ەكىنشى سەسسيادا توتەنشە جاعدايلار ءمينيسترى سىرىم ءشارىپحانوۆ, «ۆولونتەرلىك قوزعالىس LIDER.KZ» قوعامدىق بىرلەستىگىنىڭ جەتەكشىسى ديلميرا بلاتس, ورتالىق ازياداعى حالىقارالىق قىزىل كرەست جانە قىزىل جارتى اي قوعامدارى فەدەراتسياسىنىڭ وكىلدىگىنىڭ باسشىسى سەۆال گۋزەلكيلينچ, «ۇلتتىق ۆولونتەرلەر جەلىسى» اتقارۋشى ديرەكتورى تاتيانا ميرونيۋك, ەۋروپا جانە تمد ەلدەرى بويىنشا ايماقتىق مەنەدجەر, بۇۇ ەرىكتىسى ريمما ساباەۆا ءسوز سويلەدى.
سەسسيا باسىندا توتەنشە جاعدايلار ءمينيسترى اباي وبلىسىنداعى قازا تاپقانداردىڭ قۇرمەتىنە ءبىر مينۋتتىق ۇنسىزدىك جاريالادى.
«ەرىكتىلەردىڭ ابزال جۇمىسى قازاقستان ءۇشىن جاڭاشىلدىق ەمەس. ءبىر-بىرىمىزگە قورعان بولىپ, قولداۋ كورسەتۋ قازاق حالقىنىڭ قانىندا بار. بۇنىڭ مىڭداعان جىلدىق تاريحى دا بار. جۋىردا اباي وبلىسىندا الاپات ءورت بولعانى بارشاعا بەلگىلى. وسىناۋ قيىن-قىستاۋ كەزەڭدە حالقىمىز بىرىگىپ, قايتىس بولعان ازاماتتاردىڭ جاقىندارىنا, زارداپ شەككەن ادامدارعا قولداۋ كورسەتكەندەر - ەرىكتىلەر. ولاردىڭ قايىرىمدىلىق ىستەرىن ەرەكشە اتاپ ءوتۋ كەرەك. ءار وڭىردەن گۋمانيتارلىق كومەك جينالىپ, قارجىلاي بولسىن, مورالدىق تۇرعىدان بولسىن قولداۋ كورسەتىلدى. مەملەكەت باسشىسىنىڭ باستاماسىمەن ورمان ءورتى سالدارىنان كوز جۇمعان ازاماتتاردىڭ ەرلىگى ەلەندى, بالالارىنا قولداۋ كورسەتىلدى. وسىنىڭ بارلىعىنا ەرىكتىلەر ماڭىزدى ۇلەس قوستى. قازاقستان ەرىكتىلەرى - ناعىز پاتريوتتار», دەدى توتەنشە جاعجايلار ءمينيسترى.
