ارالداعى بالىقشىلار مۇراجايى
بيىل قىزىلوردا وبلىسىنداعى ارال قالاسىندا بالىقشىلار مۇراجايىنىڭ اشىلعانىنا 10 جىل تولىپتى. مۇراجاي ەكسپوزيتسيالارى كەزىندە ارال بالىقشىلارىنىڭ داڭقى شارىقتاپ, وڭىردە بالىق ونەركاسىبى كەڭىنەن قانات جايعانىنان حابار بەرەدى. راريتەت ەسەبىندەگى زاتتار اراسىندا ءارتۇرلى بالىق اۋلاۋ قۇرالى دا بار. كەلۋشىلەردى سونداي-اق تەڭىزدى مەكەندەيتىندەر جونىندە دەرەك بەرەتىن كوللەكتسيالار دا ەرەكشە قىزىقتىرادى.
مۇراجاي ەكسپوزيتسيالارى ارال تەڭىزىنىڭ كونەدەن قازىرگى زامانعا دەيىنگى تاريحىنان سىر شەرتەدى. تەڭىزدى زەرتتەۋ مەن يگەرۋ جۇمىستارىنان, كەمە قاتىناسى مەن بالىق اۋلاۋ ۇدەرىستەرىنەن تولىق ماعلۇمات تاباسىز. سونداي-اق اۋديوتاسپادان تەڭىز تولقىنى مەن شاعالانىڭ داۋىسىن ەستىپ, بالىقشىلار تۋرالى اڭگىمەلەردى تىڭداۋعا بولادى.
مۋزەي اۋلاسىنا وتكەن عاسىردا بالىق شارۋاشىلىعىندا پايدالانىلعان «ارالرىبپروم», ت.توقتاروۆ, ت.الىمبەتوۆ كاتەرلەرى مەن «لەۆ بەرگ» زەرتتەۋ كەمەسىنە رەستاۆراتسيا جاسالىپ, اشىق اسپان استىنداعى ەكسپوزيتسيا رەتىندە قويىلىپتى. وتكەن عاسىردا بالىقشىلار پايدالانعان قۇرال-جابدىقتاردى دا وسى جەردەن تاباسىز.
ارال تەڭىزىندە 30-دان استام بالىق ءتۇرى بولعان ەكەن. ەكولوگيالىق اپاتتىڭ سالدارىنان سولاردىڭ ءبىرازى جويىلىپ كەتكەن. ال سوڭعى جىلدارى كىشى تەڭىز اۋماعىندا بەكىرە تۇقىمداس قىزىل بالىقتار ءوسىرۋ قولعا الىنا باستاپتى.
وتكەن جىلدان باستاپ مادەنيەت جانە سپورت مينيسترلىگى جىل سايىن مادەنيەت جانە ونەر سالاسى ۇيىمدارى مەن قىزمەتكەرلەرىنىڭ اراسىندا «رۋحاني قازىنا» رەسپۋبليكالىق فەستيۆالىن ۇيىمداستىرۋدى قولعا السا, قىزىلوردا وبلىستىق تاريحي-ولكەتانۋ مۋزەيىنە قاراستى ارال اۋداندىق تاريحي-ولكەتانۋ مۋزەيىنىڭ فيليالى «ۇزدىك اۋداندىق (قالالىق) ماڭىزى بار مۋزەي» اتالىمى بويىنشا جەڭىمپاز اتانىپتى. قازاقستاننان قاتىسقان 73 مۋزەيدىڭ اراسىنان بالىقشىلار مۋزەيى ەكسپوزيتسياسىنىڭ قايتالانباس شەشىمىمەن, يننوۆاتسيالىق تەحنولوگيالاردىڭ سوڭعى ۇلگىسىمەن ەرەكشەلەنسە كەرەك.
