البەتتە, كىسىنىڭ ءبارى رومانس, اريا, روك, دجاز, پوپ جانرىنداعى شىعارمالار تىڭدامايتىنى انىق. ولاي بولعاندا ادامزات اتاۋلىنىڭ تالعامى دا, تانىمى دا ءبىرتۇتاس بولىپ كەتەتىن ەدى عوي. قىسقاسى, تالعامعا تالاس جوق.
مۋزىكا دانىشپاندارىنىڭ ءتۇرلى پىكىرى بار. سولاردىڭ ءبىرازى مۋزىكادا ۇلت بولمايتىنىن, ادامزاتقا ورتاق ەكەنىن ءجيى ايتادى. راسىندا دا سولاي-اۋ. بىلەتىندەر مۋزىكانىڭ ىرعاعىنان ونىڭ تۇپكى ويى بەلگىلى بولادى دەسەدى. وعان دا ەشكىمنىڭ تالاسى جوق شىعار. ويتكەنى ءار ۇلتتىڭ بولمىسىن ونىڭ مۋزىكاسى تانىتادى ەمەس پە؟ قالاي الىپ قاراساق تا, جاقسى شىعارما – جانعا ءدارۋ.
سوڭعى ۋاقىتتا كوپشىلىكتىڭ كوڭىلىنە قونعان «تاپتىم-اۋ سەنى» دەگەن ءان تازا يمپروۆيزاتسيادان تۋعان شىعارما دەسەدى بىلەتىندەر. الايدا ءاننىڭ ىشكى مازمۇنىندا ادام تاعدىرى, ارمانى مەن مۇڭى تۇر. ساعىنىش سازى دەپ تە باعالاۋعا بولاتىن سىڭايلى.
ءدال وسى تۋىندى قازاق مەلوماندارىنا قازبەك قۇرايىش دەگەن ەسىمدى تانىتتى. 2020 جىلى جازىلعان تۋىندى اۋەلدە ءانشى ەرنار اماندىقتىڭ ورىنداۋىندا تارالدى. جاس ءانشىنىڭ ورىنداۋىندا ءان بەلگىلى ءبىر دەڭگەيدە ءوز اۋديتورياسىن تاپقانىمەن, شىعارمانىڭ باعى جىل بۇرىن جانعان سەكىلدى كورىنەدى دە تۇرادى. انىعىراق ايتساق, ءاننىڭ ەكىنشى تىنىسى ارادا ەكى جىلعا جەتەقابىل ۋاقىت وتكەندە اشىلعان سياقتى.
ءيا, شامامەن ءبىر جىل بۇرىن عانا ليريكالىق ءان شىن مانىندە حيتكە اينالىپ شىعا كەلگەنى ءمالىم. نەگە ەكەنىن كىم ءبىلسىن, شىعارما اۆتورى شىرقاعاننان كەيىن تۋىندى باسقا ءبىر سيپات العانداي بولدى. بالكىم, اۆتوردىڭ جانىنان شىققان ءان تىڭدارمانعا بۇرىنعىدان قاتتى جاقىن بولا تۇسكەن شىعار. مۇمكىن قازبەك قۇرايىشتىڭ جانعا جايلى داۋسى جۇرتتى ەلەڭ ەتكىزدى مە ەكەن؟
«تاپتىم-اۋ سەنى,
جۇرەگىمنىڭ ەمى.
ءوزىڭسىز مۇلدە,
جارالى جان ەدىم»
دەپ كەلەتىن ءاننىڭ قايىرماسى مەن ءانشىنىڭ شىعارمانى ورىنداۋ مانەرى ءبىر-بىرىمەن تاماشا ۇيلەسىم تاپقانىنا ەشكىمنىڭ كۇماندانباسى انىق. قالاي دەسەك تە, قازىرگى انشىلەردىڭ جولى مەن ءجونى باسقاشا. ۋاقىتتىڭ اعىمىنان قالماۋعا تىرىسادى. ەڭ باستىسى, جاڭا تولقىن جاستاردىڭ تالعامىمەن ساناسادى. سول تاۋەكەلدەرى بەلگىلى ءبىر دارەجەدە ءوزىن اقتاپ تا جاتادى...
ءبىر قاراعاندا ليريكالىق شىعارما بوزبالا مەن جىگىت بىتكەننىڭ رومانتيكالىق گيمنىنە اينالۋعا ءتيىس سياقتى كورىنەتىن. نەگە ەكەنىن كىم ءبىلسىن؟ الايدا ءدال وسى ءان ارۋلاردىڭ جانىنا جاقىن بولىپ شىعا كەلدى. ىرعاقتىڭ قۇدىرەتى مە, الدە ماتىندەگى تارماقتار ما؟ بالكىم, شىعارمانىڭ بۇگىنگى كۇننىڭ تىنىسىمەن تاراعانى سەبەپ بولعان شىعار؟..
