ابىلقايىرلىقتار بۇعان دەيىن تاۋەلسىزدىك العالى ءتاتتى سۋدىڭ ءدامىن تاتپادىق دەپ شۋ شىعارسا, ەندى الەۋمەتتى ابىگەرگە سالعان اۆتوجولدىڭ ماسەلەسىن كىم شەشەدى دەگەندى العا تارتىپ, كۇڭىرەنىپ وتىر.
توز-توزى شىققان شۇرىق تەسىك جولدىڭ سيقىن كورگەندە, راسىمەن دە شوشيسىڭ. ايتۋلارىنشا, باستارى اۋىرىپ, بالتىرى سىزداعان شاقتا ەلدى مەكەنگە جەدەل جاردەم شاقىرۋ دا مۇڭعا اينالعان. ويدىم-ويدىم جولعا تۇسكەن كولىك اۋىلعا كەشىگىپ كەلەتىنى الىمساقتان ايان. قىسقاسى, اتالعان اۋىلداردىڭ تۇرعىندارى وركەنيەت اياسىنان تىس جەردە ءومىر ءسۇرىپ جاتىر ما دەگەن ويعا شوماسىڭ.
«اسكەرگە اتتانعانىمدا اۋىلدىڭ جولى ءاپ-ادەمى بولاتىن. ودان كەيىن قانشاما ۋاقىت ءوتتى دەسەڭىزشى. بۇل جولعا ەشكىم نازار سالعان ەمەس. اۋىلعا تاكسي جالداساڭ, جولدىڭ توزعانىن العا تارتاتىن كولىك جۇرگىزۋشىلەرى كەم دەگەندە 5 مىڭ تەڭگە سۇرايدى. جولىمىزدىڭ دال-د ۇلى شىققاندىقتان, جەدەل جاردەم شاقىرۋدى دا قويدىق. قىسقاسى, جاعداي ءماز ەمەس», دەيدى ابىلقايىر اۋىلىنىڭ تۇرعىنى قانات ماحاتوۆ جىرعا اينالعان اۆتوجول ماسەلەسى تۋرالى ويىمەن ءبولىسىپ.
قالاي الىپ قاراساق تا, اۋىل تۇرعىندارىنىڭ ءۋاجى ورىندى. اۋىز سۋدان قامىققان حالىق ەندى اۆتوجولدىڭ ازابىن تارتۋعا ءماجبۇر. ەلدى مەكەن تۇرعىندارىنىڭ وتكىر ماسەلەسىنە جەرگىلىكتى اتقارۋشى بيلىك جەدەل دەن قويسا دەيسىڭ...
«اۋىلداعى اعايىننىڭ قانداي قيىندىق كورىپ جۇرگەنىن سەزىنۋ ءۇشىن اۆتوكولىككە وتىرىپ, وسى جولمەن ءبىر ءجۇرىپ وتسەڭدەر ءبارىن تۇسىنەسىڭدەر. ازاپقا سالعان اۆتوجولدىڭ سيقى وسى. ويدىم-ويدىم, شۇڭقىر-شۇڭقىر بولىپ جاتىر. توز-توزى شىققان اۆتوجول تۇرعىنداردىڭ جۇيكەسىن توزدىرىپ ءبىتتى. العان كولىكتەرى شىداس بەرمەي شاشىلىپ قالادى. قوسالقى بولشەكتەردى قويشى, كولىكتىڭ ەسىكتەرى دە قيراپ جاتادى. جەرگىلىكتى حالىقتىڭ شامىنا تيگەن جول ماسەلەسىن شەشەتىن جان تابىلار ما ەكەن؟», دەيدى قوناەۆ اۋىلىنىڭ تۇرعىنى ەرجان تىنىبەكوۆ اشىنىپ.
اۋىل حالقىنىڭ جۇيكەسىنە شي جۇگىرتكەن اۆتوجول ماسەلەسىن شەشۋگە اۋداندىق اكىمدىك قاۋقارسىز. اۋدانداعىلاردىڭ ايتۋىنشا, وبلىستىق ماڭىزى بار جولعا ولاردىڭ قاتىسى جوق. ال اۆتوجولدىڭ ماسەلەسىنە جاۋاپتى وبلىستىق باسقارما وكىلدەرى اسفالتتىڭ دەر كەزىندە جوندەلمەۋىنە مەردىگەر كومپانيالار كىنالى دەگەندى العا تارتادى. ولار كەلتىرگەن دەرەككە سەنسەك, جولدىڭ ماسەلەسىنە جاۋاپتى ەكى كومپانيا ءبىراز ۋاقىت بۇرىن ءوزارا سوتتاسقان. كەيىننەن مەملەكەتتىك ساتىپ الۋ بويىنشا جۇمىسىندا اعاتتىق كەتكەنى انىقتالىپ, بولىنگەن قاراجات بيۋدجەتكە كەرى قايتارىلعان.
قىسقاسى, وڭىرلىك اكىمدىك اۋىل تۇرعىندارىن مازالاعان جولدى جوندەۋ جۇمىستارىن ەكىنشى رەت قولعا الماقشى. ايتۋلارىنشا, جەرگىلىكتى حالىقتىڭ تالابىنان تۋىنداعان ماسەلە كۇرەڭ كۇز مەزگىلى جاقىنداعاندا شەشىلەدى ەكەن. جالپى, جىل سوڭىنا دەيىن وڭىردە 137 شاقىرىم جول ورتا دەڭگەيدە جوندەۋدەن وتكىزىلمەك.
«قازىرگى تاڭدا مەردىگەر انىقتالدى. جولدى جوندەۋ جۇمىستارىمەن «راۋان» جشس اينالىسادى. بۇگىندە تەحنيكالىق قاداعالاۋشىنى انىقتاۋ ماقساتىندا مەملەكەتتىك ساتىپ الۋ رەسىمدەرى جۇرگىزىلىپ جاتىر. اۋىل ازاماتتارىن الاڭداتقان اۆتوجول ماسەلەسى ەكى ايدىڭ شاماسىندا شەشىمىن تابادى», دەيدى وبلىستىق تۇرعىن ءۇي كوممۋنالدىق شارۋاشىلىق, اۆتوموبيل جولدارى باسقارماسىنىڭ وكىلى ولجاس ورىنبەكوۆ جاعدايدى ءتۇسىندىرىپ.
وتىز جىلدان اسا ۋاقىت بويى اۆتوجولدىڭ ازابىنان مەزى بولعان اۋىل جۇرتىنىڭ ارمانى راسىندا دا ەكى ايدا شەشىلە مە؟ الدە ساعىزشا سوزىلعان كوپ جۇمىستىڭ ءبىرى سەكىلدى مەرزىمى ۇزاي بەرە مە؟ ول جاعىن, البەتتە ۋاقىت كورسەتەدى.
جامبىل وبلىسى,
تۇرار رىسقۇلوۆ اۋدانى
