كوپتەن بەرى پاتەرىن كۇتىپ جۇرگەن جانداردىڭ جۇزىندەگى قۋانىش كوڭىل تەربەيدى. سەبەبى تۇرعىن ۇيگە يە بولعانداردىڭ باسىم بولىگى جەتىم جانە اتا-اناسىنىڭ قامقورلىعىنسىز قالعان بالالار, ءى-ءىى توپ مۇگەدەكتەرى, تولىق ەمەس جانە كوپبالالى وتباسىلار, باسقا دا الەۋمەتتىك ءالجۋاز توپتىڭ وكىلدەرى. وسى رەتتە ءوڭىر باسشىسى بەيبىت يساباەۆ جينالعان قاۋىمعا تىلەگىن ارناپ, جاڭا ءۇيدىڭ كىلتىن تابىس ەتتى.
«بۇگىن ەكى بىردەي قۋانىش قاتار كەلىپ وتىر. جەتىسۋ وبلىسىنىڭ قۇرىلعانىنا ءبىر جىل تولدى جانە 8-شاعىن اۋداندا جاڭا ءۇيدى پايدالانۋعا بەرىپ وتىرمىز. تالدىقورعاندا قازىر 15 مىڭداي ادام كەزەكتە تۇر. ازاماتتاردىڭ 15-20 جىلداپ كەزەكتە تۇرۋى – ادىلەتسىزدىك. مۇنداي جاعدايدىڭ قالىپتاسۋىنا جەرگىلىكتى اتقارۋشى ورگانداردىڭ دا كىناسى بار. سوندىقتان ادىلدىكپەن, كەزەكتىڭ رەتىن اشىق ساقتاي وتىرىپ, الداعى 3-4 جىلدا كەزەكتىڭ سانىن ەكى ەسە قىسقارتۋ ءۇشىن قۇرىلىس قارقىنىن جىلدامداتىپ, تۇرعىن ءۇي سالۋ كولەمىن ارتتىرۋدى قولعا الدىق. بۇل رەتتە كەزەكتە تۇرعان حالىقتىڭ الەۋمەتتىك ءالجۋاز توپتارىنا باسا كوڭىل بولىنەتىن بولادى. كەلەسى اپتادا تاعى ءبىر ءۇي بەرىلەدى. شىلدەدە 3 كوپپاتەرلى ءۇي, تامىزدا 4 ءۇي پايدالانۋعا بەرىلەدى. جىل سوڭىنا دەيىن جالپى قالامىزدا 51 كوپپاتەرلى تۇرعىن ءۇي تاپسىرىلادى. وسىلايشا, ەكى مىڭعا جۋىق تۇرعىن باسپانامەن قامتاماسىز ەتىلەدى. بۇل – رەكوردتىق كولەم دەپ ايتۋعا بولادى. وسى ءۇيدىڭ قۇرىلىسىن جۇرگىزگەن جەرگىلىكتى كومپانيا «شىمىر» سەرىكتەستىگىنە العىس ايتامىن. جاڭا ۇيلەرىڭىزدە شاتتىق پەن قۋانىش مول بولسىن!», دەدى ب.يساباەۆ.
بۇگىن جاڭا پاتەرگە يە بولعاندار قاتارىندا «اينالايىن» بالالار ءۇيىنىڭ 12 تاربيەلەنۋشىسى دە بار. «قىرىق جىلدان بەرى تاربيەشى بولىپ ەڭبەك ەتىپ كەلەمىن. بۇگىن ءوزىم باستاۋىش سىنىپتان باستاپ تاربيەلەگەن بالالارىم ءۇيلى بولىپ جاتىر. ولاردىڭ ىشىندە وتباسىن قۇرىپ ۇلگەرگەندەرى دە بار. انا رەتىندە, ۇستاز رەتىندە قۋانىشىم شەكسىز. ەندى بالالارىمىز ءۇشىن الاڭدامايتىن بولدىق, سەبەبى ولاردىڭ ءوز باسپانالارى بار», دەدى م.بەيىسبەكوۆا.
وبلىس اكىمىنىڭ ءباسپاسوز قىزمەتىنىڭ مالىمەتىنشە, بۇل 72 پاتەرلى 9 قاباتتى تۇرعىن ءۇيدى «شىمىر» جشس سالدى. بۇگىن سونىڭ 36 پاتەرلىك 1-بلوگى پايدالانۋعا بەرىلدى. 2-بلوگى كەلەسى اپتادا ىسكە قوسىلادى. بۇل ءۇيدىڭ قۇرىلىسى 2020 جىلى باستالعان بولاتىن. ءۇيدىڭ جالپى الاڭى – 4731,38 م2. قۇرىلىستىڭ قۇنى – 769,6 ملن تەڭگە.
جالپى, وبلىستىڭ قۇرىلعانىنا 1 جىل تولۋىنا وراي اۋدان-قالالاردىڭ بارىندە ءتۇرلى ءىس-شارا ۇيىمداستىرىلدى. ماسەلەن, تەكەلى قالاسىندا 40 وتباسى قونىستويىن تويلادى. كوپپاتەرلى بۇل ۇيگە بيۋدجەت قاراجاتىنان 546 ملن تەڭگە جۇمسالدى. سول سياقتى وتكەن جىلى وبلىس قۇرىلعان 8 ماۋسىمدا ومىرگە كەلگەن بۇگىنگى 1 جاسار 42 سابيگە وبلىس اكىمىنىڭ قۇتتىقتاۋ حاتى مەن ۆەلوسيپەد-كولياسكا سىيعا تارتىلدى.
ءى.جانسۇگىروۆ اتىنداعى جەتىسۋ ۋنيۆەرسيتەتىنىڭ ستاديونىندا فۋتبولدان جولداستىق كەزدەسۋلەر وتكىزىلدى. ال كەشكىلىك «جاستار» ساياباعىندا وبلىس كۇنىنە ارنالعان مەرەكەلىك ءىس-شارالار, كونتسەرتتىك باعدارلامالار جالعاسىپ, وندا بىرقاتار جەتىسۋلىق ازاماتقا ءوڭىردىڭ دامۋىنا قوسقان ەلەۋلى ۇلەسى ءۇشىن بىرنەشە نوميناتسيا بويىنشا ارنايى سىيلىق تاپسىرىلدى.
جەتىسۋ وبلىسى