رۋسلان حامزا,
جۋرناليست
اتىراۋ – ارال – اتىراۋ
باسەكەگە قابىلەتتى جاستار
جوعارى وقۋ ورنىنا كەلگەندەگى ستۋدەنتتەردىڭ باستى ماقساتى – بولاشاق ماماندىقتارىن مەڭگەرۋ, ءبىلىم الىپ, ونى ومىردە قولدانا ءبىلۋ. الايدا ستۋدەنتتىك ءومىر تەك ءبىلىم الۋمەن شەكتەلمەيدى, ءوزىن بارلىق باعىتتا سىناپ كورۋگە جانە ونى بارىنشا ەستەلىكتەرگە تولى ەتىپ وتكىزۋگە مۇمكىندىك بەرەدى. ماسەلەن, بيولوگيا جانە بيوتەحنولوگيا فاكۋلتەتىنىڭ 1 كۋرس ستۋدەنتتەرى 2022-2023 وقۋ جىلىنىڭ العاشقى كۇزگى سەمەسترىنە ۇلكەن قىزىعۋشىلىقپەن قاتىستى.
ال وقۋ جىلىنداعى العاشقى ءىرى ءىس-شارا دەپ 17 قىركۇيەكتە ۇيىمداستىرىلعان ستۋدەنتتەردى قارا شاڭىراق – قازۇۋ-عا رەسمي تۇردە قابىلداۋ ءراسىمىن ايتۋعا بولادى. مەكتەپتى «التىن بەلگىمەن» ۇزدىك بىتىرگەن ستۋدەنتتەر بيولوگيا جانە بيوتەحنولوگيا فاكۋلتەتىنىڭ نامىسىن قورعاپ, سالتاناتتى ساپقا تۇردى. تالانتتى جاستارىمىز وزدەرىن بي جانە ءان ونەرى جاعىنان دا كورسەتە ءبىلدى. تۇتاستاي العاندا, كەش اركەز ەستەرىندە قالارداي ءوتتى. كوپ ۇزاماي ءبىرىنشى كۋرستىقتار وزدەرىنىڭ جولىن باسىپ وتكەن جوعارى كۋرس ستۋدەنتتەرىمەن جاقىن تانىسىپ, ارالاس-قۇرالاس ءجۇرۋ ءۇشىن ولارمەن بىرگە تاۋ بوكتەرىندە دەمالىپ قايتتى. ناتيجەسىندە, فاكۋلتەت ىشىندەگى قارىم-قاتىناس جاقسارىپ, كۋرسارالىق بىرلىك دەڭگەيى جوعارىلاي ءتۇستى.
قازان ايىندا جىل سايىن ءداستۇرلى تۇردە وتكىزىلەتىن «سۇڭقار» ستۋدەنتتەر مەن ماگيسترانتتار كاسىپتىك بيۋروسىنىڭ» ۇيىمداستىرۋىمەن شاعىن فۋتبولدان «دەكان كۋبوگى» ويناتىلدى. سول ايدا Farabi Fest بي بايقاۋىنا قىزۋ دايىندىق ءجۇردى. قاجەت كەزىندە ءبىر-بىرىنە قولداۋ كورسەتكەن ستۋدەنتتەرىمىز فاكۋلتەت اتىن ادەمى قورعاپ شىقتى. دەمالىس ۋاقىتىن دا قىزىقتى ءارى ناتيجەلى وتكىزۋ ماقساتىندا فاكۋلتەت بەلسەندىلەرى ءوزارا تىعىز بايلانىستا جۇمىس ىستەپ, بۇل جايت 1 كۋرس ستۋدەنتتەرىنىڭ باسقا دا جاقسى قىرلارىنىڭ اشىلۋىنا سەپتىگىن تيگىزدى.
ءىس-شارالار قورىتىندىسىندا الداعى ۋاقىتتا قاي باعىتقا باسىمدىق بەرۋ كەرەگى ايقىندالدى.
