ءتۇرلى ويىن باعدارلامالارىن جاساپ شىعاراتىن كومپانيالار اقشا تابۋدى ءبىرىنشى ورىنعا قويادى. سوندىقتان ولار ويىندارىنىڭ بالالارعا قاۋىپ توندىرەتىنىن جوققا شىعارمايدى. كوپ ويىندا قولدانبا ارقىلى ساتىپ الۋ سياقتى ميكروترانزاكتسيالار بار. بۇل – كىشكەنتاي بالالاردى تۇتىنۋشى ەتۋ ارقىلى تاۋەلدىلىككە ۇرىندىراتىن تاكتيكا. ايتا كەتسەك, فەدەرالدىق ساۋدا كوميسسياسى ويىن كەزىندە ۇتىپ الۋعا بولاتىن «سىيلىقتار» فۋنكتسياسىنا الاڭداۋشىلىق ءبىلدىرىپ وتىر. مامانداردىڭ ايتۋىنشا, وڭاي ولجا بالانى قۇمار ويىنعا اۋەس قىلادى.
ويىن ىشىندە تولەم جاساۋ مۇمكىندىكتەرى 2010 جىلى Team Fortress 2, سودان كەيىن Overwatch جانە Call Of Duty: WW2 سياقتى تانىمال ويىندارعا العاش ەنگىزىلگەن. سودان كەيىن ول ۇردىسكە اينالدى. Candy Crush, Diablo, Final Fantasy سياقتى تانىمال فرانچايزينگتەر تابىس تابۋ ماقساتىندا ميكروترانزاكتسيالار مەن «سىيلىققا» تاۋەلدى ەتەتىن ويىنداردى كوپتەپ شىعارا باستادى.
اۋستراليانىڭ قۇمار ويىنعا تاۋەلدىلىكتى زەرتتەۋ (Gambling Research Australia) ورتالىعى ۇسىنعان دەرەكتەرگە سايكەس, بەينەويىن يندۋسترياسى 2018 جىلى ويىننىڭ ىشىندە ساتىلعان «سىيلىق» قوراپتارىنان 30 ميلليارد دوللارعا دەيىن پايدا تاپقان. Ubisoft جانە Take-Two Interactive سەكىلدى ءىرى ويىن ستۋديالارى بۇل تاكتيكانى وزدەرىنىڭ كىرىسىن كوبەيتۋ ءۇشىن پايدالانادى. ال وسىنداي ويىندارعا اقشا جۇمسايتىن بالالار بىرتە-بىرتە ءىرى ۇتىس ويىندارىنا ويىسا باستايدى.
ويىن بارىسىندا «سىيلىق» قوراپتارىن ساتىپ الۋعا ىنتالاندىراتىن موتيۆتەر قۇمار ويىنعا قىزىقتىراتىن سەبەپتەرمەن بىردەي. ياعني ويىنشىلار قۇندى نارسەسىن ايىرباستاۋ ارقىلى قوماقتى قارجى ۇتۋدى ويلايدى.
قۇمار ويىنعا يتەرمەلەيتىن ويىنداردان كازينو ەلەمەنتتەرىن بايقاۋعا بولادى. ويىن ناتيجەسى كەزدەيسوقتىققا نەگىزدەلەدى. ويىنشىنى ءبىلىمى مەن كەيبىر داعدىلارى جاقسى ناتيجەگە جەتكىزۋى مۇمكىن, بىراق ۇنەمى تاۋەكەلگە بارۋىنا تۋرا كەلەدى. سونداي-اق تەلەفون ويىندارىندا ۆيرتۋالدى مونەتالار بولادى. بالالارعا ارنالعان ويىنداردا (مىسالى, Pokemon فرانچايزينگتىك ويىندارىندا) وسىنداي تاسىلدەردىڭ بار ەكەنىن ەسكەرە وتىرىپ, اتا-انالار بۇل ماسەلەنى نازاردان تىس قالدىرماۋى كەرەك جانە ويىندارداعى شىعىندى قاداعالاپ وتىرۋى ءتيىس. ەڭ دۇرىسى اتا-انالار بالالارىنا قۇمار ويىننىڭ سالدارى قانداي بولاتىنىن ايتىپ, قاۋىپتى ويىنداردى ويناتپاۋعا تىرىسۋى قاجەت.
وڭتۇستىك اۋستراليادا كامەلەتكە تولماعاندارعا بينگو, لوتەرەيا, ۇتىس ويىندارىن جانە سول سارىنداس تەلەفون ويىندارىن ويناۋعا تىيىم سالاتىن زاڭناما بار. ال قازاقستاندا «ويىن بيزنەسى» تۋرالى زاڭنىڭ 6-بابى, 2-تارماعىنا سايكەس ەلەكتروندى كازينو جانە ينتەرنەت-كازينو قىزمەتىنە تىيىم سالىنعان جانە 15-بابتا قۇمار ويىندار ويناۋعا نەمەسە ءباس تىگۋگە جيىرما ءبىر جاسقا دەيىنگى جاس شەكتەۋى بار ەكەنى جازىلعان. بىراق ءدال وسى ينتەرنەت-كازينو ويناۋ جاسوسپىرىمدەردىڭ اراسىندا بەلەڭ العان. زەرتتەۋگە سۇيەنسەك, بۇنىڭ بارلىعى بالالاردىڭ ۇنەمى ويناپ جۇرگەن ويىندارىنىڭ ناتيجەسىندە بولادى. ويتكەنى بالا ويىننان جالىققاننان كەيىن, وڭاي جولمەن شىنايى اقشا ۇتۋدى قالايدى. سودان سوڭ ۆيرتۋالدى كەزەڭنەن ءوتىپ, كازينوعا قۇمارتا باستايدى.
