ستاتيستيكاعا جۇگىنسەك, Grand Slam تۋرنيرىندە قازاقستان قۇراما كومانداسىنىڭ مۇشەلەرى جەتى رەت قانا جەڭىس تۇعىرىنىڭ ەڭ بيىك ساتىسىنا كوتەرىلگەن ەكەن. ءبىر التىن جانە ءتورت جۇلدەدەن ارتىق العان كەزىمىز جوق. بۇل جولى ءانۇرانىمىز ءبىر-اق مارتە شىرقالعانىمەن, مەدال سانى مول بولدى. سونىڭ ناتيجەسىندە استاناداعى دودانىڭ جالپى كوماندالىق ەسەبىندە جەرلەستەرمىز ءتورتىنشى ورىنعا تابان تىرەدى. الدىمىزدا – يسپانيا (2 التىن+1 كۇمىس+2 قولا), يتاليا (2+0+0) جانە فرانتسيا (1+2+4) قۇرامالارى. ۇزدىك بەستىكتى جاپونيا (1+1+0) دزيۋدوشىلارى تۇيىندەدى.
قازاق ەلىنىڭ بەتكەۇستار بالۋاندارى اراسىنان اتالعان جارىسقا تەك ەلدوس سمەتوۆ (60 كيلو) پەن ءابيبا ابۋجاقىنوۆا (48 كيلو) عانا قاتىسپادى. ولار ءالى دە ەسكى جاراقاتتارىنان تولىقتاي ايىقپاعان كورىنەدى. سول سەبەپتى قوس ساڭلاق بۇل تۋرنيردەن بوساتىلدى. ازيا ويىندارىنىڭ جەڭىمپازى ديدار حامزا دا (90 كيلو) بۇل جولى بوي كورسەتكەن جوق. قالعان مىقتىلاردىڭ ءتورت كوزدەرى تۇگەل بولدى.
ءبىزدىڭ دزيۋدوشىلار اراسىنان ماعجان شامشادين اسقان شەبەرلىك تانىتتى. ول 2015 جىلى جاستار اراسىندا الەم چەمپيونى اتانعاندا قۋانباعان قازاق جوق ەدى. سول كەزدە بىلىكتى باپكەرلەردىڭ وزدەرى «بۇل بالانىڭ بولاشاعى جارقىن» دەسىپ جاتتى. بىراق ءبارى ءبىز كۇتكەندەي بولمادى. ەرەسەكتەر دۋىندا ماعجانعا ءوزىن مويىنداتۋ قيىنعا سوقتى. سىر بويىنىڭ سايىپقىرانى ۇزاق ۋاقىت بويى ءدۇبىرلى دودالاردا ۇزدىكتەر ساناتىنان كورىنە المادى. ال وسى جولى ول كەرەمەت ونەر كورسەتتى. 60 كيلو سالماقتا سىنعا تۇسكەن شامشادين ازەربايجاندىق ءنادىر تاليبوۆ, وزبەكستاندىق باحروم بوتۋروۆ, تاجىكستاندىق مەرزود سۋفيەۆ جانە فرانتسيالىق سەدريك رەۆولدى ۇتىپ, جەڭىس تۇعىرىنىڭ ەڭ بيىك ساتىسىنا كوتەرىلدى.
66 كيلو سالماقتا كۇرەسكەن عۇسمان قىرعىزباەۆ اقتىق سىنعا دەيىن القىنباي جەتتى. تۇساۋسكەر كەزدەسۋىندە سوقىر جەرەبە ونى رەسەيلىك ياگو ابۋلادزەمەن جولىقتىردى. ءدال وسى بالۋاننان قانداسىمىز 2021 جىلى بۋداپەشتە وتكەن الەم چەمپيوناتىنىڭ فينالىندا ۇتىلعان ەدى. بۇل جولى عۇسمان كەتكەن ەسەنى قايتارىپ, اتاقتى قارسىلاسىن گولدەن-سكوردا الىپ ۇردى. ودان كەيىن موڭعوليالىق نارمانداح بايانمۇڭح, ازەربايجاندىق كامران سۋلەيمانوۆ جانە وزبەكستاندىق مۇحيددين تيلوۆوۆتى تىزە بۇكتىردى. فينالدا قىرعىزباەۆتىڭ يسپانيالىق گارسيا تورنەگە ءالى جەتپەدى.
