايتتى. بۇل – مەملەكەتتىك سەكتور ءۇشىن يدەولوگيالىق جۇمىستىڭ نەگىزگى باعىتتارى بويىنشا ناقتى ءىس-قيمىل باعدارلاماسىنىڭ ءبىر ءتۇرى. ۇلتتىق قۇرىلتايدىڭ كۇن ءتارتىبىنىڭ نەگىزگى باعىتى – ومىردە ادامگەرشىلىك زاڭدارى مەن بيىك قۇندىلىقتارى شەشۋشى ادىلەتتى تۇلعا – «ادال ادام» يدەياسى. جەكە باپ رەتىندە پرەزيدەنت وسكەلەڭ ۇرپاق تاربيەسىن, ونىڭ رۋحاني دامۋىن, ۇلتتىق سانا مەن ءپاتريوتيزمدى نىعايتۋدى ەرەكشە اتاپ ءوتتى, – دەدى ول.
ايدا بالاەۆانىڭ ايتۋىنشا, اتا-انالاردىڭ وسكەلەڭ ۇرپاقتى تاربيەلەۋدەگى جاۋاپكەرشىلىگى جۇيەسىن قالىپتاستىرۋعا باعىتتالعان الەۋمەتتىك ماڭىزى بار جوبالاردى جۇزەگە اسىرۋدى قامتاماسىز ەتۋ, وبلىستىق فيليالدار جانىنان «وتباسىلىق تاربيە ينستيتۋتى» ۇيىمىن قۇرۋ سياقتى ۇسىنىستاردى ءبولىپ كورسەتۋگە بولادى. «ۇلتتىق كوميسسيا مەكتەپ باعدارلاماسىنا ادام قۇقىقتارى بويىنشا ساباقتاردى ەنگىزۋ, قاتىگەزدىك پەن زورلىق-زومبىلىقتى ناسيحاتتايتىن رەسۋرستاردى بەيتاراپتاندىرۋدى قامتاماسىز ەتۋ, ۇلتتىق كوميسسيانىڭ جانىنان قازاقستاندىق عىلىمي ۇيىمداردىڭ كونسورتسيۋمىن نەمەسە ەرىكتى بىرلەستىگىن قۇرۋ, جۇمىسپەن قامتۋ ستراتەگيالارىن قۇرۋ, وتباسىنىڭ قاجەتتىلىكتەرىن ەسكەرە وتىرىپ, بالالار اراسىندا ەڭبەك قۇندىلىقتارىن قالىپتاستىرۋ ماقساتىندا 14 جاستان اسقان مەكتەپ وقۋشىلارى مەن ستۋدەنتتەردى جۇمىسپەن قامتۋعا بەلسەندى كومەك كورسەتۋ ءىس-شارالارىنا مىندەتتى كۆوتا ءبولۋ, كىتاپ شىعارۋ ساياساتىنىڭ تۇجىرىمداماسىن ازىرلەۋ, كىتاپ شىعارۋعا بولىنگەن جالپى سومانىڭ 25 پايىز بالالار ادەبيەتىن شىعارۋعا ءبولۋ, مەملەكەتتىك سىيلىقتى تاعايىنداۋ كەزىندە بالالارعا ارنالعان شىعارمالاردى جەكە بلوك رەتىندە قاراستىرۋ سىندى ۇسىنىستاردى قولدايدى», دەدى ول.
ونىڭ سوزىنە ۇلتتىق كوميسسيا توراعاسىنىڭ ورىنباسارى ءلاززات رامازانوۆا قوسىلىپ, بالالار مەن ەرەسەكتەر اراسىندا ەكولوگيالىق سانالى مىنەز-قۇلىقتى تاربيەلەۋدىڭ ماڭىزدىلىعىن, سونداي-اق ۇلتتىق قۇندىلىقتار مەن وتاندىق برەندتى ىلگەرىلەتۋدەگى ايەلدەردىڭ ءرولىن اتاپ ءوتتى. سونداي-اق ەل پرەزيدەنتى ءوز سوزىندە بالالار مەن جاسوسپىرىمدەر ۇيىمدارىنىڭ قىزمەتىنە سەرپىن بەرۋ مىندەتىن قويعانىن جەتكىزدى.