كەز-كەلگەن ويىندى ويناي بەرۋ بالانىڭ مىنەزىن بۇزادى ەكەن. ال بالانىڭ قالىپتاسۋى ونىڭ وينايتىن ويىندارىنا تىكەلەي بايلانىستى. ماعجان جۇماباەۆ بالا ءۇشىن ويىننىڭ ماڭىزى مەن تاربيەشىنىڭ مىندەتى جونىندە «پەداگوگيكا» كىتابىندا ەگجەي-تەگجەيلى جازىپ كورسەتكەن.
ء«تىپتى جاس بالا جالقى ويىندى – جالعىز ويناۋدى جاقسى كورەدى. ءالى ءتىلى ەركىن جەتىلمەگەندىكتەن, ول باسقا بالالارمەن قاتىناسا المايدى. ال ەندى وسكەن سايىن جالپى ويىندى بىرىگىپ ويناۋدى جاقسى كورە باستايدى. جالعىز ويناسا, ءىشى پىسادى. جالپى, ويىن بالا ءتىلىنىڭ جەتىلۋىنە كوپ پايدا اكەلەدى. بىرىگىپ ويناعاندا توقتاۋسىز قوزعالىپ, ك ۇلىپ, بىلدىرلاپ سويلەي بەرەدى. ويىن جالپى تۇرمىسقا, ياعني باسقا ادامدارمەن بىرىگىپ تۇرۋعا ۇيرەتەدى. ءوزىنىڭ ءسوزىن, تىلەگىن بىرەۋگە تىڭداتىپ, باسقانىڭ تىلەگىن, ءسوزىن ءوزى تىڭداپ, قىسقاسى بىرىككەن تۇرمىستىڭ ءبىرىنشى شارتى – جالپى زاڭداردى ورىنداپ, اتقارىپ ۇيرەنەدى. ال ەندى جالقى ويىن ياعني جالعىز ويناۋ بالانىڭ الاڭعاسار, ەلىكتەگىش بولماي, ءوز ىسىنە ىنتالى, تياناقتى بولۋىنا پايدالى. بىراق وسى ەكى ءتۇرلى ويىننىڭ كەمدىك جاعى دا بار. ىلعي جالعىز ويناپ ۇيرەنگەن بالا تاعى, مەنمەنشىل بولىپ, ىلعي كوپپەن بىرگە ويناپ ۇيرەنگەن الاڭعاسار, تياناقسىز, ەلىكتەگىش بولىپ شىعۋى مۇمكىن. سوندىقتان دۇرىسى – ويىننىڭ ەكى ءتۇرىن كەزەكپەن اۋىستىرىپ وتىرۋ.
وسى ءتۇردىڭ قاي تۇرىمەن بولسا دا ويناپ وتىرعان بالانىڭ ويىنىن تاربيەشى باقىلاۋعا مىندەتتى. بىراق باقىلايمىن دەپ ءبۇلدىرىپ الما. ءبۇلدىرىپ الۋ بىلاي بولادى: بىلاي وينا دەپ بۇيىرساڭ, بالانىڭ ويىنعا دەگەن ىنتاسىن سۋىتىپ الاسىڭ. بالانىڭ ويىنىنا ۇلكەن ادام كىرىسسە, بالاعا ويىننىڭ قىزىعى بىتەدى. ويىن – بالانىڭ ءوز ءىسى. بالانىڭ ويىنىنا كىرىسۋشى بولما. بالانى ءبىر نارسەنى بۇلدىرمەس ءۇشىن تەك شەتتەن باقىلا. ەستە بولۋ كەرەك, باقىلا دەگەن ءسوز قاراۋىلدا تۇرعان سولداتتاي قاباعىڭدى ءتۇيىپ, قاقيىپ تۇر دەگەن ءسوز ەمەس. ولاي تۇرساڭ, بالا ويناي المايدى. ەگەر ەندى بالانىڭ ويىنىنا قاتىسقىڭ كەلسە, ءوزىڭ بالا بولىپ قاتىس. ياعني ويىندارىنا بوگەت, ورالعى بولما. بالالار سەنىڭ جەتىلگەن ادام ەكەنىڭدى سەزبەيتىن دارەجەدە بولسىن», دەيدى ول.
ءبىز بالانىڭ تەرىس قىلىعىنا قوعام بولىپ تاڭدانىپ جاتامىز. باسىنان باقىلاپ, باعىت بەرمەگەننەن كەيىن «قالاي ونداي بولدى» دەۋ وڭاي. ماسەلەن, مەكتەپتەگى اياۋسىز جاعدايلاردىڭ وزىنە دە قاتىگەزدىككە بوي ۇيرەتەتىن ويىندار مەن فيلمدەردىڭ اسەرى جوق ەمەس. ماعجان ايتپاقشى, بالانىڭ قولىنا بەرگەن ويىنشىق, ويناتقان ويىن, «بالامەن بالا بولىپ ويناۋ» - تاربيەنىڭ ىرگەتاسى.