تاعى بەس جەرلەسىمىز جەڭىس تۇعىرىنىڭ ءۇشىنشى تۇعىرىنا كوتەرىلدى. 73 كيلو سالماقتىڭ قولا مەدالىن جانساي سماعۇلوۆ پەن دانيار شامشاەۆ ءوزارا ساراپقا سالدى. ەكەۋىنىڭ جاس ايىرماشىلىعى – باقانداي توعىز جاس. جانساي – 30-دا, دانيار – 21-دە. بۇل باسەكەدە جاس جولبارىستىڭ مىسى باسىم بولدى. شەشۋشى تۇستا شيراق قيمىلداعان شامشاەۆ قارسىلاسىنىڭ ءسال كادىرىپ قالعان ءساتىن ۇتىمدى پايدالانىپ, سماعۇلوۆقا سان سوقتىرىپ كەتتى. وسى سالماق دارەجەسىنىڭ ەكىنشى قولا مەدالى اسقار نارقۇلوۆقا بۇيىردى. كۇنى بۇگىنگە دەيىن كوزگە تۇسپەي, الەمدىك رەيتينگتە توپ-100-دىككە ەنە الماي جۇرگەن 23 جاستاعى قازاق بالۋانى استانا تورىندە ءوزىن جاقسى قىرىنان كورسەتتى. ول ۇلىبريتانيالىق وليۆەر شورت, IJF-ءتىڭ تىزىمىندە 12-ورىندا تۇرعان وزبەكستاندىق شاحرام انادوۆ, ەۋروپا چەمپيونى, كوسوۆالىق اكيل گياكوۆا جانە جاستار اراسىنداعى الەم بىرىنشىلىگىنىڭ كۇمىس جۇلدەگەرى, گرۋزيالىق گەورگي تەراشۆيليدەن باسىم ءتۇستى. بۇل – ازىرگە اسقاردىڭ سپورتتىق مانسابىنداعى ەڭ قوماقتى تابىس.
100 كيلو سالماق دارەجەسىنىڭ قولا جۇلدەسى ءۇشىن قازاقتىڭ قوس قىرانى تالاستى. العاشقىسى – ەكى بىردەي وليمپياداعا قاتىسىپ, ازيا ويىندارى مەن چەمپيوناتىندا جۇلدەگەرلەر قاتارىنا قوسىلعان 32 جاستاعى يسلام بوزباەۆ. ەكىنشىسى – جاسوسپىرىمدەردىڭ دۇنيەجۇزىلىك ۋنيۆەرسياداسىنىڭ جەڭىمپازى, 22 جاستاعى بەكارىس سادۋاقاس. بۇل تارتىستا ساقا سپورتشىنىڭ مەرەيى ۇستەم بولدى. ەلىمىزدىڭ ەرلەر قۇراماسىنىڭ قورجىنىنا تاعى ءبىر قولانى عالىمجان قىرىقباي سالدى. الىپتارمەن ايقاسقان قازاقتىڭ نار تۇلعالى جىگىتى شەشۋشى تۇستا جاستار اراسىنداعى الەم چەمپيونى, گرۋزيالىق سابا ينانەيشۆيليدى قوس جاۋىرىنىمەن جەرگە قادادى.
ايەلدەر اراسىنداعى جارىستا اسا جەڭىل سالماقتاعى عاليا تىنباەۆا قولا مەدال ءۇشىن تارتىستا جەڭىلىس تاپقاننان كەيىن ەندى بىزگە جۇلدە بۇيىرمايتىن شىعار دەپ ويلادىق. ايتقانداي-اق, تاتاميگە شىققان بۇرىمدىلارىمىز بىرىنەن كەيىن ءبىرى ۇتىلىپ جاتتى. الايدا جارىستىڭ سوڭعى كۇنى اقەركە رامازانوۆا جەرگىلىكتى كورەرمەندەردى ءبىر قاۋانتىپ تاستادى. 22 جاستاعى قازاق قىزى باستاپقى ەكى باسەكەدە الەمدىك رەيتينگتە وزىنەن الدەقايدا جوعارى تۇرعان ەكى قارسىلاسىنان باسىم ءتۇسىپ, جارتىلاي فينالدا نيدەرلاندتىق ماريت كاپسكە جول بەردى. ودان كەيىن فرانتسيالىق كارەن ستيۆەنسوندى ويسىراتا ۇتىپ, قولا مەدالدى موينىنا ءىلدى. ءدال سول ستيۆەنسون سونىڭ الدىندا عانا ءبىزدىڭ كاميليا بەرلىقاشتى جولىنان ىعىستىرعان ەدى.
«Qazaqstan Barysy Grand Slam 2023» ءتۋرنيرىنىڭ دەڭگەيى جوعارى بولعانى سونشالىق, اتاعى الىسقا جايىلعان بالۋانداردىڭ كەيبىرى جۇلدەگە قول جەتكىزە الماي, ەلدەرىنە ەڭسەلەرى ەزىلىپ قايتتى. ولاردىڭ قاتارىندا وليمپيادا چەمپيوندارى – فابيو بازيلە (66 كيلو), حاسان قالمۇرزاەۆ (81 كيلو), پينوت مارگو (70 كيلو), وليمپيادانىڭ كۇمىس جۇلدەگەرى, الەم چەمپيونى گۋرام تۋشيشۆيلي (+100 كيلو), وليمپيادانىڭ كۇمىس جانە الەم چەمپيوناتىنىڭ بەس دۇركىن جۇلدەگەرى تەلما مانتەيرو (57 كيلو), الەم چەمپيونى ياگو ابۋلادزە (66 كيلو), الەم چەمپيوناتىنىڭ جۇلدەگەرلەرى – حۋسسەين قالمۇرزاەۆ (90 كيلو), توما نيكيفوروۆ (100 كيلو), ۋشانگي كوكاۋري (+100 كيلو) جانە تاعى باسقا ساقا سپورتشىلار بار.