باعيلا ابدۋللاەۆا,
قازۇۋ بيولوگيا جانە بيوتەحنولوگيا
فاكۋلتەتىنىڭ اعا وقىتۋشىسى
الماتى
تسيفرلىق ساۋاتتىلىق – زامان تالابى
تسيفرلىق ساۋاتتىلىق – ءبىلىم الۋشىنىڭ قازىرگى ومىردەگى قابىلەتتەرىنىڭ ماڭىزدى ەلەمەنتى. وقىتۋشىنىڭ تسيفرلىق ساۋاتتىلىعى – قاۋىپسىزدىكتىڭ نەگىزگى شارتى. ءححى عاسىر – تەحنيكانىڭ وزىق دامىعان كەزەڭى. سوندىقتان جاس بۋىندى تسيفرلىق ساۋاتتىلىق پەن اقپاراتتىق قاۋىپسىزدىك نەگىزدەرىنە مۇمكىندىگىنشە جاس بۋىندى ەرتەرەك ۇيرەتۋ ماڭىزدى. قازىرگى زامانعى اقپاراتتىق-كوممۋنيكاتسيالىق تەحنولوگيالاردىڭ پايدا بولۋىمەن بالالار اقپارات پەن بىلىمگە ەركىن قول جەتكىزە الدى. ولار تەك ۇيدەگى كومپيۋتەردى عانا ەمەس, سونىمەن قاتار ءارتۇرلى گادجەتتى دە ەركىن قولدانا الادى. شىنايى ومىرمەن ۆيرتۋالدى وڭاي بىرىكتىرەدى. باستاۋىش سىنىپ وقۋشىلارىنىڭ ءوزى تسيفرلىق مۇمكىندىك دەڭگەيىنىڭ ۇشتەن ءبىر بولىگىن مەڭگەرىپ ۇلگەرگەن.
مۇعالىمدەر مەن باستاۋىش سىنىپ وقۋشىلارىنىڭ تسيفرلىق ساۋاتتىلىعىن ارتتىرۋ, ينتەرنەتتى پايدالانۋ مۇمكىندىكتەرىن كەڭەيتۋ باستاۋىش مەكتەپتەگى جۇمىستىڭ باسىم باعىتى. ويتكەنى تسيفرلىق الەم قارقىندى دامۋ ۇستىندە. سمارتفوندار مەن كومپيۋتەرلەردى ءتىپتى مەكتەپكە دەيىنگى جاستاعى بالالار دا پايدالانىپ جاتادى. ءسويتىپ, تسيفرلىق ساۋاتتىلىق وقۋ مەن جازۋ سياقتى نەگىزگى داعدىلاردىڭ بىرىنە اينالىپ كەلەدى
جاڭا اقپاراتتىق تەحنولوگيانى پايدالانۋ ءبىلىم مازمۇنىن جاڭارتۋمەن, اقپاراتتىق ورتانى قالىپتاستىرۋمەن, سونداي-اق ساپالى ءبىلىم بەرۋ مۇمكىندىگىن جوعارىلاتا الاتىنىمەن ەرەكشەلەنەدى. ال «تسيفرلىق ساۋاتتىلىق» ءپانىن وقىتۋدىڭ ماقساتى – ءبىلىم الۋشىلاردى كومپيۋتەر قۇرىلعىسى, اقپاراتتى ۇسىنۋ مەن وڭدەۋ, ينتەرنەت جەلىسىندە جۇمىس ىستەۋ, ەسەپتىك ويلاۋ, روبوتتەحنيكا ماسەلەلەرى بويىنشا زاماناۋي اقپاراتتىق تەحنولوگيالاردى ءىس جۇزىندە پايدالانۋ ءۇشىن بازالىق بىلىممەن, ىسكەرلىكپەن جانە داعدىلارمەن قامتاماسىز ەتۋ.
تولقىن ءبايدىلدا,
№53 مەكتەپ-ليتسەيىنىڭ ينفورماتيكا ءپانى مۇعالىمى
استانا
