الەم ەرىكتىلەرى مەن ەرىكتىلەر ۇيىمدارى ءۇشىن ەڭ ءىرى حالىقارالىق ءىس-شاراعا 34 ەلدەن 40-تان اسا سپيكەر, جالپى 400-گە جۋىق ادام قاتىسىپ وتىر.
فورۋم شەڭبەرىندە «حالىقارالىق ۆولونتەرلىك باستامالار: تاسىلدەر مەن تاجىريبەلەر» اتتى ءبىرىنشى پانەلدىك سەسسيانىڭ وتىرىسى ءوتتى. سەسسيا بارىسىندا تۇركى مەملەكەتتەرى ۇيىمىنىڭ باس حاتشىسى كۋبانىچبەك ومۋراليەۆ ءسوز سويلەپ, بۇگىندە ەرىكتىلەردىڭ باستاماسىمەن قوعامدا كوپتەگەن ماسەلە وڭ شەشىمىن تاۋىپ جۇرگەنىن اتاپ ءوتتى. سپيكەر ءوز سوزىندە COVID-19 پاندەمياسى, تۇركيا مەن سيريادا بولعان جەر سىلكىنىسى كەزىندە جۇمىلا بىرىككەن حالىقارالىق ەرىكتىلەردىڭ كومەگىن ەرەكشە اتاپ ءوتتى.
«2020 جىلى كوروناۆيرۋس پاندەمياسى ءورشىپ تۇرعان كەزدە قازاقستان مەن ازەربايجاندا تۇركى مەملەكەتتەرى ۇيىمىنىڭ باستاماسىمەن «ەرىكتىلەر جىلى» جاريالاندى. وسى باستامانىڭ ارقاسىندا الەمدىك دەڭگەيدەگى ماڭىزدى ءىس-شارالار ۇيىمداستىرىلدى. ادامزاتقا ءوز ەركىمەن كومەك كورسەتۋگە نيەت بىلدىرگەن ەرىكتىلەر جۇدىرىقتاي جۇمىلىپ, الەمنىڭ تۇپكىر-تۇپكىرىندە قايىرىمدىلىق جۇمىستارىن جۇرگىزدى. ال وسى جىلدىڭ 6 اقپانىندا باۋىرلاس تۇركيا ەلىندە مىڭداعان ادامنىڭ ءومىرىن قيعان جەر سىلكىنىسى بولعانى ءالى ەسىمىزدە. بۇل قايعىلى جاعداي ۆولونتەرلىك قوزعالىستىڭ ءمان-ماڭىزىن ايتارلىقتاي ارتتىرا ءتۇستى. ماسەلەن, باۋىرلاس حالىققا 100 توننادان استام گۋمانيتارلىق كومەك جونەلتىلدى. قازاقستان مەن قىرعىزستاننان ەرىكتىلەر جۇمىلدىرىلىپ, ءۇيسىز قالعان باۋىرلارىمىزعا ارنايى كيىز ۇيلەر جونەلتىلدى», دەدى تۇركى مەملەكەتتەرى ۇيىمىنىڭ باس حاتشىسى.
سپيكەردىڭ ايتۋىنشا, وسى جىلدىڭ 16 ناۋرىزىندا انكارادا «ەرىكتىلەر» ءسامميتى وتكەن. اتالمىش سامميتكە تۇركياداعى ءزىلزالا كەزىندە قول ۇشىن سوزعان ەرىكتىلەر ۇيىمدارىنىڭ مۇشەلەرى قاتىسىپ, ۆولونتەرلىك جۇمىستىڭ دامۋىنا ۇلكەن ۇلەس قوسقان.
