ارينە, ءجاميلانىڭ وسىنداي بيىك بەلەستەن كورىنۋى تەگىن ەمەس. العاش رەت وسىدان بەس جىل بۇرىن 23 جاستاعىلار اراسىنداعى الەم بىرىنشىلىگىندە باس جۇلدەنى ولجالاعاننان كەيىن قىراعى مامانداردان باستاپ قاتارداعى كورەرمەندەرگە دەيىن بۇل بالۋاننىڭ ءار قادامىن ءجىتى قاداعالاۋدا. سول كەزدەن بەرى باقبەرگەنوۆا الەم چەمپيوناتىندا ەكى رەت كۇمىس مەدال يەلەندى. 2021 جىلى وسلوداعى جارىستىڭ فينالىندا جاپونيالىق ماساكو فۋرۋيتيدەن ۇتىلسا, 2022 جىلى بەلگرادتا امەريكالىق ەلو اميتكە ەسە جىبەردى. ازيا چەمپيوناتىندا ول بەس جۇلدە الدى. 2020 جىلى نيۋ-دەليدە, 2022 جىلى ۇلانباتىردا جانە 2023 جىلى استانادا التىننان القا تاقسا, 2021 جىلى الماتىدا كۇمىسپەن كۇپتەلدى. 2019 جىلى سياندا قولاعا قول سوزدى. ءدال سول جىلى كونيادا وتكەن يسلام ىنتىماقتاستىعى ويىندارىندا ءۇشىنشى ورىنعا تابان تىرەدى. كۇنى كەشە عانا ءجاميلا بىشكەكتە جالاۋى جەلبىرەگەن رەيتينگتىك تۋرنيردە قارسىلاس شاق كەلتىرمەدى. وسىنداي وراسان زور تابىستارىنىڭ ارقاسىندا 27 جاستاعى قازاق قىزى الەمدىك رەيتينگتە جەكە-دارا كوش باستاپ تۇر.
ءجاميلانىڭ سىڭارى ءمادينا باقبەرگەنوۆانىڭ دا مىقتى بالۋان ەكەنىن جانكۇيەرلەر جاقسى بىلەدى. 68 كيلو سالماقتا كۇرەسىپ جۇرگەن ول جاستاردىڭ الەم (U-23) جانە قۇرلىق بىرىنشىلىكتەرىندە جۇلدەگەرلەر قاتارىنان كورىندى. ازيا چەمپيوناتىندا ءۇش رەت ولجاعا كەنەلدى. بىلتىر موڭعوليانىڭ استاناسىندا اپالى-ءسىڭىلىلى باقبەرگەنوۆالار بىرىنەن كەيىن ءبىرى قۇرلىقتىڭ باستى دوداسىنىڭ التىن تۇعىرىنا كوتەرىلگەندە قۋانباعان, شاتتانباعان قازاق جوق-اۋ, ءسىرا! تۇرمىسقا شىققاننان كەيىن ءمادينا كوپ جارىستاردا بوي كورسەتكەن جوق. سول سەبەپتى دە بۇل جولى ول رەيتينگتە ۇزدىكتەر ساناتىنا قوسىلا المادى.
UWW رەيتينگىندە مىقتىلار قاتارىندا جۇرگەن تاعى ءبىر بۇرىمدىمىز – مارينا سەدنەۆا. 55 كيلو سالماقتا بەلدەسەتىن وتانداسىمىز بەسىنشى ورىندى ەنشىلەدى. 27 جاستاعى سپورتشى جاستاردىڭ ازيا جانە الەم بىرىنشىلىكتەرىندە (U-23) ەكى رەت قولا مەدال يەمدەندى. قۇرلىق چەمپيونى (U-23) دەگەن اتاعى بار. بيىل ول دا بىشكەكتەگى رەيتينگتىك جارىستا الدىنا جان سالمادى. ۇلتى ورىس بولعانىمەن, مارينا وسىدان ءۇش جىل بۇرىن قازاقتىڭ قۇتتى شاڭىراعىنا كەلىن بولىپ ءتۇستى. ونىڭ كۇيەۋى – ەلىمىزدىڭ تاڭداۋلى ەركىن كۇرەس شەبەرلەرىنىڭ ءبىرى نۇرقوجا قايپانوۆ. قازىر ەكەۋى ومىردە دە, سپورتتا دا قول ۇستاسىپ بىرگە ءجۇر. ءسوز ورايى كەلگەندە مارينانىڭ قازاق ءتىلىن دە جەتىك مەڭگەرگەنىن ايتا كەتكەن ابزال. سونداي-اق 59 كيلو سالماق دارەجەسىندە ونەر كورسەتىپ جۇرگەن 24 جاستاعى ديانا قايۋموۆا دا ۇزدىك بەستىكتى تۇيىندەپ تۇر.
