وقۋ ورتالىعىنىڭ اۋماعىندا 43 كوماندادان تۇراتىن 700-دەن استام ءجاسوسپىرىم مەن وقۋشى ءۇشىن شاتىرلى لاگەر اشىلدى. جيىنعا ەلىمىزدىڭ بارلىق وڭىرىنەن جاستار جينالدى. اسكەري سايىسقا قارۋلى كۇشتەردىڭ, باسقا دا اسكەرلەر مەن اسكەري قۇرالىمداردىڭ اسكەري-پاتريوتتىق كلۋبتارىنىڭ, ساعادات نۇرماعامبەتوۆ اتىنداعى اسكەري كوللەدجدىڭ, «جاس ۇلان» رەسپۋبليكالىق مەكتەپتەرىنىڭ, كونكۋرستىق ىرىكتەۋدەن وتكەن وبلىستىق اسكەري مەكتەپ-ينتەرناتتاردىڭ تاربيەلەنۋشىلەرى قاتىسىپ جاتىر. بيىلعى جيىننىڭ ەرەكشەلىگى – «ايبىنعا» العاش رەت ازەربايجان مەن وزبەكستاننىڭ كوماندالارى شاقىرىلىپ وتىر. بارلىق كوماندانىڭ قۇرامىندا 14-17 جاس ارالىعىنداعى بالالار ءوز ونەرلەرىن ورتاعا سالۋدا.
«شاحتەرلەر استاناسىنىڭ» تەمىرجول ۆوكزالىنا العاشقى بولىپ سولتۇستىك قازاقستان, جامبىل وبلىستارى مەن شىمكەنت قالاسى اسكەري-پاتريوتتىق كلۋبتارىنىڭ وكىلدەرى, سونداي-اق الماتى, شىمكەنت قالالارىنىڭ «جاس ۇلان» رەسپۋبليكالىق مەكتەپتەرىنىڭ تاربيەلەنۋشىلەرى كەلىپ جەتتى. ۇيىمداستىرۋشىلار جيىنعا قاتىسۋشىلاردى اسكەري وركەستر ۇنىمەن قارسى الدى.
بايقاۋ باعدارلاماسىندا «ايبىن دارىنى» زياتكەرلىك ويىنى جانە «كۇشىمىز – بىرلىكتە» اسكەري-دالالىق تاكتيكالىق ويىنى, «ايبىن جۇلدىزى» شىعارماشىلىق بايقاۋى جانە «Smart Sarbaz» روبوتوتەحنيكا سايىسى بار. اسكەري-سپورتتىق, اسكەري-قولدانبالى سپورت تۇرلەرى جانە اسكەريلەندىرىلگەن ەستافەتا بويىنشا جارىستار وتكىزۋ ءۇشىن الاڭدار دايىندالدى.
جيىندا اسكەري تەحنيكا كورمەسى, فيلمدەر كورسەتىلىمى, مۇراجايدىڭ كوشپەلى ەكسپوزيتسياسى ۇيىمداستىرىلماق. بالالارعا سپورتتىق ويىندار, الاۋ جانىنداعى كەشتەر مەن ينتەراكتيۆتى كونتسەرت كورسەتىلەدى. بايقاۋعا قاتىسۋشىلار «ايبىن – دوستىق مەكەنى» ساياباعىنا اعاش وتىرعىزادى. تانىمال ادامدارمەن, ارداگەرلەرمەن, مەدياتۇلعالارمەن كەزدەسۋلەر دە كۇن تارتىبىندە تۇر.
«ايبىن» حالىقارالىق جيىنى اياسىندا «بىرلىك ورداسى» كورمەسى ۇيىمداستىرىلادى. وندا قازاقستان, ازەربايجان جانە وزبەكستاننىڭ جاس پاتريوتتارى ءوز حالقىنىڭ مادەني جەتىستىكتەرىن, ۇزدىك داستۇرلەرى مەن ادەت-عۇرىپتارىن كورسەتەتىن بولادى.
17 ماۋسىمدا باستالعان جيىننىڭ سالتاناتتى اشىلۋ ءراسىمى دە ءوتتى. ءىس-شاراعا قورعانىس ءمينيسترىنىڭ ورىنباسارلارى, گەنەرال-لەيتەنانت سۇلتان كامالەتدينوۆ پەن گەنەرال-لەيتەنانت مۇحامەدجان تالاسوۆ, قاراعاندى وبلىسىنىڭ اكىمى ەرماعانبەت بولەكپاەۆ پەن دەپۋتاتتار قاتىسىپ, ءسوز سويلەدى. اسكەري ءومىردىڭ قىر-سىرىن ۇيرەتىپ, بويلارىنا وتانشىلدىق سەزىمىن ۇيالاتاتىن بۇل جيىننىڭ جاس بالالار ءۇشىن پايداسى ۇشان-تەڭىز.
– مەن ءوز وبلىسىمنىڭ اتىنان حالىقارالىق اسكەري-پاتريوتتىق جيىنعا قاتىسىپ وتىرعانىمدى ماقتانىش ەتەمىن. بىزگە ۇلكەن جاۋاپكەرشىلىك جۇكتەلدى جانە وسى سايىستا جەڭىسكە جەتۋ ءۇشىن بار كۇشىمىزدى سالۋعا دايىنبىز, – دەپ اعىنان جارىلدى جامبىل وبلىسى «جاس ۇلان» اسكەري-پاتريوتتىق كلۋبىنىڭ مۇشەسى اسەل ايتباي.
