«ەلىمىزدە رۋحاني قۇندىلىعى جوعارى وزگە دە دۇنيەلەرىمىز جەتكىلىكتى. ونىڭ ىشىندە ادامزاتتىڭ اسىل قازىناسى اتانۋعا ابدەن لايىق مۇرالارىمىز بار. قازىر بىرنەشە نىساندى ترانسۇلتتىق اتالىمدار بويىنشا يۋنەسكو تىزىمىنە ەنگىزۋ ءۇشىن ءوتىنىش بەرىلدى. بۇل شارۋا كورشى ەلدەرمەن بىرلەسىپ اتقارىلىپ جاتىر», دەدى مەملەكەت باسشىسى تۇركىستاندا ءوتىپ جاتقان ۇلتتىق قۇرىلتايدىڭ ەكىنشى وتىرىسىندا.
ەسكە سالا كەتسەك, جاقىندا پرەزيدەنتتىڭ ارنايى شاقىرۋىمەن يۋنەسكو-نىڭ باس ديرەكتورى ودرە ازۋلە حانىم قازاقستاندا بولدى.
«ول تۇركىستانعا ادەيى ات باسىن بۇردى. بۇل – بەدەلدى حالىقارالىق ۇيىم باسشىسىنىڭ سوڭعى 10 جىلدا ەلىمىزگە جاساعان العاشقى ساپارى. مەن ازۋلە حانىممەن ارنايى كەزدەستىم. ول ماعان بۋراباي, مارقاكول قورىقتارى جانە «ورتەكە» ونەرى يۋنەسكو تىزىمىنە ەنگىزىلگەنىن راستايتىن قۇجاتتى تابىستادى. مۇنىڭ ءبارى قازاقستاننىڭ تابيعي جانە مادەني مۇراسىن الەمگە تانىتۋعا سەپتىگىن تيگىزەرى ءسوزسىز. بىرەگەي سالت-ءداستۇرىمىزدى ماتەريالدىق ەمەس مۇرالار تىزىمىنە قوسۋعا قاتىستى جۇمىستى جالعاستىرۋ قاجەت», دەدى قاسىم-جومارت توقاەۆ.
وسى تۇستا پرەزيدەنت 2024 جىلى قازاقستاندا V دۇنيەجۇزىلىك كوشپەندىلەر ويىندارى وتەتىنىن ەسكە سالدى.
«قازاقتىڭ تاعى ءبىر ەرەكشەلىگى – كونە داۋىردەن بەرى كەلە جاتقان ءومىر سالتى. وزگە ەلدەر ءبىزدى كوشپەندىلەردىڭ ۇرپاعى رەتىندە بىلەدى. بۇل دا – حالقىمىزدىڭ باستى برەندىنىڭ ءبىرى.
كەلەسى جىلى مەنىڭ شاقىرۋىممەن قازاقستاندا V دۇنيەجۇزىلىك كوشپەندىلەر ويىندارى وتەدى. بۇل قادام ۇلتتىق سپورتتى دامىتا تۇسۋگە زور مۇمكىندىك بەرەدى. سوندىقتان, بايراقتى باسەكەنى جوعارى دەڭگەيدە وتكىزۋىمىز كەرەك», دەدى قاسىم-جومارت كەمەل ۇلى.
