پرەمەر-مينيستر وسى سۇراققا جاۋاپ بەرىپ, ۆەيپ ماسەلەسىنە قاتىستى اتقارىلىپ جاتقان جۇمىستاردى بايانداپ بەردى. دەپۋتاتتار ساۋالىنا بەرىلگەن جاۋاپتا قازىرگى تاڭدا ۇكىمەت ۆەيپ-ونىمدەردى تاراتۋعا شەكتەۋلەردى كۇشەيتۋ ماسەلەسىن قاراستىرىپ جاتقانى ايتىلعان.
«دۇنيەجۇزىلىك دەنساۋلىق ساقتاۋ ۇيىمىنىڭ دەرەكتەرى بويىنشا 33 ەلدە نيكوتيندى تۇتىنۋدىڭ ەلەكتروندىق جۇيەلەرى مەن ۆەيپتەردى ساتۋعا تىيىم سالىنعان. ولاردىڭ قاتارىندا دانيا, نورۆەگيا, ۋرۋگۆاي, ارگەنتينا, پاناما, برازيليا, مەكسيكا, كانادا, تايلاند, ءۇندىستان, گونكونگ, سينگاپۋر, مالايزيا, فيليپپين, ليۆان, قاتار, ومان, يوردانيا بار. سونداي-اق 79 ەلدە بۇل ونىمدەردى قوعامدىق ورىنداردا پايدالانۋعا, ولاردى جارنامالاۋعا, ناسيحاتتاۋعا جانە دەمەۋشىلىككە تىيىم سالاتىن نەمەسە قاپتامادا دەنساۋلىققا زيان ەكەندىگى تۋرالى ەسكەرتۋلەردى كورسەتۋدى تالاپ ەتەتىن كەم دەگەندە ءبىر ءىشىنارا ءىس-شارا قابىلدانعان», دەپ اتاپ وتەدى ۇكىمەت باسشىسى جاۋابىندا.
پرەمەر-ءمينيستردىڭ ايتۋىنشا, ۆەيپ-ءونىمنىڭ اينالىمىنا تىيىم سالۋ نورماتيۆتىك-قۇقىقتىق اكتىلەرگە تۇزەتۋلەر ەنگىزۋدى كوزدەيدى. «قۇقىقتىق اكتىلەر تۋرالى» زاڭنىڭ 19-بابىنىڭ 3-تارماعىنا سايكەس جەكە كاسىپكەرلىك سۋبەكتىلەرىنىڭ مۇددەلەرىن قوزعايتىن نورماتيۆتىك-قۇقىقتىق اكتىلەر جوبالارىنا قاتىستى كاسىپكەرلىك كودەكس بەلگىلەگەن جاعدايلاردا جانە تارتىپپەن رەتتەۋشىلىك اسەرگە تالداۋ جۇرگىزىلەدى.
«وسى جىلعى 31 مامىردا مۇددەلى مەملەكەتتىك ورگانداردىڭ, قوعامدىق بىرلەستىكتەردىڭ, ازاماتتىق قوعام مەن بيزنەس-قوعامداستىق وكىلدەرىنىڭ قاتىسۋىمەن كاسىپكەرلىك قىزمەتتى رەتتەۋ ماسەلەلەرى جونىندەگى ۆەدومستۆوارالىق كوميسسيانىڭ جانىنداعى ساراپتاما توبىنىڭ وتىرىسى وتكىزىلدى. وندا ۆەيپ-ونىمدەردى تاراتۋعا شەكتەۋلەردى كۇشەيتۋ بويىنشا ءتۇرلى ۇسىنىستار قارالدى. قازىرگى ۋاقىتتا ۆەيپ-ءونىمنىڭ اينالىمىنا تولىق تىيىم سالۋدى كوزدەيتىن نورما رەتتەۋشىلىك اسەرگە تالداۋ راسىمىنەن ءوتىپ جاتىر. ۇكىمەت وسى نورمانى قولدايدى», دەيدى ءاليحان سمايىلوۆ.
ءماجىلىس قاراۋىنا ەنگەن دەنساۋلىق ساقتاۋ ماسەلەلەرى بويىنشا زاڭ جوباسىندا «ۆەيپ» جانە «ەلەكتروندىق سيگارەتا» ۇعىمدارىن ءبولۋ, جيىرما ءبىر جاسقا تولماعان ادامدارعا تەمەكى مەن تەمەكى بۇيىمدارىن, ونىڭ ىشىندە تۇتىنۋدىڭ ەلەكتروندىق جۇيەلەرىن (ۆەيپتەردى) جانە ولارعا ارنالعان سۇيىقتىقتاردى ساتقانى ءۇشىن اكىمشىلىك جاۋاپكەرشىلىكتى كۇشەيتۋ كوزدەلگەن.