قازىر ءبارىن الەۋمەتتىك جەلى ارقىلى باعدارلاپ وتىراتىن بولدىق قوي. سول الەۋجەلىدە بويجەتكەن بىتكەننىڭ باسىم بولىگى وسى ءاندى ءبولىسىپ الەك بولعانىنا قاراعاندا شىعارما نازىك جاندىلاردىڭ جان سارايىنا ابدەن ورنىعىپ العانىنا ەشكىمنىڭ كۇمانى جوق.
«الاڭ بوپ جانىم ءجۇر ەدىم,
سوعاتىن اۋىر جۇرەگىم.
كىم ەندى مەنى جەتكىزەدى دەپ
ارماندارىما»
دەپ باستالاتىن ءاننىڭ العاشقى شۋماعىنان بەيمازا جاننىڭ مۇڭى ايقىن اڭعارىلىپ تۇر. جانارىن مۇڭ تورلاعان كىسىنىڭ جان ازابىنداي ەستىلە مە, قالاي ءوزى؟
الايدا كومپوزيتور مۇنى ايقايمەن ەمەس, سابىرمەن جەتكىزەدى. دۇرىسى, جان الەمىن الاساپىران ەتكەن كوڭىل-كۇي اۋانىن باپپەن باياندايدى, سىر قىلىپ اقتارادى. اقيقاتىندا ءاننىڭ تابيعاتىندا مۇڭ شاعۋ, اشىنۋ جوق, تەك بايىپپەن ءوز تاريحىن جەتكىزۋ عانا بار. سونىسىمەن-اق جۇرتتىڭ كوڭىلىنەن شىعىپ وتىر.
راسىندا ءبىرىنشى شۋماق تىڭدارمان جانىنا اۋىر تيگەنىمەن, ارمەن قاراي ءاننىڭ قايىرماسىن تىڭداعان كىسى تاعى دا باياۋ ءاننىڭ ىرعاعىنا تەربەتىلىپ, ادام جانىنىڭ ەمىن نوتادان عانا تابۋعا بولادى دەگەن پالساپاعا يلانا تۇسەدى.
ەۋروپانىڭ كەيبىر ەلدەرىندە اۆتوكولىكتە كوپ تىڭدالاتىن شىعارمانى حالىق ماحابباتىنا يە بولعان تۋىندى دەپ باعالايدى ەكەن. «تاپتىم-اۋ سەنى» ءانى دە سول ساناتقا جاتاتىن سياقتى. ويتكەنى جول جۇرگەندە جۇرتتىڭ كولىگىنەن وسى ءاندى ءجيى ەستيمىز.
ءاربىر شىعارمانىڭ ءوز-وزىنە ولشەپ بەرگەن ۋاقىتى بولادى. عۇلامالاردىڭ پايىمىنا سالساق, كلاسسيكا عانا ماڭگىلىك عۇمىر كەشەدى. البەتتە, اڭگىمە ماۋسىمدىق اندەر حاقىندا ەكەنىن سەزىپ وتىرعان شىعارسىز. قازىرگى قازاق تويلارىنا قاراپ وتىرىپ, «تاپتىم-اۋ سەنى» ءانى قۋانىش داستارحانىنىڭ سانىنە اينالىپ كەتكەنىن بايقاي تۇسەمىز. بۇل تەك ماۋسىمدىق قۇبىلىس پا, الدە ادەمى ءاننىڭ توي ءۆالسى رەتىندەگى عۇمىرى ۇزاق پا, كىم ءبىلسىن؟
دەرەكتەرگە سەنسەك, 2020 جىلى جازىلعان ءاننىڭ ءوز تاريحى بار. كومپوزيتوردىڭ ارىپتەستەرىنىڭ ايتۋىنشا, قازبەك قۇرايىش ءاندى اپكەسى تۇرمىس قۇرعاندا يمپروۆيزاتسيامەن جازعان كورىنەدى. بالكىم, سوندىقتان دا ءان ارۋلاردىڭ بەيرەسمي گيمنىنە اينالىپ كەتكەن بولار... ونىڭ ۇستىنە جۇرت ايتاتىن «فيشكا», ياعني كىلت ءسوزى دە ەلدى ەلەڭ ەتكىزەتىن شىعار. قالاي بولعان كۇندە دە «تاپتىم-اۋ سەنى» دەگەن ءسوز جانعا جىلىلىق ۇيالاتادى عوي.
يۋتۋبتە ءاننىڭ قارالىمى 22 ميلليونعا جەتىپتى. تسيفرعا قاراپ-اق شىعارمانىڭ قازاقستان اۋماعىنان اسىپ كەتكەنىن اڭعارامىز. ال ءان استىنا جازىلعان پىكىرلەردەن تىڭدارمانداردىڭ ءتۇرلى ەموتسياسىن بايقاي تۇسەمىز. تىڭدارمانداردىڭ باسىم بولىگى «وسى ءاندى تىڭداسام, جىلاپ الامىن» دەگەن سىڭايدا وي ءبولىسىپتى. سوعان قاراعاندا ليريكالىق شىعارمانى «جۇرتتى جىلاتقان ءان» دەپ تە باعالاۋعا بولاتىن سەكىلدى.
