فوتو كوللاج: uaqyt.info
«سىزدەرگە ءبىر سۇمدىقتى ايتايىن, الماتى وبلىسى قاراساي اۋدانى شالقار اۋىلىندا لومونوسوۆ اتىنداعى 250 بالاعا ارنالعان ورتا مەكتەپ بولعان. سوڭعى جىلدارى تولىعىمەن كاپيتالدى رەمونت جاسالدى, جاڭادان سپورت زالىن سالىپ بەردى. اۋىل بالالارى قۋانىپ جۇرگەندە سول اۋىلدىڭ مەكتەبىن جەكەنىڭ قولىنا ساتىپ جىبەرگەن. كىم ساتادى؟ ارينە, اكىمدىكتەن باسقا كىم ساتادى؟! ول بىرەۋدەن العان, 15 ملن تەڭگەگە ساتقان, ودان تىزبەكتەلىپ, ءارى قاراي 80 ملن تەڭگەگە باسقا بىرەۋگە ساتقان. بۇل ماسەلەنى پروكۋراتۋراعا ايتىپ, قايدا قاراپ وتىرعانىن سۇرادىم. ولار شامامىز كەلمەيدى, سوت شاعىمىمىزدى قابىلدامايدى دەپ وتىر», دەدى دەپۋتات.
سودان كەيىن قاراساي اۋدانىنىڭ اكىمى جاسۇلان ەستەنوۆ 15 ميلليون تەڭگەگە ساتىلىپ كەتكەن مەكتەپكە بايلانىستى سوتقا ارىز تۇسكەنىن العا تارتقان.
«الەۋمەتتىك جەلىلەردە تالقىلانىپ جاتقان شالقار اۋىلىنداعى م.لومونوسوۆ اتىنداعى مەكتەبىنىڭ ەسكى عيماراتى 2018 جىلى 15 224 000 تەڭگەگە ساتىلعان. بۇل عيماراتتى مەملەكەتتىڭ قۇزىرىنا قايتارۋ ءۇشىن مەنىڭ تاپسىرماما سايكەس 2023 جىلدىڭ 9 ناۋرىزى كۇنى الماتى وبلىسىنىڭ مامانداندىرىلعان اۋدانارالىق اكىمشىلىك سوتىنا تالاپ ارىز جولداندى. قوسىمشا قاراساي اۋداندىق پروكۋراتۋراسى تاراپىنان شالقار ورتا مەكتەبىنىڭ ەسكى عيماراتى بويىنشا قاۋلىلاردىڭ كۇشىن جويۋعا تالاپ ارىز بەرىلدى. 25 مامىر جانە 2 ماۋسىمدا سوت وتىرىستارى ءوتتى. ايتايىن دەگەنىم, قۇرمەتتى اۋدان تۇرعىندارى, بۇل جۇمىستى ءبىز ءۇش اي بۇرىن قولعا العانبىز. زاڭعا سايكەس, مەملەكەتكە قايتارىپ, ەل يگىلىگىنە پايدالانامىز», دەدى جاسۇلان ەستەنوۆ.
اۋدان اكىمى سوت ناتيجەسىندە مەكتەپتىڭ مەملەكەتكە قايتارىلعانىن راستادى.
«بۇل ماسەلە بويىنشا ءبىراز سوتتاستىق. 8 ماۋسىم كۇنى مەكتەپتى ساتىپ العان ادام ءوز ەركىمەن عيماراتتى مەملەكەتكە قايتاردى», دەدى ج.ەستەنوۆ.
