دەلەگاتسيا قۇرامىندا باس كونسۋل تسزيان ۆەي, ساۋدا-ەكونوميكالىق ماسەلەلەر بويىنشا كونسۋل ليۋي انتسي, سونداي-اق ەلىمىزدىڭ سىرتقى ىستەر مينيسترلىگى الماتى قالاسى وكىلدىگى باسشىسىنىڭ ورىنباسارى يسلامبەك رايموۆ, ءمينيستردىڭ كەڭەسشىسى رۋسلان يسكاكوۆ بولدى.
كەزدەسۋ بارىسىندا دەلەگاتسيا مۇشەلەرىن «قازاقستان تەمىر جولى» «الماتى» جشس فيليالى جۇك تاسىمالى بولىمشەسىنىڭ باستىعى نۇرىم جانيازوۆ پەن «التىنكول» ستانساسىنىڭ ديرەكتورى قۋانىش جاقسىبەك تەمىرجول وتكەلىنىڭ پەرسپەكتيۆالىق دامۋ جوسپارلارىمەن تانىستىرسا, جەتىسۋ وبلىستىق مەملەكەتتىك كىرىستەر دەپارتامەنتى باسشىسىنىڭ ورىنباسارى نۇرلان بايمۋلدينوۆ پەن «التىنكول-جول» كەدەن بەكەتىنىڭ باسشىسى ارمان قوجاسباەۆ كەدەندىك تەكسەرۋ مەن راسىمدەۋ شارالارىنداعى ينتەگراتسيالىق ۇيلەسىم, ەلەكتروندىق دەكلاراتسيالاۋ جانە تاۋەكەلدى باسقارۋ ۇدەرىستەرى تۋرالى ايتتى.
«جاركەنت جەرىندەگى «التىنكول» ستانساسى – ەلىمىزدىڭ وڭتۇستىك-شىعىسىنداعى ەۋروپا مەن ازيانىڭ اراسىن جالعاستىرىپ تۇرعان ەڭ ۇلكەن تەمىر جول وتكەلى. سەبەبى «التىنكول» ستانساسى قۇرىلعان ون جىلدان استام ۋاقىت ىشىندە ەكى ەل اراسىنداعى كولىك قاتىناسى مەن تاۋار اينالىمى بىرنەشە ەسە ارتىپ وتىر. اتاپ ايتساق, بيىلعى بەس ايدا ەكى ەل اراسىنداعى كولىك قوزعالىسى وتكەن جىلدىڭ وسى مەرزىمىمەن سالىستىرعاندا – 131, ەكسپورتتىق الەۋەت – 279, ترانزيتتىك تاۋار تاسىمالى 20 پايىزعا ارتتى», دەيدى جەتىسۋ وبلىسى بويىنشا مەملەكەتتىك كىرىستەر دەپارتامەنتى «التىنكول-جول» كەدەن بەكەتى باسشىسىنىڭ ورىنباسارى بەكەن نۇراحمەتوۆ.
ونىڭ ايتۋىنشا, يمپورتتالعان تاۋاردىڭ كەدەندىك قۇنى 466 ميلليون 492 مىڭ (سالماعى 131 752 ت), ەكسپورتتالعان تاۋاردىڭ كەدەندىك قۇنى 4 ملرد 325 ملن (سالماعى 1 849 840 ت), ترانزيتتىك تاۋاردىڭ كەدەندىك قۇنى 10 ملرد 410 ملن دوللاردان (سالماعى 2 168 459 ت) اسقان. وعان قوسا اتالعان تەمىرجول وتكەلى ارقىلى تاۋار تاسىمالداۋعا مۇددەلى ەلدەردىڭ سانى قىرىقتان اسقانىن ايتا كەتكەنىمىز ارتىق بولماس. ونىڭ ىشىندە تمد ەلدەرى عانا ەمەس, دامىعان ەۋروپا مەن وڭتۇستىك شىعىس ازيا مەملەكەتتەرى دە بار. مىسالى, ەكونوميكاسى دامىعان شۆەتسيا, شۆەيتساريا, فرانتسيا, فينليانديا, چەحيا, سلوۆاكيا, سينگاپۋر, يتاليا, اۋستريا, گەرمانيا, نورۆەگيا, يسپانيا, يتاليا, ت.ب. ەلدەرگە جونەلتىلەتىن ترانزيتتىك تاسىمال دا كۇن سايىن ارتىپ كەلەدى.
كەزدەسۋدە بولاشاقتا ەكى ەل اراسىنداعى سىرتقى ەكونوميكالىق قاتىناستار نەگىزىندە ترانزيتتىك الەۋەتتى دامىتۋعا, ينۆەستيتسيالىق جوبالاردى كوبەيتۋگە جانە كەيبىر پروبلەمالىق ماسەلەلەرگە بايلانىستى وزەكتى اڭگىمەلەر قوزعالدى. سونداي-اق دەلەگاتسيا «التىنكول-جول» كەدەن بەكەتىنەن كەيىن «نۇر جولى» جانە شەكارا ماڭى حالىقارالىق ىنتىماقتاستىق ورتالىعى «قورعاس» كەدەن بەكەتتەرىنىڭ دە جۇمىسىمەن تانىستى.
جەتىسۋ وبلىسى