وسى سپورت ءتۇرىن سەرىك ەتكەن جەرلەستەرىمىزدىڭ اراسىنان ەڭ اۋىر سالماقتا كۇش سىناسىپ جۇرگەن 27 جاستاعى گۇلمارال ەركەباەۆا مەن 31 جاستاعى ەلميرا سىزدىقوۆانىڭ جۋىق ارادا توپ-10-نىڭ قاتارىنا قوسىلۋعا جاقسى مۇمكىندىكتەرى بار. ەكەۋىنىڭ دە قازىرگى قارقىنى جامان ەمەس. ازيا چەمپيوناتتارىندا ءتورت قولانى قورجىنعا سالعان گۇلمارال 12-ورىنعا جايعاسسا, ريو وليمپياداسى مەن ازيا ويىندارىنىڭ قولا جۇلدەگەرى, قۇرلىقتىڭ ەكى دۇركىن چەمپيونى جانە بەس دۇركىن جۇلدەگەرى دەگەن دارداي اتاعى بار ەلميرا ءوزىنىڭ كوماندالىق ارىپتەسىنەن ەكى ساتى عانا تومەن تۇر.
ايەلدەر كۇرەسىنەن 10 سالماق دارەجەسى بويىنشا جۇلدەلەر ساراپقا سالىنسا, سونىڭ ۇشەۋىندە جاپونيا قۇراما كومانداسىنىڭ مۇشەلەرى الدارىنا جان سالار ەمەس. ال قالعان سالماقتاردا تىزگىن اقش, ۋكراينا, قىتاي, مولدوۆا, ەكۆادور, قازاقستان جانە مىسىر ەلى وكىلدەرىنىڭ قولىندا. توپ-10 بالۋاننىڭ قاتارىندا دا جاپونداردىڭ قاراسى مول. كۇنشىعىس ەلىنىڭ 9 قىزى سول ساناتتا. جاپونيادان ۋكراينا, اقش جانە قىتاي دا قالىساتىن ەمەس. ولاردىڭ ارقايسىسىنىڭ 8 سپورتشىسىنىڭ تەگەۋرىنى وتە كۇشتى. سونداي-اق بۇل تىزىمدە موڭعوليانىڭ – 7, كانادا مەن ءۇندىستاننىڭ – 5, پولشا مەن رۋمىنيانىڭ – 4, وزبەكستان, قازاقستان, مولدوۆا, قىرعىزستان, بولگاريا, فرانتسيا جانە تۇركيانىڭ 3 بۇرىمدىسى بار.
سونداي-اق كۇنى كەشە عانا ەركىن كۇرەس پەن گرەك-ريم كۇرەسىنىڭ دە الەمدىك رەيتينگى جاڭاردى. بۇل جاڭالىقتى ءبىز گازەتىمىزدىڭ كەلەسى ساندارىنىڭ بىرىندە جاريالايمىز.
ايەلدەر كۇرەسىنەن الەمدىك رەيتينگتەگى ۇزدىك ءۇش بالۋان
50 كيلو: 1. يۋي سۋساكي (جاپونيا), 2. وتگونجارعال دولگورجاۆ (موڭعوليا), 3. اننا لۋكاسياك (پولشا).
53 كيلو: 1. لۋسيا ياميلەت ەپەس گۋسمان (ەكۆادور), 2. دومينيك وليۆيا پەرريش (اقش), 3. باتحۋياگين حۋلان (موڭعوليا).
55 كيلو: 1. مايۋ مۋكايدا (جاپونيا), 2. لورەنا كارلا گونزالەس (كانادا), 3. ولەكساندرا حومەنەتس (ۋكراينا).
57 كيلو: 1. الينا گرۋشينا-اكوبيا (ۋكراينا), 2. حەلەن ماروۋليس (اقش), 3. تسۋگۋمي ساكۋراي (جاپونيا).
59 كيلو: 1. اناستاسيا نيكيتا (مولدوۆا), 2. گرەيس ياكوب بۋللەن (نورۆەگيا), 3. ساكۋرا ماتوكي (جاپونيا).
62 كيلو: 1. كايلا كوللين ميراكل (اقش), 2. لۋو سياوتسزيۋان (قىتاي), 3. ايسۇلۋ تىنىبەكوۆا (قىرعىزستان).
65 كيلو: 1. جيا لونگ (قىتاي), 2. ميۆا موريكاۆا (جاپونيا), 3. مەللوري ۆەلتە (اقش).
68 كيلو: 1. امي يشي (جاپونيا), 2. تاميرا مەنسا-ستوك (اقش), 3. چجوۋ فەن (قىتاي).
72 كيلو: 1. ءجاميلا باقبەرگەنوۆا (قازاقستان), 2. ەلو اميت (اقش), 3. نيكولەتا انحەل (رۋمىنيا).
76 كيلو: 1. سامار حامزا (مىسىر), 2. ياسەمين ادار (تۇركيا), 3. گەنەزيس رەاسكو ۆالدەس (ەكۆادور).
