ءماجىلىس دەپۋتاتى ەربولات ساۋرىقوۆتىڭ ايتۋىنشا, وتكەن جىلى قورعانىس مينيسترلىگى اسكەري قىزمەتتىڭ بەدەلىن ارتتىرۋ جۇمىستارىنا باستاماشى بولدى. اتاپ ايتقاندا, قازاقستاننىڭ قارۋلى كۇشتەرى, باسقا دا اسكەرلەرى مەن اسكەري قۇرالىمدارى قاتارىندا مەرزىمدى اسكەري قىزمەتتىڭ بەلگىلەنگەن مەرزىمىن وتەگەن ازاماتتارعا الەۋمەتتىك قولداۋ پاكەتى ۇسىنىلدى. سونىڭ ءبىر باعىتى – ولارعا ءبىلىم بەرۋدە جەڭىلدىكتەر قاراستىرۋ.
– بىرىنشىدەن, قىزمەت اياقتالعاننان كەيىن ەكى جىل ىشىندە ۇبت تاپسىرماي اقىلى نەگىزدە, ال جاۋىنگەرلىك جوعارى ناتيجە كورسەتكەن ازاماتتار جوو ەسەبىنەن تەگىن قابىلدانادى. سونىمەن قاتار ولاردى قورعانىس مينيسترلىگىنىڭ اسكەري وقۋ ورىندارىنا ەمتيحاندارسىز قابىلداۋ كوزدەلگەن, – دەدى قورعانىس ءمينيسترىنىڭ ورىنباسارى سۇلتان كامالەتدينوۆ.
عىلىم جانە جوعارى ءبىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم كوميتەتى توراعاسىنىڭ ورىنباسارى نۇربەك ساپارحودجاەۆ قازىرگى تاڭدا 76 جوعارى وقۋ ورنى باستامانى قولداپ, ەڭ لايىقتى اسكەري قىزمەتكەرگە ءوز قاراجاتى ەسەبىنەن گرانتتار ءبولۋ تۋرالى كەلىسىمگە قول قويعانىن اتاپ ءوتتى. شامامەن 3 مىڭعا جۋىق گرانت بولىنگەن. قارجى نارىعىن رەتتەۋ جانە دامىتۋ اگەنتتىگى توراعاسىنىڭ ءبىرىنشى ورىنباسارى نۇرلان ءابدىراحمانوۆ قورعانىس مينيسترلىگىمەن ءوزارا ىنتىماقتاستىق تۋرالى مەموراندۋم اياسىندا بانكتىك قارىزدار مەن شاعىن نەسيەلەر بويىنشا تولەمدەردى كەيىنگە قالدىرۋ جونىندە مۇددەلى تاراپتاردىڭ ءتيىستى ءىس-قيمىل الگوريتمى ازىرلەنگەنىن ايتتى.
بۇگىنگى تاڭدا 3700 اسكەري قىزمەتكەردىڭ 5500 قارىز بەن شاعىن نەسيە بويىنشا تولەمدەرى كەيىنگە قالدىرىلعان. تالقىلاۋ بارىسىندا ماجىلىسمەن ايدوس سارىم مەرزىمدى اسكەري قىزمەتشىلەرگە جوعارى وقۋ ورىندارىنا گرانتقا تۇسەردە كۆوتا ءبولۋدى زاڭمەن بەلگىلەۋدى ۇسىندى.
– قارجى مينيسترلىگىنىڭ مالىمەتىندە ۇبت-دان وتپەي جوعارى جانە جوعارى وقۋ ورنىنان كەيىنگى ءبىلىم بەرۋ باعدارلامالارى بويىنشا اسكەري قىزمەت وتكەرگەن ازاماتتارعا وقۋعا كونكۋرستان تىس گرانتتار بەرۋ تالاپكەرلەردىڭ باسقا ساناتتارىنا قاتىستى تەڭسىزدىك تۋعىزاتىنى كورسەتىلگەن. الايدا جاقىندا ۇكىمەت پەن جوعارعى اۋديتورلىق پالاتانىڭ 2022 جىلعا ارنالعان رەسپۋبليكالىق بيۋدجەتتىڭ اتقارىلۋى تۋرالى ەسەپتەرىن تالقىلاۋ بارىسىندا 18 مىڭ ءبىلىم گرانتى يگەرىلمەي قالعانى ايتىلدى. بۇل ۇلكەن سومالار عوي, نەگە ءبىز اسكەري قىزمەتكەرلەرگە كۆوتا قوسا المايمىز؟ – دەدى ايدوس سارىم.
– قورعانىس مينيسترلىگىنىڭ باستاماسىن دەپۋتاتتار مەن مەملەكەتتىك ورگاندار قولدايدى دەپ ويلايمىن. پيلوتتىق جوبا ءۇشىن العىس بىلدىرەمىز, ونى ءارى قاراي دامىتۋ كەرەك. وسى جانە باسقا دا جەڭىلدىكتەر زاڭنامالىق قولداۋدى قاجەت ەتەدى, – دەپ قورىتىندىلادى تالقىلاۋدى كوميتەت ءتورايىمى ايگۇل قۇسپان.
وتىرىس بارىسىندا ايتىلعان ۇسىنىستار نەگىزىندە بۇل باعىتتاعى جۇمىستار جالعاسادى.
