«سالاماتتى قازاقستان» مەديتسينالىق پويىزى شاقات ستانساسىنا 13 ماۋسىم كۇنى ساعات 02:03-تە كەلدى. دەنساۋلىق كەرۋەنى اتالعان بەكەتتە ەرتەڭگى قارا كەشكە دەيىن تۇرادى. سونداي-اق پويىز كەستەسىنە پاۆلودار وبلىسىنىڭ كراسنوارمەيكا, سپۋتنيك, تاسقۇدىق, مايقايىڭ, بوزشاكول, ولەڭتى جانە تورعاي سياقتى ستانسالارى ەنگىزىلگەن.
ەستەرىڭىزگە سالا كەتەيىك, پويىزدىڭ مەديتسينالىق قۇرامىنا تەراپەۆت, حيرۋرگ, جالپى تاجىريبە دارىگەرى, نەۆروپاتولوگ, ۋلترادىبىستىق دياگنوستيكا دارىگەرى, اكۋشەر, زەرتحاناشىلار, مەدبيكەلەر, رەنتگەنولوگ, ساۋلەلىك دياگنوستيكا دارىگەرى, ستوماتولوگ, وتولارينگولوگ, پسيحولوگ, وكۋليست, گينەكولوگ جانە ۋرولوگ كىرەدى. پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ باستاماسىمەن العاش رەت ازاماتتارعا ءتيىمدى پسيحولوگيالىق, قۇقىقتىق جانە مەدياتيۆتىك (تاتۋلاستىرۋ) كومەك كورسەتەتىن كاسىبي پسيحولوگ, مەدياتور جانە زاڭگەر جۇمىس ىستەۋدە. بۇدان باسقا, ازاماتتاردىڭ مەملەكەتتىك الەۋمەتتىك قولداۋ الۋ, زەينەتاقى, جاردەماقى, الەۋمەتتىك تولەمدەر جانە اتاۋلى الەۋمەتتىك كومەك الۋ قۇقىقتارىن قورعاۋ ماسەلەلەرى بويىنشا تەگىن كەڭەستەر وتكىزىلەدى.
جالپى, شقو مەن اباي وبلىسىندا كونسۋلتاتيۆتىك-دياگنوستيكالىق پويىزدىڭ دارىگەرلەرى 7 104 تۇرعىندى, ونىڭ ىشىندە 1 031 بالانى قابىلدادى. دارىگەرلەرگە قارالۋدىڭ جالپى سانى 1 9414. 550 شاعىن حيرۋرگيالىق وپەراتسيا جاسالدى.
تۇرعىندار بولسا, بۇل مۇمكىندىكتەر ءۇشىن العىس جاۋدىرۋدا.
سونىمەن پويىزدىڭ ءار مامانى مۇنشاما ناۋقاستى قاراپ, ەم-دوم جاسادى: جالپى تاجىريبە دارىگەرى, تەراپەۆت, پەدياتر – 1 665 ادام; حيرۋرگ – 2 282; ۋرولوگ – 2 224; نەۆروپاتولوگ – 1 964; وفتالمولوگ – 2 660; لور – 1 425; اكۋشەر-گينەكولوگ – 739; ستوماتولوگ – 1 497; ەكگ – 952; ۋدز – 2936; فلگ – 412 جانە كارديولوگ – 108 ادام.
ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مەدياتورى مەن زاڭگەرى حالىقتى الەۋمەتتىك قولداۋ ماسەلەسىندە اۋقىمدى جۇمىس اتقاردى – شقو 10 شالعاي ستانسا ازاماتتارىنىڭ 510 ءوتىنىشى قابىلدانىپ, 46 مەدياتيۆتىك كەلىسىمگە قول قويىلدى.
– 2013 جىلى اجىراسقان, بۇرىنعى كۇيەۋى اليمەنت تولەمەيتىن ايەلدىڭ جاعدايىن قارادىق. ونىڭ 3 كامەلەتكە تولماعان بالاسى بار, قارت اتا-اناسىمەن بىرگە اپاتتى 2 بولمەلى پاتەردە تۇرادى, كومەك سۇرايدى. مەن اۋدان اكىمىنىڭ ورىنباسارىن شاقىرىپ, وعان جالعا بەرىلەتىن تۇرعىن ۇيگە كەزەككە تۇرۋعا كومەكتەسۋىن ءوتىندىم. ولار كومەكتەسەتىن بولدى. ونىڭ شاعىن بيزنەسى ءۇشىن مادەنيەت ۇيىندەگى بولمەنى جالداۋ اقىسىنسىز ۇسىندى. كۇزدە پاتەر بولىنەدى, دەيدى كاسىبي مەدياتور جانارا وسىپبەكوۆا.
سونداي-اق اباي وبلىسىنىڭ بەس ستانساسىندا 330 ءوتىنىش قابىلدانىپ, 32 مەدياتيۆتىك كەلىسىم جاسالدى (سەمەي پوليگونى اۋدانىندا تۇراتىن تۇرعىندار ءۇشىن الەۋمەتتىك جاردەماقى بولماۋىنىڭ ماسەلەسى – 48, مەملەكەتتىك تۇرعىن ۇيگە كەزەككە قويۋ – 22, جىلجىمايتىن م ۇلىك قۇجاتتارىن رەسىمدەۋ – 31, گرانت بويىنشا شاعىن بيزنەس اشۋ – 55, مۇگەدەكتەرگە جاردەماقى الۋ – 18, اليمەنت تولەۋ – 11, نەسيەنى كەيىنگە قالدىرۋ – 35, جۇمىس ىزدەۋ – 27, قوعامدىق كولىكتىڭ, اۋرۋحانانىڭ, ءدارىحانانىڭ, جۇمىستىڭ بولماۋى ماسەلەسى – 63 ءوتىنىش).
