مازمۇندى كەش شىمىلدىعى استاناداعى مۋزىكالىق جاس كورەرمەن تەاترى ارتىستەرىنىڭ ايتۋلى تۇلعانىڭ ءومىر جولىن بەينەلەگەن قويىلىممەن اشىلدى. ودان كەيىن ءيمانجۇسىپتىڭ نەمەرەسى بەلگىلى عالىم, پروفەسسور راۋشان كوشەنوۆا اتاسى تۋرالى جۇرتشىلىققا بەيمالىم دەرەكتەردى اڭگىمەلەدى.
– اكەم ماعان كوزى تىرىسىندە: «اتاڭنىڭ سۇيەگى جاتقان جەر مەن سۋرەتىن تاۋىپ ال», دەپ امانات ايتىپ ەدى. بۇگىندە سونىڭ ەكەۋىن دە ورىندادىم. اتام اقتالعاننان بەرى ارتىندا قالعان مۇراسىن جيناپ كەلەمىن. ءبىزدىڭ اۋلەتىمىز كوپ قۋعىن كوردى. اكەم ون جاسىندا جەتىم قالىپ, باس ساۋعالاپ وزبەكستانعا كەتتى. ەلگە 1946 جىلى ورالعاننان كەيىن تۋىستارىن ىزدەپ تابادى. سودان سوڭ اكەسىنىڭ جازىقسىز قۇربان بولعانىن ايتىپ, جوعارى بيلىككە نەشە مارتە حات جازعان. ونىڭ ءبارى مەندە ساقتاۋلى تۇر, – دەدى اسىلدىڭ سىنىعى.
قازىر ەلوردا ىرگەسىندەگى جىبەك جولى اۋىلىنداعى ورتا مەكتەپ ءيمانجۇسىپتىڭ ەسىمىمەن اتالادى. وندا دارابوزعا ارنالعان مۋزەي بار. سوندا وعان قاتىستى كوپتەگەن جادىگەر ساقتالعان. بۇل مۇراجاي راۋشان كوشەنوۆانىڭ باس بولۋىمەن اشىلعان.
ءبىر جاعىنان ءور مىنەزدى ازاماتتىڭ ءومىرى كۇرەسكە تولى بولعانى بەلگىلى. بۇل قاسيەت وعان تەكپەن دارىعان سەكىلدى. اكەسى قۇتپان مەن اتاسى تۇرعانباي داتقا دا وتارشىلدىق ساياساتقا قارسى شىعىپ, سول جولدا باستارىن بايگەگە تىكتى. ءيمانجۇسىپ تە ۇستەم ەلدىڭ ەزگىسىنە كونبەدى. سول ءۇشىن پاتشا زامانى مەن كەڭەس داۋىرىندە ءبىراز قۋعىن كوردى. اقىرى جازىقسىز جالانىڭ قۇربانى بولدى. ونىڭ ارقالى اقىن, ءدۇلدۇل ءانشى بولۋىنا ءبىرجان سال, اقان سەرى, ۇكىلى ىبىراي, بالۋان شولاقتىڭ تۋىندىلارى ەرەكشە اسەر ەتتى. ءوزى دە اۋەلەتىپ ءان شىرقادى. قۇس سالىپ, يت جۇگىرتتى. جاۋىرىنى جەرگە تيمەگەن بالۋان اتاندى. ءيمانجۇسىپتىڭ اندەرى رۋحتى, ەركىن سازدى, قۇلاشى كەڭ بولىپ كەلەدى. كورنەكتى عالىم قانىش ساتباەۆ ونىڭ شىعارماشىلىعىن جوعارى باعالاعان.
وكىنىشكە قاراي, بۇگىنگى ۇرپاققا اقىننىڭ بارلىق مۇراسى جەتكەن جوق. كەڭەس زامانىندا ونىڭ اندەرىن ورىنداۋ عانا ەمەس, اتىن ايتۋعا تىيىم سالىندى. سوندا دا بەلگىلى ونەر زەرتتەۋشىسى ا.زاتاەۆيچ بىرقاتار ءانىن نوتاعا ءتۇسىرىپ, «قازاقتىڭ 1000 ءانى» اتتى جيناعىنا ەنگىزگەن. ماسەلەن, «سارىمويىن» ءانىن ە.برۋسيلوۆسكي «قىز جىبەك» وپەراسىندا بەكەجاننىڭ ارياسىنا پايدالانعان.
ادەبي-سازدى كەشتە ءانشى-سازگەردىڭ نەگىزىنەن ەل جادىنان ۇمىت قالعان تۋىندىلارى ورىندالدى. ايتالىق, «سارىارقا» ءانىن حالىقارالىق جانە رەسپۋبليكالىق بايقاۋلاردىڭ لاۋرەاتى جاقسىگەلدى ماياساروۆ ناقىشىنا كەلتىرىپ شىرقاسا, «ەل قايدا» شىعارماسىن تالانتتى ونەرپاز ايدوس وڭعارباي قوبىزبەن جەتكىزدى. اقىننىڭ جاس كەزىندە شىعارعان «سەيفىل-مالىك» ءانىن بەلگىلى ءانشى نۇراي تاناباەۆ ورىندادى. ال وزگەرىس شەرىكباي جوعارىدا ايتقان «سارىمويىندى» اۋەلەتتى. سونداي-اق ەلوردا فيلارمونياسىنداعى «حالىق ءانى» ءبولىمىنىڭ بەرىك وماروۆ, دانيار مۇقان, جاندوس يمانباي, سىرىم مۇحامەتجانوۆ سەكىلدى تالانتتى ونەرپازدارى ءبىرتۋار تۇلعانىڭ تۋىندىلارىن شىرقاپ, كورەرمەننىڭ ىستىق ىقىلاسىنا بولەندى. مادەنيەت قايراتكەرى شولپان قورعانبەك جەتەكشىلىك ەتەتىن «قورقىت» ەتنو-ءانسامبلى بىرنەشە كۇيدى تارتۋ ەتتى. سونىمەن قاتار كەشكە ارنايى قوناق بولىپ كەلگەن كوكشەتاۋداعى «ادەبيەت جانە ونەر» مۋزەيىنىڭ ديرەكتورى نۇربەك نۇرالين باستاعان ازاماتتار داڭقتى ەردىڭ نەمەرەسى راۋشان كوشەنوۆاعا سىي-قۇرمەت كورسەتتى.
