«وي تۇبىندە جاتقان ءسوز», ء«سوز سىرىنا قۇشتارلىق», «تىلدەستىرمەك تىلشىدەن» اتتى ءۇش بولىمنەن تۇراتىن جيناققا اۆتوردىڭ كەيىنگى جىلدارى ۇلت تاعدىرى, ەل جاعدايى, ءتىل ماسەلەسىنە قاتىستى ماقالالارى مەن سۇحباتتارى ەنگەن.
وسى كىتاپقا جازعان العى سوزىندە كورنەكتى قالامگەر, تاريحشى, مەملەكەتتىك سىيلىقتىڭ لاۋرەاتى قويشىعارا سالعارا: ء«وز باسىم ءۇش تاراۋعا توپتاستىرىلىپ, ەلۋ ءتۇرلى تاقىرىپتى قامتىعان قولجازبانى تۇگەل وقىپ شىققاندا ءارتۇرلى وقيعالاردان قۇرالعان ۇزىك-ۇزىك شاعىن اڭگىمەلەردى ەمەس, قازاق حالقى باستان كەشىرگەن تىرلىكتىڭ بەلگىلى ءبىر كەزەڭىنىڭ بار بولمىسىن كوز الدىڭا اكەلگەن «باس-اياعى ءبۇتىن» تولىققاندى تۇتاس ءبىر كوركەم شىعارمانى وقىعانداي كۇي كەشتىم. جيناققا ەنگەن ەڭبەكتەردىڭ قاي-قايسىسىنىڭ دا اقپاراتتىق ماعلۇماتىنىڭ تانىمدىق تاعىلىمى باسىم. وسىعان وراي بۇلاردى گازەت ماقالالارى دەگەننەن گورى «ەتنوگرافيالىق تانىمدىق شاعىن اڭگىمەلەر جيناعى» دەپ قابىلداساق تا ارتىق بولمايتىن سەكىلدى», دەپ باعا بەرىپتى.
مازمۇندى شارادا بەلگىلى جازۋشى, تاريح عىلىمدارىنىڭ دوكتورى, پروفەسسور تۇرسىنحان زاكەن ۇلى ونىڭ قالامى توسەلگەن قارىمدى جۋرناليست ەكەنىن اتاپ ءوتتى.
« ول قىتايداعى «شىڭجاڭ» گازەتىندە ءبىراز جىل قىزمەت ىستەپ, قالىپتاستى. بەتكەۇستار ءتىلشى بولدى. ونىڭ ءبىر ارتىقشىلىعى – قىتاي مەن قازاق جۋرناليستيكاسىنىڭ ەرەكشەلىگىن بويىنا ءسىڭىرىپ, سونى شىعارماشىلىعىندا شەبەر پايدالانادى», دەدى ول.
سونداي-اق ءىس-شارا بارىسىندا جازۋشى قويشىعارا سالعارا, تۇركولوگ عالىم قارجاۋباي سارتقوجا ۇلى, «Elorda Aqparat» جشس ديرەكتورى ولجاس سىدىقبەك, «استانا اقشامى» گازەتىنىڭ باس رەداكتورى ەركىن قىدىر جانە «قانداس» مەديتسينا ماماندارى قاۋىمداستىعىنىڭ توراعاسى جەڭىس قاليازىم ۇلى ءسوز الىپ, وقىرمانعا جول تارتقان جاڭا جيناق تۋرالى وي قوزعاپ, اۆتورعا شىعارماشىلىق تابىس تىلەدى.