ۇلتتىق كوميسسيا توراعاسىنىڭ ورىنباسارى ەلەنا تاراسەنكو بالالار ءتۋريزمى ومىرلىك تاجىريبەنى جاڭا ۇرپاققا بەرۋدىڭ, ءپاتريوتيزمدى قالىپتاستىرۋدىڭ ماڭىزدى جولى ەكەنىن, الايدا بۇگىنگى كۇنى جۇيەلى ءتاسىلدىڭ جوقتىعىن جانە بۇل ماڭىزدى قۇرالدىڭ باعالانباعانىن مالىمدەدى.
«بۇگىنگى تاڭدا رەسپۋبليكادا 40 تۋريست-ولكەتانۋشىلار ستانساسى مەن ورتالىعى جۇمىس ىستەيدى, ولاردا 30,5 مىڭنان استام مەكتەپ وقۋشىسى ءبىلىم الىپ جاتىر. الايدا سوڭعى ءۇش جىلدا ورتالىقتاردىڭ ماتەريالدىق-تەحنيكالىق جابدىقتالۋى كەمشىن. 40 ستانسانىڭ 17-ءسى تيپتىك عيماراتتاردا, 23-ءى بەيىمدەلگەن عيماراتتاردا ورنالاسقان. 8 عيمارات كۇردەلى جوندەۋدى قاجەت ەتەدى, 2 عيمارات اپاتتى جاعدايدا, 6 عيمارات اعىمداعى جوندەۋدى قاجەت ەتەدى», دەدى ول.
مەملەكەت باسشىسى اتاپ كورسەتكەن تاعى ءبىر ماڭىزدى سالا – بۇقارالىق اقپارات قۇرالدارىنىڭ ءرولى جانە مەملەكەتتىڭ اقپاراتتىق ساياساتى. ۇلتتىق كوميسسيانىڭ مۇشەسى, كوممۋنيكاتسيا سالاسىنىڭ ساراپشىسى نازىم جانعازينوۆا پرەزيدەنت ۇلتتىق قۇرىلتايدا سويلەگەن ءسوزى ارقىلى مەملەكەت پەن ازاماتتاردىڭ ءوزارا ءىس-قيمىلىنىڭ جاڭا ءداۋىرىن اشقانىن ايتتى.
«وسى ۋاقىتقا دەيىن مەملەكەت پەن بيلىك ازاماتتاردى الەۋمەتتىك بىرلىك: جۇمىسسىزدار, جالدامالى جۇمىسشى, كاسىپكەر, سالىق تولەۋشى رەتىندە قاراستىرىپ كەلدى. ەندى, مىنە, ازامات كورەرمەن, تىڭداۋشى جانە وقىرمان – ءتىرى, بەينەلەۋشى تۇلعا رەتىندە قاراستىرىلا باستادى. پرەزيدەنتتىڭ تۇركىستانداعى باق تۋرالى ايتقان سوزدەرى باق-قا عانا ەمەس, ازاماتتارعا دا جاڭا كوزقاراستى تانىتادى جانە قۋانتادى. جاۋاپكەرشىلىككە كەلگەندە, ءبىز بىردەن رەپرەسسيالىق ادىستەر مەن شەكتەۋلەر تۋرالى ويلايمىز. ەندى بۇل ەسكى كوزقاراستى وزگەرتۋ كەرەك. پرەزيدەنت جۇمساق كۇشكە سىلتەمە جاساي وتىرىپ, زاماناۋي كوممۋنيكاتسيا ادىستەرىنەن حاباردار ەكەنىن كورسەتىپ, گۋمانيزم قاعيداتتارىنا ادال ەكەنىن اشىق ايتتى. ءبىز مەملەكەتتىك ورگاندار مەن ازاماتتار اراسىنداعى قارىم-قاتىناستىڭ جاڭعىرۋىن كۇتەمىز», دەدى ول.
وتىرىس باسىندا ۇلتتىق كوميسسيانىڭ وزگە دە مۇشەلەرى ءسوز الىپ, بالا تاربيەسى مەن ەلدىڭ كەلەشەگىنە قاتىستى وي-پىكىرلەرىن ورتاعا سالدى. جيىن سوڭىندا ۇلتتىق كوميسسيا مۇشەلەرى رەزوليۋتسيا قابىلدادى. ول جەردە ايتىلعان بارلىق ۇسىنىس مەملەكەتتىك ورگانداردىڭ جۇمىسىنا ەنگىزىلىپ, ازاماتتىق سەكتورمەن بىرلەسىپ جۇزەگە اسىرىلماق.
