«بۇدان بىلاي ەندى ءوزىمىز ەمدەيمىز. ەكى نەيروحيرۋرگ پەن ءبىر جاقسۇيەك-بەت حيرۋرگى يزرايلگە, گەرمانياعا وقۋعا بارادى. ولار جاڭا اپپاراتتارمەن جۇمىس ىستەۋدى ۇيرەنەدى», دەيدى اۋرۋحانا ديرەكتورى ارعىن بيدايباەۆ. ال دارىگەرلەردى وقىتۋعا بيۋدجەتتەن ارنايى قاراجات ءبولىنىپ وتىر.
دەنساۋلىق ساقتاۋ باسقارماسى باسشىسى بيبىگۇل تولەگەنوۆا ول سومانىڭ 200 ملن تەڭگە كولەمىندە ەكەنىن اتادى. دارىگەرلەردىڭ بىلىكتىلىگىن شىڭداۋ مۇنىمەن شەكتەلمەيدى. الداعى ۋاقىتتا وسىندا شەتەلدىك دارىگەرلەر ارنايى شاقىرىلاتىن بولادى. ولار ءبىزدىڭ ماماندارعا شەبەرلىك سىنىپتارىن وتكىزەدى. وسىلايشا, بالالاردى ەمدەۋ دامي تۇسپەك.
جالپى, اۋرۋحانادا مامان تاپشىلىعى جوق. باسقارما اۋرۋحانادا 128 پەدياتردىڭ, 136 مەدبيكەنىڭ تولىقتىعىن جەتكىزدى. اۋرۋحانا كوپسالالى بولعاندىقتان, وندا جوسپارلى ەم, شۇعىل كومەك سەكىلدى بارلىق قىزمەت كورسەتىلەدى.
«جابدىقتاردىڭ بارلىعى زاماناۋي. كت بار, متر كۇزگە قاراي كەلەدى. جاپونيادان ارنايى اكەلىنگەن جەتى توسەك بار. ول كۇيىك شالعان بالالارعا ارنالعان. كۇيىك شالعان بالالار ءجيى تۇسەدى. بۇل توسەك بالانىڭ تەرىسى مەن سۇيەگى ويىلماۋىنا ىڭعايلانعان ءارى باكتەريالاردى زارارسىزداندىرادى. ءبىرىنشى قاباتتا دا, ءتورتىنشى قاباتتا دا رەانيماتسيالىق پالاتالار بار. وپەراتسيالىق پالاتالار دەربەس جەلدەتۋمەن قامتاماسىز ەتىلگەن. بۇل «تازا جۇيە» دەپ اتالادى.
اۋرۋحانادا وقىتۋ سىنىپتارى دا قاراستىرىلعان. ءبىر جىلدارى پەدياتريا بويىنشا وقىتۋ توقتاپ قالعان بولاتىن. قازىر ول قايتا قولعا الىندى. وقىتۋ سىنىپتارىندا قاراعاندى مەديتسينا ۋنيۆەرسيتەتىنىڭ پەدياتريا فاكۋلتەتىندە ءبىلىم الاتىندار وقيتىن بولادى», دەيدى بيبىگۇل تولەگەنوۆا.
قۇزىرلى ورىنداردىڭ مالىمدەۋىنشە, اۋرۋحانا ماڭىنا پريشاحتينسكىدەگى پەريناتالدىق ورتالىق تا كوشىرىلەدى. باسقارما بيىل جاڭا پەريناتالدىق ورتالىق جوباسىن ءساتتى قورعاعان. جاڭا جوبا 12 پەريناتالدىق ورتالىق جوباسىنىڭ قاتارىندا. ونىڭ قۇرىلىسى 2025 جىلعا مەجەلەنگەن. ال 14 گەكتار جەر قاراعاندى مەديتسينا ۋنيۆەرسيتەتى كلينيكاسىنىڭ قۇرىلىسىنا ءبولىنىپتى. كلينيكا قۇجاتتارى دەنساۋلىق ساقتاۋ مينيسترلىگىنە ۇسىنىلعان ەكەن. قورىتىندى شىقسا, قۇرىلىس كەلەر جىلى باستالادى.
قاراعاندى
