قاي ەلدىڭ حالقى باقىتتى؟ بۇل سۇراققا قازاقستان قوعامدىق دامۋ ينستيتۋتىنىڭ ساراپشىسى باۋىرجان سەرىكباەۆ «Egemen Qazastan» گازەتىنە جازعان «باقىت يندەكسى قاي دەڭگەيدە؟» ماقالاسىندا جاۋاپ بەردى.
تاۋەلسىز ساراپشىلاردىڭ زەرتتەۋىنە كوز جۇگىرتسەك, «Global Happiness 2023» كورسەتكىشىن دايىندايتىن «IPSOS» كومپانياسى – 90 نارىقتا جۇمىس ىستەيتىن جانە 18 مىڭنان استام قىزمەتكەرى بار ءىرى ماركەتينگتىك زەرتتەۋ كومپانياسى ەكەنىن اڭعارامىز. بۇل زەرتتەۋ الەمنىڭ 32 ەلىندە ءوتىپ, 18-74 جاس ارالىعىنداعى 22 508 ادامدى قامتىعان. ايتا كەتسەك, زەرتتەۋ «Global Advisor» ونلاين پلاتفورماسى ارقىلى وتكىزىلگەن.
20 ناۋرىز - حالىقارالىق باقىت كۇنى بولىپ ەسەپتەلەتىنىن ءبىرى بىلسە, ەكىنشىسى بىلە بەرمەيدى. بۇۇ باس اسسامبلەياسى 66/281 قارارىن وسى ماسەلەگە باسا نازار اۋدارعان. ازاماتتاردىڭ تۇرمىسى الەۋمەتتىك قامتىلعان جانە دەنى ساۋ بولسا, ولاردىڭ ومىرگە قاناعاتتانۋ دەڭگەيى دە جوعارى.
ايتا كەتەيىك, ءومىر ءسۇرۋ ۇزاقتىعى بويىنشا فينليانديا التى جىل قاتارىنان 1-ورىندا تۇر. ساۋالداما ناتيجەلەرىنە سايكەس, كوپجىلعى سوعىستان زارداپ شەككەن اۋعانستان مەن ليۆان ەڭ باقىتسىز ەلدەر بولىپ سانالادى. مۇنداعى ءومىردىڭ ورتاشا دەڭگەيى ەڭ باقىتتى ون ەلگە قاراعاندا بەس ۇپايعا تومەن.
حالىق تابىسىنىڭ ارتۋى - باقىت يندەكسىنە اسەر ەتەتىن كورسەتكىشتەردىڭ ءبىرى. COVID-19-دىڭ ءۇش جىلىندا جاھاندىق كەدەيلىك كورسەتكىشى ازداپ باسەڭدەگەن. بۇل قۇبىلىس داعدارىس كەزىندە سەنىم مەن الەۋمەتتىك قولداۋدىڭ ادامداردىڭ باقىتىنا قانشالىقتى اسەر ەتەتىنىن كورسەتەدى.
ءۇش جىلعا نەگىزدەلگەن باقىت رەيتينگىندەگى مەملەكەتتەردىڭ كورسەتكىشى 2020-2022 جىلدارى
«World Happiness Report 2023» زەرتتەۋىنە سايكەس, الەمدىك رەيتينگتە العاشقى ۇشتىككە فينليانديا, دانيا مەن يسلانديا مەملەكەتتەرى ەنسە, قازاقستان 44-ورىنعا جايعاسقان.
وسى تۇستا تابىسى جوعارى جانە ورتاشا ەلدەردىڭ ازاماتتارى اراسىندا بىرقاتار ايىرماشىلىق بار ەكەنىن ايتا كەرەك. ماسەلەن, ەكونوميكالىق دامۋعا بايلانىستى تابىسى جوعارى ەلدەردىڭ ازاماتتارى ءوز قاۋىپسىزدىگىنە, ماتەريالدىق مۇلكىنە, ءومىر ءسۇرۋ جاعدايى مەن جۇمىسىنا كوبىرەك كوڭىلى تولادى. ال تابىسى ورتاشا ەلدەردىڭ ازاماتتارى جالپى سەنىم مەن رۋحاني ءومىرى, فيزيكالىق ءال-اۋقاتى, تۋىستارىمەن قارىم-قاتىناسى جانە وزىنە بەرىلەتىن باعاعا كوبىرەك باسىمدىق بەرەدى ەكەن.
