FILARMONIA FEST-2023 جوباسى قازاقستاننىڭ مۋزىكا مادەنيەتىن تانىمال ەتۋ, وتاندىق ونەردىڭ گۋمانيستىك جانە رۋحاني باعدارى ارقىلى حالىقتىڭ ءارتۇرلى توپتارىن تاربيەلەۋ جانە كوركەم شىعارماشىلىققا باۋلۋ ماقساتىندا وتكىزىلەدى. اۋقىمدى مۋزىكا مەرەكەسى قوعامدا مەرەكەلىك اتموسفەرا مەن جاعىمدى كوڭىل-كۇي قالىپتاستىرۋعا, فيلارمونيانىڭ شىعارماشىلىق ۇجىمدارىنىڭ تۋىندىلارىن تانىمال ەتىپ, جەكە برەندتى قالىپتاستىرۋعا, وتباسىلىق قۇندىلىقتاردى دامىتۋعا, وسكەلەڭ ۇرپاقتىڭ ادامگەرشىلىك جانە كوركەمدىك باعدارلارىن قالىپتاستىرۋ ءۇشىن باعىتتالعان.
جوباعا فيلارمونيانىڭ شىعارماشىلىق ۇجىمدارى مەن سوليستەرى, ناقتىراق ايتقاندا 500-گە جۋىق ءارتىس قاتىسادى. بالالاردىڭ شىعارماشىلىق جانە ءبىلىم بەرۋ ستۋديالارىمەن, تسيرك ارتىستەرىمەن ىنتىماقتاستىق جوسپارلانىپ وتىر.
24 ماۋسىم كۇنى ساعات 11.00-دەن 21.30-عا دەيىن كەنەسارى كوشەسى, 32 مەكەنجايىنداعى فيلارمونيا عيماراتىنىڭ الدىنداعى الاڭنان ەسىل وزەنىنىڭ جاعالاۋىنا دەيىن ءتۇرلى ءىس-شارالار وتەدى:
- 11.00-دەن 13.00-گە دەيىن «مۋزىكا بالالار كوزىمەن» بالالار سۋرەت بايقاۋى. «بورمەن سۋرەت سالۋ», ء«مۇسىن», «كومپوزيتسيا» اتتى ءۇش نوميناتسيادا ۇزدىك جۇمىستاردى تاڭداۋ جانە ماراپاتتاۋ;
- 13.00-دەن 15.00-گە دەيىن «سارىارقا» حالىق مۋزىكاسى ءانسامبلىنىڭ جانە ۇرلەمەلى وركەستردىڭ «مۋزىكالىق اسپاپتار الەمىنە ساياحات» اتتى جاس مۋزىكانتتارعا ارنالعان شەبەرلىك ساعاتتارى وتەدى, وندا بالالار مۋزىكانىڭ قىر-سىرىن ءبىلىپ قانا قويماي, مۋزىكالىق اسپاپتاردىڭ قۇرىلىسىمەن تانىسادى.
- فيلارمونيا ۇجىمدارىنىڭ قاتىسۋىمەن ەسىل وزەنىنىڭ جاعاسىندا جانە ەلوردالىق اربات بويىندا فيلارمونيا شەرۋى وتەدى. اۋقىمدى مۋزىكالىق شەرۋگە «سارىارقا» حالىق مۋزىكاسى ءانسامبلى, «قورقىت» ءداستۇرلى ساز توبى, «شالقىما» حالىق بي ءانسامبلى, «Alem» زاماناۋي بي بالەتى, كامەرالىق حور, ۇرلەمەلى وركەستر, ەسترادالىق ۆوكال ءبولىمىنىڭ ارتىستەرى قاتىسادى. شەرۋ 18.30-دا ەسىل جاعالاۋىندا باستالىپ, 19.30-دا فيلارمونيا الاڭىندا اياقتالادى.
- 18.30-دان 19.30-عا دەيىن قازاق وركەسترى مەن حالىق ءانى ءبولىمىنىڭ ءداستۇرلى انشىلەرى اكىمدىك الدىنداعى امفيتەاتردا ونەر كورسەتۋى;
- 18.30-دان 19.00-عا دەيىن عازيزا جۇبانوۆا اتىنداعى مەملەكەتتىك ىشەكتى اسپاپتار كۆارتەتىنىڭ ورتالىق كىرەبەرىستەگى كونتسەرتتىك الاڭدا ونەر كورسەتۋى;
- 19.30-دا فيلارمونيا الاڭىندا فيلارمونيانىڭ بارلىق ۇجىمدارىنىڭ قاتىسۋىمەن ەلوردانىڭ 25 جىلدىعىنا ارنالعان 25 سانىن فلەشموبپەن ۇيىمداستىرۋ;
- «فيلارمونيا – ەلوردانىڭ مۋزىكالىق ماگنيتى» ەسسە بايقاۋىنىڭ قورىتىندىسىن شىعارۋ;
- 19.30-دان 21.30-عا دەيىن سيمفونيالىق وركەستر جانە بارلىق ۇجىمداردىڭ قاتىسۋىمەن فيلارمونيانىڭ گالا-كونتسەرتى جوسپارلانىپ وتىر.
