ءابسوليۋتتى ماندەگى جىلدىق ءوسىم سوڭعى ءتورت جىلدا رەكوردتى كورسەتكىشكە يە. سونداي-اق 12 ايدا زاڭدى تۇلعالار سانى دا 6 پايىزعا (30,1 مىڭ بىرلىككە) ارتىپ, جالپى سانى 513,6 مىڭعا جەتكەن. ازىرگە ءوسىم درايۆەرى شاعىن بيزنەس بولىپ تۇر. زاڭدى تۇلعالاردىڭ 98 پايىزدان استامى وسى سەگمەنتكە تيەسىلى.
زاڭدى تۇلعالاردىڭ جىلدىق ءوسىمىنىڭ 40 پايىزدان استامىن (12,4 مىڭ بىرلىك) شەتەلدىك مەنشىك يەلەرى قالىپتاستىرعان. شەتەلدىك كاسىپورىنداردىڭ ءدال بۇلاي ۇلكەن ۇلەسپەن تىركەلۋى سوڭعى بەس جىلدا العاش رەت بولىپ وتىر.
«جالپى, بۇل رەزيدەنت ەمەستەردىڭ قازاقستاندىق يۋريسديكتسياعا قىزىعۋشىلىعى ارتقانىن اڭعارتادى. اڭگىمە جالعىز ءوزى-اق شەتەلدىك كاسىپورىنداردىڭ جىلدىق ءوسىمىنىڭ 70 پايىزىن (8,7 مىڭ بىرلىك) قامتاماسىز ەتكەن رەسەي تۋرالى بولىپ وتىر», دەپ مالىمدەيدى ءبىرىنشى نەسيە بيۋروسى.
2023 جىلدىڭ ءبىرىنشى توقسانىندا وتكەن توقسانمەن سالىستىرعاندا شەتەلدىك كاسىپورىندار ءوسىمىنىڭ تومەندەۋى 40 پايىزعا جۋىق بولىپتى. مۇنىڭ الدىندا ءۇش توقسان قاتارىنان ءوسىم بايقالعان. دەمەك شەتەلدىك كاسىپورىندار تاراپىنان قازاقستاندا تىركەلۋگە دەگەن سۇرانىس ازايىپ جاتىر دەگەن ءسوز.
«سوڭعى ءۇش جىلدا تىركەلگەن زاڭدى تۇلعالاردىڭ جالپى سانىنداعى وپەراتسيالىق كومپانيالاردىڭ ۇلەسى 10,7 پايىزدىق تارماققا ءوستى. 2023 جىلدىڭ 1 ساۋىرىندەگى جاعداي بويىنشا ول سوڭعى بەس جىلداعى ماكسيمۋمعا – 80,6 پايىزعا جەتتى. ءبىر قىزىعى, رەسەيدىڭ رەزيدەنتتەرى تىركەگەن 10 زاڭدى تۇلعانىڭ تەك بىرەۋى عانا, قىتايدىڭ تورتەۋى تاراتۋ ۇدەرىسىندە», دەيدى اناليتيكتەر.
2022 جىلدىڭ قورىتىندىسى بويىنشا زاڭدى تۇلعالاردىڭ تىركەلۋ سانى سوڭعى بەس جىلداعى ماكسيمۋمعا جەتتى – 51,5 مىڭ بىرلىك. ەڭ كوپ كاسىپورىن ءبىرىنشى توقساندا تىركەلگەن – 12,4 مىڭ. الايدا الدىڭعى توقسانمەن سالىستىرعاندا كورسەتكىش 10 پايىزعا نەمەسە 1,3 مىڭ بىرلىككە قىسقارعان.
