پارلامەنت پالاتارىنىڭ بىرلەسكەن وتىرىسىنىڭ كۇن تارتىبىندەگى ءبىرىنشى ماسەلە – قر كونستيتۋتسيالىق سوتىنىڭ «قازاقستان رەسپۋبليكاسىنداعى كونستيتۋتسيالىق زاڭدىلىقتىڭ جاي-كۇيى تۋرالى» جولداۋى جايلى بولدى. كونستيتۋتسيالىق سوت توراعاسى ەلۆيرا ءازىموۆا مەملەكەت باسشىسىنىڭ كونستيتۋتسيالىق رەفورماسىنىڭ ناتيجەسىندە كونستيتۋتسيالىق سوت قۇرىلىپ, ازاماتتارعا وسى ورگانعا قورعاۋ ءۇشىن جۇگىنۋ قۇقىعى بەرىلگەنىن اتاپ ءوتتى.
– بەس اي ىشىندە ءۇش مىڭنان استام ازامات ءوز قۇقىقتارىن كونستيتۋتسيالىق قورعاۋعا جۇگىندى. بۇل تسيفرلار ازاماتتاردىڭ جاڭا ورگانعا دەگەن جاي عانا قىزىعۋشىلىعىنىڭ دالەلى ەمەس, ءوتىنىش بەرۋشىلەردىڭ ارقايسىسىنىڭ ءوز قۇقىقتارىن قورعاۋ نيەتىن راستايدى. بۇل رەتتە قازاقستان زاڭناماسىندا كونستيتۋتسيالىق سوتقا جۇگىنگەنگە دەيىن قۇقىقتىق قورعاۋدىڭ باسقا قۇرالدارىن قولدانۋ تۋرالى تالاپ جوق, – دەدى ە.ءازىموۆا.
كونستيتۋتسيالىق سوتتىڭ توراعاسى ازاماتتىڭ كونستيتۋتسيالىق جۇگىنۋ ينستيتۋتى قوعامنىڭ, مەملەكەتتىك اپپاراتتىڭ جانە ازاماتتىڭ كونستيتۋتسيالىق قۇقىقتىق سانا مەن قۇقىقتىق مادەنيەت دەڭگەيىن ارتتىرۋدى تالاپ ەتەتىنىنە ءمان بەردى. قاراۋ قورىتىندىسى بويىنشا پارلامەنت كونستيتۋتسيالىق سوتتىڭ جولداۋىن نازارعا الۋ تۋرالى شەشىم قابىلدادى. كۇن تارتىبىندەگى ەكىنشى ماسەلە – ۇكىمەت پەن جوعارى اۋديتورلىق پالاتانىڭ 2022 جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپتەرىن بەكىتۋ. بۇل جونىندە پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆ پەن جوعارى اۋديتورلىق پالاتا ءتورايىمى ناتاليا گودۋنوۆا بايانداما جاسادى. ءماجىلىس دەپۋتاتى ۇلاسبەك سادىبەكوۆ رەسپۋبليكالىق بيۋدجەتتىڭ اتقارىلۋىنىڭ نەگىزگى تۇستارى مەن وزەكتى پروبلەمالارىنا توقتالىپ, ۇكىمەت ەسەپتى تالقىلاۋ كەزىندە ايتىلعان ەسكەرتۋلەر مەن ۇسىنىستاردى الداعى ۋاقىتتا ەسكەرۋى قاجەت ەكەندىگىن ايتتى.
– مەملەكەت باسشىسى بيۋدجەتتى جوسپارلاۋ جانە مەملەكەت قاراجاتىن جۇمساۋ كەزىندە قابىلداناتىن بارلىق شەشىم مەيلىنشە ءتيىمدى بولۋعا ءتيىس ەكەنىن بىرنەشە رەت اتاپ وتكەن بولاتىن. بيۋدجەتتى جوسپارلاۋ مەن اتقارۋدا سوزىلمالى سيپاتقا يە بولىپ وتىرعان كەمشىلىكتەر تۋرالى ماسەلەنى دەپۋتاتتىق كورپۋس تا ۇنەمى كوتەرىپ وتىرادى, – دەدى دەپۋتات.
ءجارىسسوز ناتيجەسىندە ءماجىلىس پەن سەنات دەپۋتاتتارى ۇكىمەت پەن جوعارى اۋديتورلىق پالاتانىڭ ەسەپتەرىن بەكىتۋ تۋرالى شەشىم قابىلدادى.
