سەنات توراعاسى ماۋلەن اشىمباەۆ فورۋم نەگىزگى جاھاندىق پروبلەمالاردى بىرلەسىپ شەشۋ ءۇشىن حالىقارالىق قوعامداستىقتى ورتاق ماقساتقا جۇمىلدىرۋدى كوزدەيتىنىن اتاپ ءوتتى. سونداي-اق ول ديپلوماتيا مەن حالىقارالىق قۇقىق جۇيەلەرىنىڭ السىرەۋىنە بايلانىستى الەمدىك ديالوگتىڭ جاڭا فورماتىنىڭ وزەكتىلىگى ارتىپ وتىرعانىن ايتتى.
«بۇل جاعدايدا ورتا مەملەكەتتەردىڭ ءرولىن قايتا قاراستىرۋ كەرەك. تەڭدىك, ديالوگ, ينكليۋزيا, مەملەكەتتەردىڭ اۋماقتىق تۇتاستىعىن قۇرمەتتەۋ قاعيداتتارىنا نەگىزدەلگەن حالىقارالىق ىنتىماقتاستىقتىڭ جاڭا پاراديگماسى قاجەت. مۇنداي جاڭا جاعدايدا ورتا ەلدەر نەگىزگى رولدەردىڭ ءبىرىن اتقارۋعا ءتيىس. تەك ءىرى دەرجاۆالاردىڭ قارىم-قاتىناسى توڭىرەگىندە قالىپتاسقان حالىقارالىق جۇيەدەن ارىلۋدىڭ ماڭىزى زور. قازىرگى تاڭدا جەلىلىك پرينتسيپ بويىنشا قۇرىلعان ينستيتۋتتار ءتيىمدى. وسى تاجىريبەنى حالىقارالىق ينستيتۋتتارعا دا ەنگىزۋگە بولادى», دەدى ماۋلەن اشىمباەۆ.
سەنات توراعاسى حالىقارالىق دەڭگەيدە ديالوگ جانە ينكليۋزيۆتى دامۋ مادەنيەتىن دارىپتەۋدىڭ پەرسپەكتيۆالىق باعىتتارىنا توقتالدى.
«بىرىنشىدەن, بىتىمگەرشىلىك باستامالاردى دارىپتەۋ جانە مۇقتاج ەلدەرگە نەمەسە بەلگىلى ءبىر الەۋمەتتىك توپتارعا گۋمانيتارلىق كومەك كورسەتۋ. ەكىنشىدەن, نەگىزگى حالىقارالىق ينستيتۋتتاردان تىس جاعدايدا ىنتىماقتاستىق پەن ءوزارا ءىس-قيمىلدى نىعايتۋ. ۇشىنشىدەن, بۇگىندە بارلىق ەل بەتپە-بەت كەلىپ وتىرعان وزەكتى ەكولوگيالىق, الەۋمەتتىك, گۋمانيتارلىق جانە وزگە دە پروبلەمالاردى تالقىلاۋعا باستاماشىلىق جاساۋ. سونىمەن بىرگە رەسۋرستاردى عىلىمي زەرتتەۋلەرگە, ادامزاتتىڭ بولاشاعى ءۇشىن ماڭىزدى سالالارداعى جوبالارعا باعىتتاۋدىڭ ءمانى زور. ونىڭ ىشىندە مەديتسينا, بيوحيميا, جاسىل تەحنولوگيا جانە تاعى باسقا باعىتتاردى اتاپ وتۋگە بولادى», دەدى ماۋلەن اشىمباەۆ.
جاھاندىق دەڭگەيدە مادەنيەتتەر مەن وركەنيەتتەر اراسىندا التىن كوپىر بولاتىن تاعى ءبىر ءتيىمدى باستاما - الەمدىك جانە ءداستۇرلى دىندەر ليدەرلەرىنىڭ سەزى.
«بۇگىندە قازاقستان رۋحاني ديپلوماتيانىڭ مويىندالعان حالىقارالىق ورتالىقتارىنىڭ ءبىرى رەتىندە قالىپتاستى. پرەزيدەنتىمىز قاسىم-جومارت كەمەل ۇلى توقاەۆتىڭ باستاماسىمەن ءدىن ليدەرلەرىنىڭ يدەيالارىن, ۇسىنىستارى مەن ۋاعدالاستىقتارىن دارىپتەۋ ءۇشىن الەمنىڭ رۋحاني ورتالىقتارىندا دوڭگەلەك ۇستەلدەر وتكىزۋ قولعا الىندى. قازاقستاننىڭ باستامالارى الەمدەگى ماڭىزدى پروبلەمالاردى شەشۋ كەزىندەگى ورتا ەلدەردىڭ مۇمكىندىكتەرىن كورسەتەدى. مۇنداي قادام دامىعان, تۇراقتى, ينكليۋزيۆتى جانە قاۋىپسىز الەم قۇرۋىمىزعا ىقپال ەتەتىنى انىق», دەدى ماۋلەن اشىمباەۆ.
