حالەل ارعىنباەۆ الاش ارداقتىسى جۇسىپبەك ايماۋىت ۇلىنىڭ ەلى – اۋليەلى قىزىلتاۋدا دۇنيەگە كەلگەن. تىرىسىندە ەتنوگرافيا سالاسىنىڭ كوشباسشى عالىمى اتانىپ, سوڭىنا ەلەۋلى زەرتتەۋ ەڭبەكتەرىن قالدىردى.
«قازاق ەتنوگرافيا عىلىمى حالەكەڭنەن باستالادى. حالەكەڭ ۇلكەن كىتاپ تۇگىلى, ءار ماقالاسىنا بارىنشا جاۋاپتى قارايتىن, عىلىمداعى اسىعىستىققا قارسى ادام ەدى. ول جاعىنان حالەكەڭدى عىلىمداعى اكادەميالىق ءداستۇردىڭ وكىلى دەپ تولىعىمەن اتاۋعا بولادى. ءبىز كانديداتتىق ديسسەرتاتسيامىزدى وتىزعا جەتەر-جەتپەستە اسىعىپ قورعاپ جاتقانىمىزدا, ول كىسى ءوزىنىڭ 36 جاسىندا العاشقى عىلىمي اتاعىن قورعاعان», دەپ جازعان بەلگىلى عالىم جامبىل ارتىقباەۆ.
سونداي-اق عالىم حالەل ارعىنباەۆتى ش.ءۋاليحانوۆتىڭ, ونىڭ دوسى ن.ءپوتانيننىڭ جولىن جالعاستىرۋشى دەپ ايتۋعا بولاتىنىن ايتتى.
