سونىمەن قازىلاردىڭ شەشىمىمەن «IoVIT» – «ەڭ ۇزدىك يننوۆاتسيالىق ستارتاپ», «SkillSat» – «ادامزات ءۇشىن اسا باعالى جوبا» جانە «وربيتالنىي ەكسپرەسس» – «بولاشاقتا عارىشتى يگەرۋشى» رەتىندە تانىلدى. جالپى, جۇلدە قورىنداعى 15 مىڭ دوللاردى جەڭىمپازدار ءوزارا ءبولىپ الدى.
– ءبىزدىڭ ستارتاپ شاعىن قۇرىلعىلار-نانوسپۋتنيكتەردى قۇراستىرىپ, ىسكە قوسۋ ءۇشىن ءبىلىم بەرۋ جيناقتارىن ۇسىنادى. بۇل يدەيا ماعان 2019 جىلى بايقوڭىر عارىش ايلاعىن العاش رەت كورگەندە كەلگەن-ءدى. ءبىز «Space Tech Battle»-دى كوپتەن كۇتتىك. ءوز ەلەكترونيكاسى مەن تەحنولوگيالارىن پايدالاناتىن اپپاراتتىق ستارتاپتار ۇنەمى كولەڭكەدە قالاتىن. سوندىقتان «Astana Hub» جانە تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى جوسپارلاعان وسىنداي ءىس-شارانىڭ جۇزەگە اسىرىلعانىنا قۋانىشتىمىن. ول جالعاسىن تاۋىپ, «SpaceTech» اكسەلەراتورلارى پايدا بولسا ەكەن, – دەدى «SkillSat» نەگىزىن قالاۋشى ءارى باس ديرەكتورى ابىلايحان مۇحامەدجانوۆ.
سونداي-اق فورۋمدا «Silkway Accelerator Pitch Marathon» بارىسىندا التى ستارتاپ («BILLZ», «Kid Security», «Trust Contract», «Prosper Pay», «Codify», «Voiceloft») – «Astana Hub» پەن «Google for Startups» بىرلەسكەن اكسەلەراتسيالىق باعدارلاماسىنىڭ قاتىسۋشىلارى ءوز جوبالارىن ينۆەستورلاردىڭ, ءىرى كورپوراتسيا مەن ۆەنچۋرلىق قور وكىلدەرىنىڭ نازارىنا ۇسىندى.
– «Space Tech» – ءبىزدىڭ تەحنوپارك ءۇشىن باسىم باعىتتاردىڭ ءبىرى. مەن وسى الاڭدا ەكى ماڭىزدى ءىس-شارا – «Space Tech Battle» جانە «Silkway Accelerator Pitch Marathon» وتكىزۋگە مۇمكىندىك بەرگەن فورۋم ۇيىمداستىرۋشىلارىنا العىس ايتامىن. بۇل جاس كومپانيالاردىڭ وزدەرىن كورسەتىپ, دامۋىنا تاماشا مۇمكىندىك, – دەدى «Astana hub» باس ديرەكتورى ماعجان ماديەۆ.
ەسكە سالا كەتەيىك, 2 ماۋسىمدا الماتىدا «Central Eurasian Venture Forum» ۇيىمداستىرىلدى. وعان ينۆەستورلار, ستارتاپتار جانە ستارتاپ ەكوجۇيەسىنىڭ باسقا دا وكىلدەرى قاتىستى. قىسقاسى, ءىس-شارا تۇتاس ورتالىق ەۋرازيانى قامتىدى. نەگىزگى ۇيىمداستىرۋشىلار – «MOST» حولدينگى جانە سينگاپۋرلىق «Investbank» («Paladigm Capital») پلاتفورماسى. فورۋم اياسىندا تسيفرلىق دامۋ جانە اەروعارىش ونەركاسىبى مينيسترلىگى جانە «Inspirations» سەرىكتەستىگىمەن بىرلەسىپ «Astana Hub» حالىقارالىق تەحنوپاركى «Space Tech Battle» جانە «Silkway Accelerator Pitch Marathon» ۇيىمداستىردى. فورۋمعا 400-دەن استام ستارتاپ جانە 600 جەكە ينۆەستورلار, ۆەنچۋرلىق قورلار مەن كورپوراتسيالاردىڭ وكىلدەرى قاتىستى. ينۆەستور-ستارتاپ كەزدەسۋلەرى, ستارتاپ جارىستارى جانە كەلىسسوزدەر بارىسىندا ستارتاپتار ءبىرىنشى كەزەڭدە 8 ملن دوللار ينۆەستيتسيا تارتقانىن ايتا كەتەيىك. وسىلايشا, بىلتىرعى 5 ملن دوللارلىق رەكورد جاڭارتىلدى.
