«قۇرمەتتى دوستار! قالا تۇرعىندارى! قالاداعى اۋىز سۋ تاپشىلىعى وسى ايدىڭ سوڭىنا دەيىن شەشىلەدى. دەگەنمەن ءدال قازىرگى ۋاقىتتا كەيبىر تۇرعىن ۇيلەردە سۋدىڭ ازدىعى شامادان تىس قاتتى بايقالاتىنىن ءتۇسىنىپ وتىرمىز. مۇنداي ۇيلەردىڭ ماسەلەسىن «استانا سۋ ارناسى» جانە اۋداندىق اكىمدىكتەر بىرلەسىپ شەشىپ جاتىر. كەيبىر جەرلەردە ءۇيدىڭ ناسوستارى قايتا بەكىتىلىپ, سونىڭ ارقاسىندا سۋدىڭ اعىسى كۇشەيتىلىپ جاتىر. بىراق ول بارلىق جاعدايدا بىردەي كومەكتەسە بەرمەيدى», دەدى داۋرەن بابامۇراتوۆ.
ونىڭ ايتۋىنشا, «استانا سۋ ارناسى» بارلىق تۇرعىن ۇيلەرگە تەڭدەي قاراپ, سۋ تاپشىلىعىن شەشۋگە بارىنشا تىرىسىپ جاتىر. الايدا سۋ قويمالارىندا دەڭگەي قاتتى تومەندەپ كەتكەن كەزدە, سۋ قويمالارىن قايتا تولتىرۋ ءۇشىن قالاداعى اعىس ازايتىلادى. ادەتتە بۇل تۇننەن-تاڭعا دەيىن جالعاسادى.
«مۇنداي كەزدە سابىر ساقتاعاننان باسقا ەشتەڭە كومەكتەسە المايتىنى انىق. سول سەبەپتى قالىپتاسقان جاعدايعا ازاماتتاردى تۇسىنۋشىلىكپەن قاراپ, زاڭعا قايشى ارەكەتتەردەن اۋلاق بولۋعا شاقىرامىز. كوشە جابىلسا, سۋ كەلەدى ەكەن دەپ ءتۇسىنۋ قاتە. ەسەسىنە, زاڭعا قايشى ارەكەت, باسقا ازاماتتاردىڭ ەركىنە نۇقسان كەلتىرىپ, جول-كولىك اپاتىنا اكەلۋى ىقتيمال», دەپ تۇسىندىردى ىشكى ساياسات باسقارماسىنىڭ باسشىسى.
بۇل رەتتە داۋرەن بابامۇراتوۆ قالىپتاسقان جاعدايعا قاتىستى ءاربىر ارىز-شاعىم تولىق قارالاتىنىن قوسا ايتتى.
«تولىققاندى سۋ تاپشىلىعى قۇرىلىسى 2021 جىلى باستالعان سۋ تازالاۋ ستانتسياسى ىسكە قوسىلعان كەزدە, ياعني وسى ماۋسىمنىڭ 30-نان كەيىن شەشىلەدى. سونىمەن قاتار كەلەسى اپتادا استانا سۋ قويماسىنان تاعى ءبىر قۇبىر سۋ ستانتسياسىنا جىبەرىلەدى. بۇل دا سۋ تاپشىلىعىنىڭ شەشىلۋىنە كومەكتەسەدى», دەپ تۇيىندەدى سپيكەر.
